ბოლო 2 ათწლეულის განმავლობაში Apple ერთ-ერთი ყველაზე წარმატებული კომპანიაა. შესანიშნავმა წარმადობამ კომპანიის საბაზრო კაპიტალიზაცია გასაოცარ $3 ტრილიონამდე გაზარდა.
საზრიანმა ინვესტორებმა, რომლებიც Apple-ს მიჰყვებიან, კომპანიის შესახებ, ალბათ, ეს 3 რამ კარგად იციან: iPhone აგრძელებს შემოსავლის ზრდას; Apple-ს აქვს ძლიერი და მზარდი სერვისების სეგმენტი; ამ კომპანიას აქვს წარმატებული ინოვაციების ისტორია. მოდით, თითოეული უფრო დეტალურად განვიხილოთ.
- iPhone-ს კვლავ მოაქვს შემოსავალი
iPhone ყველა დროის ერთ-ერთი ყველაზე წარმატებული პროდუქტია. ათ წელზე მეტი ხნის წინ გამოშვებული პროდუქტის განახლებებს კომპანიისთვის ასობით მილიარდის ოდენობით გაყიდვა მოაქვს. ბოლო კვარტალში, რომელიც 2021 წლის 25 დეკემბერს დამთავრდა, Apple-ის iPhone-ის გაყიდვებმა $72 მილიარდი შეადგინა. ეს მაჩვენებელი წინა წლის იმავე კვარტალში $66 მილიარდს შეადგენდა. ამ სიდიდის საერთო კონტექსტში ჩასასმელად უნდა აღინიშნოს, რომ წინა კვარტალში Apple-ის საერთო გაყიდვები $124 მილიარდის ტოლი იყო. Apple-ის უახლესი iPhone 13 უახლესი 5G ტექნოლოგიით არის აღჭურვილი და მოსალოდნელია, რომ მომდევნო 2 წლის განმავლობაში, მომხმარებლები ძველ ვერსიებს განაახლებენ.
iPhone კომპანიის მთავარი მამოძრავებელი ძალაა, რომელიც მომხმარებლებისთვის Apple-ის ეკოსისტემაში მიმზიდველი შესვლის წერტილია. iPhone-ის შეძენის შემდეგ, ნაკლებად სავარაუდოა, რომ მომხმარებელი სხვა ბრენდზე გადაერთოს, რაც გამოწვეულია კლიენტების შენარჩუნების კუთხით Apple-ის გამორჩეული სიძლიერით.
ამ ყველაფრის შედეგად, Apple-ის შემოსავალი $229 მილიარდიდან (2017 წელი), 2021 წელს $366 მილიარდამდე გაზარდა. აქციონერები აღფრთოვანებული იქნებიან, თუ Apple, მომდევნო 4 წლის განმავლობაში, მსგავსი ან უფრო მაღალი ზრდის დაფიქსირებას შეძლებს. ამავე პერიოდში საოპერაციო შემოსავალი $61 მილიარდიდან $109 მილიარდამდე გაიზარდა. ოთხ წელიწადში $130 მილიარდზე მეტით გაყიდვების გაზრდა საკმაოდ რთულია, მაგრამ საოპერაციო შემოსავლის $48 მილიარდიანი მატება კიდევ უფრო ამაღლებს თამასას.
- მომსახურების სეგმენტის ზრდა
ბოლო ორი ათწლეულის განმავლობაში Apple-მა ძლიერი და მზარდი სერვისების სეგმენტი შექმნა. ბიზნესი შეიცავს საინტერესო პროდუქტებს, როგორებიც არის Apple Music, Apple TV+, Apple Arcade, iCloud და ა. შ. მომხმარებლებს მოსწონთ შეთავაზებები, რომლებიც iPhone-ს ავსებს და მისი ფლობის გამოცდილებას აუმჯობესებს. მაგალითად, iPhone-ის მომხმარებელს Apple Music-ის გამოწერით შეუძლია შექმნას მორგებული ფლეილისტი და სასურველი კომპოზიცია ტელეფონის შეხების გარეშე, ხმოვანი სიგნალის ბრძანების მეშვეობით ჩართოს.
Apple იყო პირველი სტრიმინგ კონტენტის სერვისი, რომელმაც Coda-სთვის ოსკარის ჯილდო მიიღო. ეს აღიარება, შეიძლება, Apple TV+-სთვის ძალიან სასარგებლო აღმოჩნდეს და ის ახალი მომხმარებლების ჯგუფით დაასაჩუქროს.
სერვისების სეგმენტის შემოსავალი მეოთხე კვარტალში $20 მილიარდამდე გაიზარდა, წინა წლის იმავე კვარტალში ეს მაჩვენებელი $16 მილიარდის ტოლი იყო. უფრო მეტიც, სერვისების სეგმენტს (მეოთხე კვარტალი – 72.4%), პროდუქტის გაყიდვებთან შედარებით (მეოთხე კვარტალი – 38.4%), მნიშვნელოვნად მაღალი მოგების მარჟა აქვს.
- ინოვაციების ისტორია
Apple-ს წარმატებული ინოვაციების ხანგრძლივი ისტორია აქვს. iPhone არის Apple-ის მიერ შემუშავებული მოწინავე ტექნოლოგიების ფართო პორტფელის ერთ-ერთი ელემენტი. ამ პორტფელში ერთიანდება: iPad, iMac, Apple Watch, iPod და AirPods. Apple-ის ინოვაცია მხოლოდ პროდუქტებით არ შემოიფარგლება და ის რამდენიმე ცნობილ სერვისს ითვლის, მათ შორის არის App Store, iTunes, Siri, Apple Music, Apple TV+, IOS და სხვა.
კომპანიის წარმატებული ისტორია გვიჩვენებს, როგორ შეუძლია Apple-ს გააგრძელოს ძალიან პოპულარული პროდუქტებისა და სერვისების შექმნა, შესაბამისად, კი გრძელვადიან პერსპექტივაში აქციონერებისთვის თანმიმდევრული ანაზღაურების მიწოდება.
