გასულ კვირას აქციების ფასები ოდნავ შეიცვალა, რადგან კვარტალური ანგარიშების სეზონი ცხელ ფაზაში შევიდა. 2022 წელს Dow Jones Industrial Average და S&P 500, შესაბამისად, 10%-ით და 13%-ით არის დაკლებული, მაგრამ ორივე ინდექსი ივნისის ბოლოს დაფიქსირებული მინიმალური მაჩვენებლების შემდეგ გაიზარდა.
მიმდინარე კვირაში კიდევ ასობით კომპანია გააცნობს ინვესტორებს ინფორმაციას გაყიდვების ტენდენციების შესახებ. დღეს კი სამ მათგანს განვიხილავთ.
Disney
Dow-ს ინდექსში Disney-ის აქციები ერთ-ერთი ყველაზე ცუდი შედეგიანობით გამოირჩეოდა, მაგრამ აქციონერები იმედოვნებენ, რომ ოთხშაბათიდან (კომპანია კვარტალურ ანგარიშს 10 აგვისტოს წარადგენს) ეს მოცემულობა შეიცვლება.
ამ მოხსენებასთან დაკავშირებით დიდი შეშფოთების საგანი არის ის, რომ დისნეის ციფრული ბიზნესი მთლიანი კომპანიის დაქვეითებას განაგრძობს. D2C (კომპანიის მიერ პროდუქტის პირდაპირ მომხმარებელზე გაყიდვა) სეგმენტმა, რომელიც Hulu-სა და Disney+-ს მოიცავს, მეორე კვარტლის პერიოდისთვის $900 მილიონის მოცულობის ზარალი დააფიქსირა. ეს იყო მთავარი მიზეზი იმისა, რომ მთლიანი შემოსავალი 10%-ით შემცირდა.
კონკურენტმა Netflix-მა ზრდის ტენდენციების სტაბილიზაციას ახლახან გაუსვა ხაზი და 2022 წლის ბოლოსთვის გამომწერების რაოდენობის მატების მხრივ უფრო ნათელი მომავლის პროგნოზი გააკეთა. თუმცა, Disney-ის გამოწვევა ზრდაზე მეტად მომგებიანობაა. ინვესტორებს აინტერესებთ, თუ რამდენად გამოსწორდება D2C სეგმენტის მდგომარეობა. ნებისმიერი ახალი სიცხადე ამ საკითხში მომდევნო რამდენიმე დღის განმავლობაში აქციების ფასის ცვლილებას გამოიწვევს.
Take-Two Interactive
Take-Two Interactive, ვიდეო თამაშების შემქმნელი, რომელიც დგას გლობალურად პოპულარული ფრანშიზების უკან, როგორიც არის Red Dead Redemption და Grand Theft Auto, თავის უახლეს შედეგებს დღეს წარადგენს.
მისი წინა კვარტალური ანგარიშიდან, ასევე, უახლესი შედეგებიდან, რომელიც, მაგალითად, Microsoft-მა წარადგინა ირკვევა, რომ ვიდეო თამაშების ინდუსტრია მოთხოვნის შემცირების პრობლემის წინაშე დგას, რადგან მომხმარებლები თავს არიდებენ გართობის იმ ვარიანტებს, რომლებსაც ისინი პანდემიის ადრეულ ფაზებში ემხრობოდნენ. მთავარი კითხვა, რომელიც ინვესტორებს Take-Two-სთან დაკავშირებით აქვს არის ის, თუ რამდენად დააზარალებს ეს შენელება ბიზნესს.
მენეჯმენტმა ჯერ კიდევ მაისში ივარაუდა, რომ ახალ ფისკალურ წელს გაყიდვები დაახლოებით 11%-ით გაიზრდებოდა, მანამდეც კი, სანამ კომპანიას დაემატებოდა შემოსავალი Zynga-ს შეძენიდან. Take-Two ასევე მიზნად ისახავს, რომ მნიშვნელოვნად გაზარდოს საოპერაციო მოგების მარჟა. ამ კვირაში გავიგებთ, თუ რამდენად იქნება კომპანიის პერსპექტივა მზარდი.
Fossil Group
Fossil კვარტალურ ანგარიშს დღეს წარადგენს და ინვესტორებს მასთან დაკავშირებით მნიშვნელოვანი კითხვები აქვთ. საათების სპეციალისტის წინა ანგარიში მყარი იყო, შემოსავალი, ვალუტის კურსის რყევების კორექტირების შემდეგ, 10%-ით გაიზარდა. მიუხედავად ამისა, მაშინდელმა მენეჯმენტმა განაცხადა, რომ კვარტლის ბოლოს, გაყიდვებზე და შემოსავლებზე რამდენიმე ახალმა წინააღმდეგობამ დაიწყო ზეწოლა, მათ შორის ინფლაციამ, უკრაინაში მიმდინარე ომმა და პანდემიით გამოწვეულმა ლოკდაუნმა ჩინეთში.
ამ კვირის ანგარიში გვიჩვენებს, შეძლო თუ არა Fossil-მა ამ წინაღობების გადალახვა. ინვესტორების უმეტესობა ფისკალური 2022 წლისთვის გაყიდვების დაახლოებით 2%-ით ზრდას და მომგებიანობის ოდნავ შემცირებას მოელის. აღმასრულებელმა დირექტორმა – კოსტა კარცოტისმა და მისმა გუნდმა, შესაძლოა, დღეს ეს პროგნოზები შეამცირონ, თუ კომპანიამ მეორე კვარტალში განიცადა ზეწოლა მოთხოვნაზე ისეთ საკვანძო ბაზრებზე, როგორიც არის, მაგალითად, ევროპა.
