აგვისტოს შუა რიცხვებში Apple-ის აქციების ფასი ყველა დროის მაქსიმალურ მაჩვენებელთან ახლოს იყო, დღეს კი საფასო ნიშნული 1-წლიანი მინიმუმის ირგვლივ ტრიალებს და ყველა დროის მაქსიმუმს 30%-ით ჩამორჩება.
მიუხედავად ამისა, Apple ჯერ კიდევ სჯობნის სხვა დიდ ტექნოლოგიურ კომპანიებს, როგორიცაა Microsoft, Alphabet, Amazon, Tesla და Meta Platforms. დღეს კი ვისაუბრებთ მიზეზებზე, რის გამოც Apple-ის აქციების ფასი კლებას განაგრძობს.
ბიზნესის გამოწვევები
სავარაუდოდ, Apple-ის აქციების ფასის შემცირების ყველაზე მართებული მიზეზი არის ის, რომ 2023 წლის დასაწყისში კომპანიის ბიზნესი უამრავი გამოწვევის წინაშე დგას.
ფისკალურ 2021 წელს Apple-ის შემოსავალი (ფისკალურ 2020 წელთან შედარებით) 64.9%-ით, ხოლო მოგება 33.2%-ით გაიზარდა. თუმცა როდესაც კომპანიის მენეჯმენტმა წარადგინა მეოთხე კვარტლის და მთელი წლის ფისკალური შედეგები (24 სექტემბერს დასრულებული პერიოდისთვის), ცნობილი გახდა, რომ ფისკალურ 2021 წელთან შედარებით შემოსავალი მხოლოდ 7.8%-ით, ხოლო მოგება 5.4%-ით გაიზარდა.
Apple-ის ზრდა ნელდება და ტენდენცია შეიძლება გაგრძელდეს ფისკალურ 2023 წელს, უამრავი მიზეზის გამო. პირველ რიგში, მზარდი საპროცენტო განაკვეთები არაპირველადი მოხმარების საქონლის მიმართულებით მომხმარებლების ხარჯვას ამცირებს. და მიუხედავად იმისა, რომ კომპანიის მრავალი სერვისი და მისი არსებული პროდუქტების შენარჩუნება ამ ეტაპზე შეიძლება ძირითად ხარჯებში შედიოდეს, Apple-ის ახალი პროდუქციის შეძენის იდეა უდავოდ არაპირველადი მოხმარებისაა.
გარდა ამისა, უცხოურ ვალუტებთან შედარებით მყარი აშშ დოლარი, Apple-ის გაყიდვებს საზღვარგარეთ ნაკლებად ღირებულს ხდის დოლარში კონვერტაციის შემდეგ. ჩინეთში ზრდის შენელება, პანდემიით გამოწვეულ წარმოების გამოწვევებთან ერთად, პირდაპირ ზემოქმედებს Apple-ის უნარზე, შექმნას და გაყიდოს თავისი პროდუქტები.
არც ისე მაღალი შეფასება
აგვისტოს შუა რიცხვებში, როდესაც Apple-ის აქციების ფასი ოდნავ იყო შემცირებული, მისი P/E (ფასი/მოგება) კოეფიციენტი 28.8-ს შეადგენდა, მაგრამ აქციების მასიურმა გაყიდვამ ეს მაჩვენებელი ბევრად უფრო მიმზიდველ — 21.26-მდე შეამცირა. ამავდროულად, S&P 500-ის P/E 19.7-ს აღწევს.
ბრენდის სიმძლავრის ფონზე, Apple-ის აქციების P/E უფრო მაღალი უნდა იყოს. მაგრამ თუ გავითვალისწინებთ კომპანიის შენელებულ ზრდას და მომავალ კვარტლებში ამ ტენდენციის გაგრძელების ალბათობას, გასაგებია, რომ ინვესტორებს არ სურთ მიმდინარე ბაზარზე Apple-ის აქციებისთვის პრემიის გადახდა.
საერთო ჯამში, Apple-ის აქციების შეფასება ახლა გრძელვადიან პერსპექტივაზე ორიენტირებული ინვესტორებისთვის ძალიან მიმზიდველია.
ბალანსის შესუსტება
ალბათ, Apple-ის წინაღობა, რომელზეც ყველაზე ნაკლებს საუბრობენ მზარდი ვალია. მისი მთლიანი წმინდა გრძელვადიანი დავალიანება ახლა ყველა დროის მაქსიმუმზეა, რაც შეიძლება შოკი იყოს ინვესტორებისთვის იმის გათვალისწინებით, რომ კომპანია, ისტორიულად, ბალანსზე დიდი მოცულობის ნაღდ ფულს ინარჩუნებდა.
წარსულში, Apple იყენებდა თავის ნაღდ ფულს, რათა ხელსაყრელ დროს აქციები გამოესყიდა და ბიზნესში რეინვესტირება განეხორციელებინა. ამჯერად, შეიძლება მენეჯმენტს, საკუთარი აქციების გამოსყიდვის ნაცვლად, თავისუფალი ფულადი ნაკადების ვალის დასაფარად გამოყენება მოუწიოს.
უფრო მეტიც, კომპანიის მზარდი სავალო პოზიცია ემთხვევა საპროცენტო განაკვეთების ზრდისა და მომხმარებელთა მოთხოვნის შესუსტების პერიოდს, რაც ბიზნესისთვის ბალანსზე დავალიანების დაგროვებისთვის სახარბიელო დრო ნამდვილად არ არის.
