დიდია შესაძლებლობა, რომ 2022 წელი ისტორიას დარჩეს – ყოველ შემთხვევაში, ინვესტორებს შორის, როგორც აქციების დაყოფის წელი. ამ სტატიაში მიმოვიხილავთ სწორედ სამ ისეთ კომპანიას, რომელიც ამ წელს აქციების დაყოფას გეგმავს.
Tesla
Tesla ინვესტორების ფართო წრეში სტაბილურად პოპულარულ კომპანიად რჩება. მიუხედავად იმისა, რომ წელს მან, ისევე როგორც თითქმის ყველა სხვა პოპულარულმა აქციამ, უამრავი დარტყმა მიიღო, ელექტრონული ავტომობილების (EV) სივრცეში კომპანიის წამყვანი პოზიცია მის აქციებს მაღალ ფასს (დაახლოებით $700) უნარჩუნებს.
ვინაიდან ტესლას მიზანი დიდწილად საცალო ინვესტორების მოზიდვაა, კომპანიის ინტერესებშია, რომ აქციები ბაზარზე უფრო ხელმისაწვდომ ფასად მიმოიქცეოდეს. ასე რომ, ტესლა აპირებს აქციების 1/3-თან შეფარდებით დაყოფას.
ფინანსური ინჟინერიის ეს ნაწილი ექვემდებარება აქციონერთა კენჭისყრას, რომელიც საბოლოოდ Tesla-ს მომავალ წლიურ საერთო კრებაზე გაიმართება. ეს შეხვედრა აგვისტოს დასაწყისშია დაგეგმილი.
Alphabet
ძვირფასი აქციების კლუბის კიდევ ერთი წევრი არის Alphabet – ინტერნეტ საძიებო ტიტანის – Google-ის მშობელი კომპანია. ბირჟაზე მიმოქცევადი Alphabet-ის ორივე – A და C კლასის აქციის ფასი, დაახლოებით $2,2000-ს შეადგენს.
ასე რომ, Alphabet-ის მხრიდან ძალიან ლოგიკური იყო აქციების 1/20-თან შეფარდებით დაყოფა, გარდა B კლასის ინსაიდერული აქციებისა, რომლებიც საჯაროდ არ მიმოიქცევა.
Alphabet-მა ამის შესახებ 2021 წლის მეოთხე კვარტლისა და მთელი წლის შედეგების გამოქვეყნებისას თებერვალში გამოაცხადა. ეს, ალბათ, შემთხვევითი არ იყო, რადგან კომპანიამ დააფიქსირა შემოსავლებისა და მომგებიანობის მძლავრი წლიური ზრდა, რომელიც ანალიტიკოსების შეფასებებს აჭარბებს. ამის შემდეგ, აქციონერების მიერ აქციების დაყოფის გადაწყვეტილების დამტკიცება გასაკვირი არ იყო. ჩანაფიქრი ძალაში 15 ივლისს შევა.
Nintendo
Tesla და Alphabet/Google ინვესტორების დიდი ყურადღებით სარგებლობს. ცნობილი იაპონური ვიდეო თამაშების კომპანია – Nintendo, ასევე, ყურადღების ცენტრში მოექცა. კომპანიამ აქციების 1/10-თან შეფარდებით აქციების დაყოფის შესახებ თავდაპირველად მაისში გამოაცხადა. გადაწყვეტილება ძალაში ოქტომბრის პირველ დღეებში შევა.
ეს ცოტა რთული პროცესია. Alphabet-ის მსგავსად, Nintendo-ს აშშ-ში სავაჭრო აქციების რამდენიმე კლასი გააჩნია, ან, უფრო ზუსტად, ამერიკული სადეპოზიტო ქვითრები (ADR). NTDOY აბრევიატურის მქონე ერთი აქცია „მთავარი“ აქციის (რომელიც იაპონიაში მიმოიქცევა) მხოლოდ მერვედს წარმოადგენს. NTDO.F, იმავდროულად, ძირეული იაპონური აქციის სრულ ერთ წილს უდრის.
1/10-თან შეფარდებით გაყოფა უფრო მეტად შიდა ინვესტორებზეა მიმართული, ვიდრე ADR-ის მფლობელებზე.
ამ დროისთვის, იაპონურ ბირჟაზე კომპანიის აქციების შეძენის მინიმალური ზღვარი 100 აქციაა. ვინაიდან იქ Nintendo-ს ერთი აქცია ამჟამად 57,450 იენი ($422) ღირს, მინიმალური შესყიდვისთვისაც კი ინვესტორს $42,200-ის გადახდა უწევს. ამის გათვალისწინებით, აქციების დაყოფა კომპანიისთვის ძალიან სასარგებლოა.
იაპონური კომპანიის წარმომადგენლებმა განაცხადეს, რომ ახალ აქციებს 30 სექტემბრის მონაცემებით Nintendo-ს მოქმედი აქციონერები მიიღებენ.
