ჯერჯერობით ბაზრისთვის რთული წელი იყო, მაგრამ მსოფლიოს ომი და ინფლაცია აქამდეც უნახავს. ამ გაურკვევლობებმა ხელი ვერ შეუშალა ისეთ ინვესტორებს, როგორიც არის უორენ ბაფეტი, რომ საფონდო ბირჟაზე ათწლეულების განმავლობაში სიმდიდრე დაეგროვებინათ.
2022 წელს ნავიგაციისთვის შესანიშნავი გზა შეიძლება იყოს მილიარდერი ინვესტორის რჩევების გათვალისწინება, მათ შორის დამკვიდრებულ ბიზნესში მომგებიან ფასად ინვესტირება. ამ სტატიაში გაეცნობით ორ სამომხმარებლო ბრენდს, რომლის აქციებიც ახლა გონივრულ ფასად არის შეფასებული.
- Starbucks
Starbucks-ის აქციების ფასი, უკანასკნელი მაქსიმალური მაჩვენებლებიდან 34%-ით არის შემცირებული, მაგრამ ეს ვარდნა, რა თქმა უნდა, კომპანიის ზრდის ნაკლებობით არ არის გამოწვეული. ფისკალური 2022 წლის პირველ კვარტალში, რომელიც 2 იანვარს დასრულდა, კომპანიის შემოსავალი წინა წლის ანალოგიურ პერიოდთან შედარებით 19%-ით გაიზარდა. გარდა ამისა, დამფუძნებელი ჰოვარდ შულცი დაბრუნდა აღმასრულებელი დირექტორის პოზიციაზე, რაც, ბრენდის განვითარებაში შულცის წვლილის გათვალისწინებით, სულაც არ არის ცუდი.
მაგრამ ბაზარი შეშფოთებულია ინფლაციური ხარჯებითა და ამის გავლენით Starbucks-ის უახლოეს მომგებიანობაზე. გარდა ამისა, კომპანიის ზოგიერთი თანამშრომელი პროფკავშირებში ერთიანდება. ეს გაურკვევლობა აქციების წარმადობაზე მოქმედებს.
რატომ უნდა შევიძინოთ Starbucks-ის აქციები ახლა? იმიტომ, რომ ამ კომპანიის აქციები ასეთი იაფი ხშირად არ არის. P/S (ფასი/გაყიდვები) კოეფიციენტი ამჟამად მხოლოდ 3-ზე ოდნავ მაღლა მერყეობს. ბოლო 10 წლის განმავლობაში ეს მხოლოდ მეოთხე შემთხვევაა, როდესაც Starbucks-ის P/S კოეფიციენტი ამ დონეზეა.
როგორც ამას Starbucks გეგმავს, კომპანიას, ინფლაციური ხარჯების ანაზღაურების მიზნით, ძლიერი ბრენდიდან გამომდინარე, ფასების გაზრდა შეუძლია. მენეჯმენტი ასევე გეგმავს ხარჯვის მეტი დისციპლინა გამოიყენოს, რათა მტკიცე მარჟა შეინარჩუნოს.
Starbucks-ზე მოთხოვნა ჯერ კიდევ მაღალია, რასაც მხარს უჭერს ბოლო კვარტალში დაფიქსირებული შემოსავლების შესანიშნავი მაჩვენებლები. ინვესტორებს შეუძლიათ კომპანიის აქციები საკმაოდ გონივრულ ფასად შეიძინონ და სანამ ფასის ზრდას ელოდებიან, მიიღებენ საშუალოზე მაღალ – 2.3%-იან დივიდენდურ სარგებელს.
- Kroger
Kroger-ის აქციების ფასი წლის დასაწყისიდან 35%-ით გაიზარდა. აქციების ასეთი წარმადობის ფონზე უცნაურია, რომ ინვესტორები აქციებს ყიდიან, მაგრამ მისი P/E (ფასი/მოგება) თანაფარდობის S&P 500 ინდექსთან მიმართებაში გათვალისწინებით, Kroger დაუფასებელი ჩანს. აქცია ბაზარზე ამჟამად 16-ის ტოლი ფორვარდული P/E კოეფიციენტით მიმოიქცევა, რაც ინდექსის ფორვარდულ P/E-ზე (19.4) დაბალია.
ფისკალურ 2021 წელს, რომელიც იანვარში დასრულდა, კომპანიამ იდენტური გაყიდვების (საწვავის გარეშე) ორწლიან წლიურ საფუძველზე 14.3%-ით ზრდა გამოაცხადა. ციფრული გაყიდვები იმავე პერიოდში 2-ზე მეტჯერ გაიზარდა. 2023 წლისთვის მენეჯმენტი ციფრული გაყიდვებისა და მომგებიანობის გაორმაგებას ელის. ფისკალური 2021 წლის მეოთხე კვარტალში კორექტირებული მოგება ერთ აქციაზე წლიდან წლამდე 12%-ით გაიზარდა.
აღმასრულებელმა დირექტორმა – როდნი მაკმულენმა, მეოთხე კვარტლის ანგარიშის წარდგენისას განაცხადა, რომ Kroger-ის ერთ-ერთი მთავარი სიძლიერე არის კომპანიის უნარი წარმატებით იფუნქციონიროს სხვადასხვა ოპერაციულ გარემოში, Kroger-ის გუნდი კი შესანიშნავ სამუშაოს ასრულებს მიმდინარე და უფრო მაღალი ინფლაციური გარემოს მართვაში.
დაიმახსოვრეთ, აქციების მასიურად გაყიდვა არ ნიშნავს, რომ მათი ფასი უახლოეს პერიოდში კიდევ უფრო არ დაიკლებს. მაგრამ, როგორც უორენ ბაფეტის კარიერამ აჩვენა, თუ სოლიდურ კომპანიებში გონივრულ ფასად დებთ ინვესტიციას და მოკლევადიან მერყეობას გადაიტანთ, გრძელვადიან პერსპექტივაში დამაკმაყოფილებელ ანაზღაურებას მიიღებთ.
