წელს ნავთობის ფასი გაიზარდა. West Texas Intermediate, აშშ-ის ნავთობის ძირითადი მაჩვენებელი, ბარელზე $100-ზე მეტი გახდა, რაც წლის დასაწყისიდან 35%-ზე მაღალი ზრდაა. ნედლი ნავთობი კიდევ უფრო ძვირი იყო და პიკურ მდგომარეობაში ბარელზე $130 შეადგინა. მიუხედავად იმისა, რომ ნავთობი, ამ სიმაღლეების მიღწევის შემდეგ, „დამშვიდდა“, ის ბევრად აღემატება იმ დონეს, რომელსაც ნავთობკომპანიების უმეტესობა წელს მოელოდა.
ამ სტატიაში განვიხილავთ სამ ნავთობკომპანიას, რომლებიც ამჟამად საუკეთესოდ გამოიყურება და მათი აქციების შეძენა მაისში ღირს იმ ინვესტორებისთვის, რომლებიც ფიქრობენ, რომ ნედლი ნავთობის ფასები გაიზრდება.
Marathon Oil
Marathon Oil-მა ნავთობის ჰეჯირების საქმიანობის შეზღუდვა აირჩია, რაც კომპანიას, ნავთობის მაღალი ფასებიდან, თითქმის სრული სარგებლის მიღების საშუალებას აძლევდა. როგორც ქვემოთ მოყვანილი დიაგრამა გვიჩვენებს, Marathon Oil-ს ნავთობის ფასების გაუმჯობესების მიმართ ყველაზე მაღალი მგრძნობელობა აქვს, ჰეჯირების (ჰეჯირება არის ფიზიკურ ბაზარზე ფასების მოძრაობის რისკის კომპენსირების პროცესი ფიუჩერსების ბაზარზე იმავე საქონლის ფასის ჩაკეტვით) შეზღუდვიდან გამომდინარე.
შედეგად, პრაქტიკულად არ არსებობს ლიმიტი ფულადი სახსრების ოდენობაზე, რომლის გამომუშავებაც კომპანიას ამ წელს შეუძლია. გარდა ამისა, იქიდან გამომდინარე, რომ Marathon Oil-მა წინა წლებში მნიშვნელოვანი ზარალი განიცადა, წელს კომპანია, თავისი მოულოდნელი შემოსავლისთვის, ფულად გადასახადს არ გადაიხდის. ეს Marathon-ს საშუალებას მისცემს, რომ 2022 წელს აქციონერებს ფულადი სახსრები დაუბრუნოს.
გასულ წელს კომპანიამ უკვე ოთხჯერ გაზარდა დივიდენდები და საერთო ზრდამ 133% შეადგინა. Marathon-მა, ასევე, გასული წლის ოქტომბრიდან თებერვლის დასაწყისამდე, $1 მილიარდის ღირებულების აქციები გამოისყიდა და რითაც აქციების რაოდენობა 8%-ით შეამცირა. ნავთობის უფრო მაღალი ფასებისა და საგადასახადო ფარის საშუალებით, Marathon-ს წელს აქციონერებისთვის უზარმაზარი თანხის დაბრუნება შეუძლია, თუ ნავთობის ფასები ამაღლებული დარჩება. ამან შეიძლება კომპანიის მთლიანი შემოსავლის გამომუშავებაში მნიშვნელოვანი როლი შეასრულოს.
Continental Resources
Marhathon Oil-ის მსგავსად, Continental Resources-მაც შეზღუდა ჰეჯირება. ეს კომპანიას საშუალებას აძლევს გამოიმუშაოს დიდი მოცულობის შემოსავლები და, შესაბამისად, მეტი ნაღდი ფული დაუბრუნოს ინვესტორებს.
ცოტა ხნის წინ კომპანიამ დივიდენდების კიდევ ერთი დიდი – 22%-იანი ზრდა დააფიქსირა. მომავალში დივიდენდების კიდევ უფრო მეტად ზრდა არის მოსალოდნელი. Continental-ის მიზანია, რომ 2022-2025 წლების ვადებში დივიდენდური სარგებლის ამჟამინდელი დონე 1.8%-2%-ით გაზარდოს. გარდა ამისა, კომპანია, აქციების გამოსყიდვის პროგრამაში $1 მილიარდის დახარჯვას აპირებს.
იმავდროულად, ნავთობის ფასების მატებასთან ერთად, Continental ფულადი ნაკადების ზრდას გააგრძელებს და აქციონერებისთვის მეტი ფულის მიცემის საშუალება ექნება. კომპანიას შეუძლია ეს ფულადი სახსრები კიდევ უფრო მეტი აქციის გამოსყიდვისთვის ან რაიმე მიმზიდველი შესყიდვის განსახორციელებლად გამოიყენოს.
ConocoPhillips
ConocoPhillips ასევე არ იყენებს ჰეჯირებას და წელს აქციონერებს მაღალ დივიდენდებს უხდის. კომპანიამ თავდაპირველად მიზნად დაისახა 2022 წელს ინვესტორებისთვის $7 მილიარდის 3 დონის მიხედვით დაბრუნება:
- ფიქსირებული კვარტალური დივიდენდების გადახდა (ყოველწლიურად $2.4 მილიარდი). კომპანიის მიზანია ამ მაჩვენებლის ყოველწლიურად გაზრდა.
- მინიმუმ $3.5 მილიარდის ღირებულების აქციების გამოსყიდვა.
- დაახლოებით $1 მილიარდის ოდენობით ნაღდი ფულის ცვლადი დაბრუნება (VROC).
თუმცა, ნავთობის უფრო მაღალი ფასების წყალობით, ConocoPhillips-მა დაბრუნების სამიზნე უკვე გაზარდა. კომპანიამ ბოლო ორ დონეს $1 მილიარდი დაამატა. ნავთობის მაღალი ფასები Conoco-ს საშუალებას მიცემს ამ ორი საფეხურისთვის მეტი თანხა გამოყოს და ასევე, გაზარდოს კვარტალური დივიდენდების გადახდა. ეს მზარდი ფულადი ანაზღაურება კომპანიას კარგ საინვესტიციო შესაძლებლობად აქცევს.
