გასული წელი მზარდი ტექნოლოგიური კომპანიებისთვის რთული იყო, რადგან ინვესტორები მოერგნენ ცვალებად მაკროეკონომიკურ გარემოს, მათ შორის უფრო მაღალ საპროცენტო განაკვეთებს. Spotify Technology-მ, ისევე, როგორც ბევრი მზარდი პოტენციალის აქციამ ბაზარზე, განიცადა აქციების ფასის უზარმაზარი – დაახლოებით 66%-იანი ვარდნა 2021 წლის ოქტომბერში დაფიქსირებული 52-კვირიან მაქსიმუმთან შედარებით.
აქციების დაბალმა ფასმა პოტენციური მყიდველების ყურადღება მიიპყრო. ამ სტატიაში მოცემულია ორი რამ, რაც ინვესტორებმა Spotify-ის შესახებ უნდა იცოდნენ, რათა კომპანიის აქციების მდგომარეობა და მომავალი ზრდის პერსპექტივები უკეთ გაიგონ.
- Spotify-ის ბიზნეს მოდელი ორმხრივ ბაზარს მოიცავს
2006 წელს დაარსებულმა შვედურმა Spotify-მ შექმნა პლატფორმა მომხმარებლებისთვის, რომ იპოვონ და მოუსმინონ მუსიკას (ასევე პოდკასტებსა და აუდიოწიგნებს) რეკლამის მხარდაჭერით ან (რეკლამის გარეშე) გამოწერის საფუძველზე. ეს არის მსოფლიოში ერთ-ერთი უმსხვილესი მუსიკის სტრიმინგ პროვაიდერი, ყოველთვიურად 406 მილიონი აქტიური მომხმარებლით (MAU) და 180 მილიონი ფასიანი გამომწერით 184 ბაზარზე.
Spotify არის ორმხრივი ბაზარი, რომელიც მომხმარებლებს არტისტებთან და კონტენტის შემქმნელებთან აკავშირებს. კომპანია მომხმარებლებს მუსიკის პერსონალიზებულ და შეუფერხებლად აღმოჩენაში ეხმარება. მომხმარებლებს შეუძლიათ ადვილად იპოვონ საყვარელი მუსიკა ან პოდკასტი (პლატფორმაზე 82 მილიონი ტრეკია) ან Spotify-ისგან პერსონალიზებული რეკომენდაცია მიიღონ. მათ პლატფორმის გამოყენება სხვადასხვა ელექტრონული მოწყობილობების (ტელეფონები, კომპიუტერები, ტაბლეტები და ა. შ.) საშუალებით შეუძლიათ.
იმავდროულად, კონტენტის შემქმნელებს შეუძლიათ გამოიყენონ Spotify-ის 406 მილიონი MAU, რათა თავიანთი შემოქმედება გაავრცელონ და მონეტიზაცია განახორციელონ. მათ ასევე შეუძლიათ, რომ ფანებთან პირდაპირი ურთიერთობა დაამყარონ, მათი ქცევები პროგრამული უზრუნველყოფისა და მონაცემების გამოყენებით გაანალიზონ და თავიანთი ბიზნესი ამის შესაბამისად მართონ.
Spotify თავისი სერვისის მონეტიზაციას ორი ძირითადი გზით აღწევს. მისი შემოსავლის ძირითად ნაწილს პრემიუმ სააბონენტო სერვისები შეადგენს, სადაც მომხმარებლები ურეკლამო მუსიკაზე წვდომისთვის იხდიან საფასურს. 2021 წელს ამ მიმართულებიდან მიღებულმა შემოსავალმა მთლიანი შემოსავლის 86% შეადგინა.
დანარჩენი არის რეკლამით მხარდაჭერილი სერვისი, სადაც მომხმარებლებს უწევთ რეკლამების მოსმენა შეზღუდული რაოდენობის ტრეკებზე უფასო წვდომის სანაცვლოდ. სიმცირის მიუხედავად, ბიზნესის ეს ნაწილი 2021 წელს სწრაფად გაფართოვდა – წლის განმავლობაში 62%-ით. გამოწერაზე დაფუძნებული ბიზნესი კი ამ პერიოდში მხოლოდ 19%-ით გაიზარდა.
- Spotify-ის მომავალი სავსეა შესაძლებლობებით … და გამოწვევებით
თავისი ბიზნესის მასშტაბურობით Spotify-მ ბოლო რამდენიმე წლის განმავლობაში დიდ წარმატებას მიაღწია. ბოლო 5 წლის განმავლობაში შემოსავალი სამჯერ გაიზარდა €3 მილიარდიდან ($3.23 მილიარდი) €9.7 მილიარდამდე, რადგან MAU 123 მილიონიდან 406 მილიონამდე გაიზარდა.
Spotify-ის აღმავლობა მისი მუდმივად მზარდი მომხმარებელთა ბაზისა და კონტენტით არის განპირობებული. ერთის მხრივ, კომპანია, მომხმარებლების ჩართვის გასაუმჯობესებლად, მუდმივად ამატებს ახალ კონტენტს. ამ პლატფორმაზე თავიდან მხოლოდ მუსიკა იყო, შემდეგ დაემატა პოდკასტი და ახლა აუდიოწიგნები (Findway-ის შეძენის შედეგად).
მომხმარებელთა მზარდი ბაზა, თავის მხრივ, კონტენტის შემქმნელებს შესაძლებლობას აძლევს, რომ უფრო დიდ აუდიტორიას მიმართონ და მეტი შემოსავალი გამოიმუშაონ. შედეგად, არტისტებს შეუძლიათ თავიანთ საქმიანობაში მეტი ინვესტიცია ჩადონ და მომხმარებლების გამოცდილება უფრო უკეთესი კონტენტის შექმნით გააუმჯობესონ.
მოკლედ რომ ვთქვათ, Spotify-ის აქვს პოტენციალი, გაზარდოს შემოსავალი მრავალი წლის განმავლობაში, რადგან კომპანიას ძლიერი იმპულსი გააჩნია. მას შეუძლია თავისი ასობით მილიონი უფასო მომხმარებელი პრემიუმ მომხმარებლად აქციოს და როგორც პოდკასტების, ასევე აუდიოწიგნების მიმართულებით კიდევ უფრო გაფართოვდეს. გარდა ამისა, Spotify-ის შეუძლია გლობალური მასშტაბით ახალი სტრიმერები მოიზიდოს.
მიუხედავად ზრდის ამ პოტენციალისა, Spotify პრობლემებისგან თავისუფალი არ არის. მიუხედავად იმისა, რომ პლატფორმა ახალ არტისტებს მიესალმება, დროის დიდი ნაწილი მაინც ცნობილ შემსრულებლებს ეთმობა. ვინაიდან არტისტების კომპენსაცია მათი სიმღერების გაშვების რაოდენობასთან არის დაკავშირებული, შესაძლოა, პატარა და დამოუკიდებელ შემსრულებლებს (ნაკლებად ცნობილებს) პლატფორმაზე გადარჩენა გაუჭირდეთ. ეს საკითხი კონკურენტულ მუსიკალურ ინდუსტრიაში ახალი არ არის, მაგრამ კომპანიამ უნდა მოძებნოს დამწყები შემსრულებლების კომპენსირების გზები, რათა მათი დაკარგვის რისკი თავიდან აიცილოს.
კიდევ ერთი გამოწვევა, რომელსაც Spotify უნდა გაუმკლავდეს არის ის ძალაუფლება, რომელიც მასზე საუკეთესო კონტენტის შემქმნელებს გააჩნია. ჯო როგანის ინციდენტი ხაზს უსვამს რისკებს, რომ საუკეთესო შემსრულებლებს შეუძლიათ პლატფორმა დატოვონ და ამით მომხმარებლის გამოცდილება დააზარალონ. Spotify-მ უნდა მოძებნოს გზები საუკეთესო კონტენტის შემქმნელების შესანარჩუნებლად, წინააღმდეგ შემთხვევაში, მომხმარებლების დაკარგვის რისკის წინაშე აღმოჩნდება.
გარდა ამისა, Spotify უნდა გაუმკლავდეს შემდეგ სერვისებთან კონკურენციას: Apple-ის Apple Music, Alphabet-ის Youtube Music და ა. შ. საბედნიეროდ კომპანიას დიდი ინვესტიციების განხორციელება შეუძლია, რადგან ის უკვე აწარმოებს პოზიტიურ საოპერაციო ფულად ნაკადებს და ბალანსზე €3.5 მილიარდის მოცულობის ფულადი სახსრები, ფულადი სახსრების ეკვივალენტები და მოკლევადიანი ინვესტიციები გააჩნია.
მოკლედ Spotify-ის გრძელვადიანი მიზნის შესახებ
პირველი კვარტლის შედეგების წარდგენისას Spotify-ის მენეჯმენტმა კომპანიის გრძელვადიან მიზანს კვლავ გაუსვა ხაზი: 1 მილიარდი მომხმარებლის მიღწევა, შემოსავლის 20%-ით ზრდა წლიურად (რთული პროცენტით) და მთლიანი მოგების 30%-დან 40%-მდე გაზრდა.
თუ კომპანია მაღალი ხარისხის კონტენტის დამატებას განაგრძობს, მომხმარებლების რაოდენობა, ბუნებრივია, გაიზრდება.
მიუხედავად ყველაფრისა, ინვესტორებმა თვალი უნდა ადევნონ ზემოაღნიშნულ რისკებს, რადგან მათ კომპანიის გრძელვადიანი ამბიციისთვის საფრთხის შექმნა შეუძლია.
