საფონდო ბირჟამ გუშინ აღდგენა სოლიდური მოგებით გააგრძელა, რაც იმაზე მიუთითებს, რომ, სავარაუდოდ, ინვესტორებმა გადალახეს ყველა გაურკვევლობა, რომელიც ახლახან უოლ სტრიტზე შეიქმნა.
გუშინ, აღმოსავლეთის დროით 13:30 საათის მდგომარეობით, Dow Jones Industrial Average 260 პუნქტით, 34,831-მდე გაიზარდა. S&P 500-მა 44 პუნქტით 4,333-მდე მოიმატა, ხოლო Nasdaq-მა – 220 პუნქტით 14,058-მდე.
რამდენიმე აქცია გამოირჩეოდა იმით, რომ სხვადასხვა პერსპექტივიდან ინვესტორების ახალი ენთუზიაზმის ნიშნებს წარმოაჩენდა. Alibaba Group Holding-ის აქციების ფასი მკვეთრად გაიზარდა, რაც ჩინური აქციების მიმართ განახლებულ ინტერესზე მიგვანიშნებს. ამავდროულად, GameStop-მა უზარმაზარი წინსვლის შედეგები დააფიქსირა. მოდით უფრო დეტალურად განვიხილოთ ამ ორი კომპანიის შედეგები.
Alibaba აქციების გამოსყიდვის პროგრამის ზომას ზრდის
Alibaba Group-ის აქციების ფასი, გუშინ ნაშუადღევს 12%-ზე მეტით გაიზარდა. კომპანიამ გამოაცხადა, რომ გაზრდის აქციების გამოსყიდვის პროგრამის ზომას. ადრე, ტექნოლოგიურმა კომპანიამ $15 მილიარდის ღირებულების აქციების გამოსყიდვის ნება გასცა, მაგრამ ახლა ეს გეგმა $25 მილიარდამდე გაიზარდა. Alibaba-მ აქციების გამოსყიდვა 2020 წლის დეკემბერში $10 მილიარდით დაიწყო.
თუმცა, Alibaba-ს აქციების გამოსყიდვის კუთხით განხორციელებულ წინა მოქმედებებს, ამ მომენტამდე მისი აქციების ფასის შემცირებისთვის ხელი არ შეუშლია. Alibaba-ს უახლესმა ფინანსურმა შედეგებმა აჩვენა, რომ კომპანიამ 2021 წლის მეოთხე კვარტალში 10.1 მილიონი აქციის გამოსყიდვაზე $1.4 მილიარდი დახარჯა. მაგრამ ამის შემდეგ, აქციების ფასი, სანამ ისევ აღდგებოდა, თითქმის განახევრდა. ახლაც კი, აქციების ფასი 10%-20%-ით დაბალია იმ საშუალო ფასზე, რომელიც Alibaba-მ ბოლო კვარტალში განხორციელებული გამოსყიდვისას გადაიხადა.
ამერიკელი ინვესტორები კვლავ შეშფოთებულნი არიან იმის გამო, გააგრძელებს თუ არა ჩინეთის მთავრობა Alibaba-ზე და სხვა მსხვილ ტექნოლოგიურ კომპანიებზე მარეგულირებელი ზეწოლის განხორციელებას.
თამაშში გამარჯვება
ამასობაში GameStop-ის აქციების ფასი 30%-ით გაიზარდა. 2020 წლის ბოლოს წარმატების შემდეგ, აქციების ფასი ყველაზე დაბალ დონემდე დაეცა, მაგრამ GameStop-მა, როგორც ჩანს, მოახერხა ინვესტორების ყურადღების კომპანიის პერსპექტიულ მომავალზე გამახვილება.
გასულ კვირას, კომპანიის მოგება მყისიერად არ გამოსწორებულა, მაგრამ ინვესტორები, სავარაუდოდ, უკან იხედებიან და იმედის მიზეზებს ფინანსურ მაჩვენებლებში პოულობენ. გაყიდვები წინა წლის კვარტალთან შედარებით 6%-ით გაიზარდა და წლიდან წლამდე 12 თვის განმავლობაში კი – 18%-ით. მიუხედავად იმისა, რომ წინა წელთან შედარებით კორექტირებული ზარალი გაიზარდა, აქციონერები ახლა უფრო მეტ ყურადღებას ზედა ხაზის (მითითება კომპანიის მიერ წარდგენილ მთლიან მაჩვენებლებზე, როგორიც არის გაყიდვები ან შემოსავალი) ზრდის პოტენციალზე ამახვილებენ.
ერთი რამ, რამაც შეიძლება გარკვეული აღფრთოვანება გამოიწვიოს, არის GameStop-ის გეგმა, შექმნას NFT ბაზარი.
საცალო ინვესტორებმა, საწყის ფაზაში, GameStop-ის აქციების ფასის ზრდას ხელი შეუწყვეს და, როგორც ჩანს, ისინი აქციების ფასის ნიშნულის უკანასკნელი მოძრაობის უკანაც დგანან. ეს ინვესტორები შეიძლება მერყევები იყვნენ, მაგრამ ზოგიერთი GameStop-სთვის რეალურ პოტენციალს და ნამდვილ ჰოლივუდურ დასასრულს ხედავს.
