მიუხედავად იმისა, რომ ძირითადი ინდექსები პოტენციური აღდგენის ნიშნებს გვიჩვენებს, ბაზარი წლის დასაწყისიდან ჯერ კიდევ არსებით კლებას განაგრძობს. მაგალითად, S&P 500 წელს დაახლოებით 9%-ით შემცირდა, ამავდროულად, Nasdaq Composite დაახლოებით 15%-ით დაეცა. როდესაც ძირითადი ინდექსები ასე მნიშვნელოვნად ეცემა, ინვესტორებისთვის კარგი დროა პოზიციების გასახსნელად.
პოტენციური ინვესტიციების დეტალური შესწავლა ცხადყოფს, რომ უმაღლესი საფეხურის ტექნოლოგიური კომპანიების აქციებიც კი ბაზარზე მასიურად გაიყიდა. ბაზრის ლიდერები Apple და Netflix არის მაღალი ხარისხის კომპანიების ორი შესანიშნავი მაგალითი, რომლებში ინვესტირებაც ღირს, სანამ აქციების ფასები შემცირებულია.
აი რატომ შეიძლება იყოს ამ ორი კომპანიის აქციები თქვენი პორტფელისთვის შესაფერისი.
Apple
iPhone-ის მწარმოებლის – Apple-ის აქციების ფასი/მოგება კოეფიციენტი (P/E) გასულ წელს 34-დან 26-მდე დაეცა და მხოლოდ 2022 წელს კი 29-დან 26-მდე, რადგან მისი აქციების ფასი შემცირდა. ეს თითქმის მთლიანად ბაზრის განწყობით არის განპირობებული და არა კომპანიის ბიზნესით. Apple-ის ფისკალური პირველი კვარტლის შემოსავალი 11%-ით გაიზარდა, ხოლო მოგება თითო აქციაზე (EPS) – 25%-ით. ამ ორივე მაჩვენებელმა ანალიტიკოსების მოლოდინებს გადააჭარბა.
გარდა ამისა, პირველი კვარტლის შემოსავლის ანგარიშის წარდგენისას, Apple-ის ფინანსურმა დირექტორმა – ლუკა მაესტრიმ განაცხადა, რომ მენეჯმენტი, წინა წელთან შედარებით შემოსავლების სოლიდურ ზრდას მოელის. ეს მოლოდინი კი კომპანიას აქვს მიუხედავად იმისა, რომ მოსალოდნელია მიწოდების ჯაჭვის შეზღუდვები.
მიმდინარე პერიოდის ნებისმიერი ზრდის მოლოდინი საკმაოდ შესამჩნევია, თუ გავითვალისწინებთ კომპანიის წინა წლის მაჩვენებელს: 2021 წლის მეორე კვარტალში კომპანიის შემოსავალი 54%-ით გაიზარდა.
მიუხედავად იმისა, რომ ტექნოლოგიური გიგანტისთვის 26-ის ტოლი P/E თანაფარდობა შეიძლება იაფი არ ჩანდეს, Apple-ის ოპერაციების უმაღლესი ხარისხი პრემიუმ შეფასებას იმსახურებს. გაითვალისწინეთ, რომ Apple-ის ბოლო 12-თვიანი თავისუფალი ფულადი ნაკადები $102 მილიარდის ტოლია. გარდა ამისა, კომპანია აქციონერებს მცირე, მაგრამ მზარდ დივიდენდებს უხდის და აქციების გამოსყიდვის კამპანიასაც აწარმოებს. ბოლო 5 წლის განმავლობაში Apple-ის აქციების რაოდენობა 22%-ით შემცირდა.
Netflix
ამავდროულად, Netflix-ის აქციების P/E კოეფიციენტი 32-ის ტოლია. ეს მაჩვენებელი წლის დასაწყისში 53 იყო. მიუხედავად იმისა, რომ ინვესტორები კომპანიის შემოსავლების ზრდის შენელებით შეშფოთებულები იყვნენ, სტრიმინგ-სერვისების კომპანიის აქციები კვლავ მზარდი პოტენციალისაა. მეოთხე კვარტლის შემოსავალი, წინა წლის იმავე პერიოდთან შედარებით, 16%-ით გაიზარდა.
გარდა ამისა, მენეჯმენტი მოელის, რომ კომპანიის საოპერაციო მარჟა გრძელვადიან პერსპექტივაში ზრდას განაგრძობს, თუმცა გარკვეული წლიური არასტაბილურობით. Netflix-ის მმართველმა გუნდმა, კომპანიის აქციონერებისთვის განკუთვნილ მეოთხე კვარტლის წერილში, განაცხადა, რომ Netflix-ის მიზანი – რამდენიმე წლის განმავლობაში, საოპერაციო მარჟა წელიწადში საშუალოდ 3 პროცენტული პუნქტით გაზარდოს – უცვლელია.
2022 წლის პირველ კვარტალში შენელებაზე მენეჯმენტის მითითებამ და 2021 წელთან შედარებით, კომპანიის საოპერაციო მარჟის ზრდის დროებითმა შეფერხებამ, შესაძლოა, ზოგიერთი ინვესტორი შეაშფოთოს. თუმცა ეს ასევე არის აქციების ფასების შემცირების მიზეზი და გრძელვადიან პერსპექტივაზე ორიენტირებული მომთმენი ინვესტორებისთვის კარგი ყიდვის შესაძლებლობა.
აღსანიშნავია ისიც, რომ Netflix-ს ნებისმიერ დროს შეუძლია თავისი ბიზნესი შემოსავლის ახალი მასიური ნაკადისთვის – ციფრული რეკლამირებისთვის გახსნას. კომპანია ახლა მხოლოდ გამოწერების გეგმებზეა ორიენტირებული, მაგრამ ყოველთვის შესაძლებელია, რომ მენეჯმენტმა კურსი შეცვალოს და რეკლამირების კუთხით არსებითი, ახალი ბიზნეს შესაძლებლობა გახსნას.
არცერთი ინვესტიცია არ არის ურისკო, ბაზრის ამ ორი ლიდერის ჩათვლით. მაგრამ ბოლოდროინდელმა მასიურმა გაყიდვებმა, რა თქმა უნდა, გაზარდა პოტენციურად მომგებიანი გრძელვადიანი ანაზღაურების შანსები ინვესტორებისთვის, რომლებიც დღეს ამ კომპანიების აქციებს ყიდულობენ.
