ახლა, როდესაც კოვიდ-19-ის საწინააღმდეგო ვაქცინაცია მილიარდობით ადამიანს ჩაუტარდა და სოციალური დისტანცირება უკვე ნაკლები საზრუნავია, ფიზიკურ მაღაზიებში მომხმარებლების რაოდენობა სულ უფრო იზრდება. ზოგიერთმა ინვესტორმა შეიძლება ჩათვალოს, რომ ეს ფაქტი Amazon-ის აქციებისთვის ზარალის მომტანია.
მიუხედავად ამისა, გრძელვადიან პერსპექტივაზე ორიენტირებული ინვესტორებისთვის ამაზონს ორი მომგებიანი მიმართულება აქვს: ვებ სერვისების სეგმენტი (AWS) და ძლიერი სარეკლამო ბიზნესი.
- Amazon Web Services
პირველ კვარტალში Amazon-ის მთლიანი შემოსავალი, წინა წელთან შედარებით, 8%-ით გაიზარდა. იმავდროულად, AWS-დან მიღებულმა შემოსავალმა 37%-ით მოიმატა. წინა წელს ამ მიმართულების შემოსავალი 32%-ით გაიზარდა. ტექნოლოგიური გიგანტი ქლაუდზე დაფუძნებულ სერვისებში თავისი წამყვანი პოზიციით სარგებლობს, რადგან ბიზნესი შენობებს გარეთ მეტი ციფრული ინფრასტრუქტურის გადატანას ცდილობს.
ამაზონმა პირველ კვარტალში ვებ სერვისების სეგმენტიდან $18.4 მილიარდი გამოიმუშავა. უფრო მნიშვნელოვანი კი ისაა, რომ კომპანიის საოპერაციო შემოსავალი $6.5 მილიარდი იყო. უაღრესად მომგებიან, სწრაფად მზარდ ბიზნესში დომინანტური პოზიცია ამაზონის ერთ-ერთი უდიდესი უპირატესობაა.
- სარეკლამო ბიზნესი
პირველ კვარტალში Amazon-ის სარეკლამო შემოსავალი, წინა წლის იმავე კვარტალთან შედარებით, 25%-ით გაიზარდა – უფრო სწრაფად, ვიდრე მთლიანი ბიზნესი. გასული ოთხი კვარტლის განმავლობაში რეკლამებიდან კომპანიამ $32.6 მილიარდის მოცულობის შემოსავალი გამოიმუშავა. მაგალითისთვის, 2021 წელს Meta Platforms-ის $118 მილიარდის მოცულობის შემოსავლიდან $114.5 მილიარდი სარეკლამო ბიზნესზე მოვიდა, ხოლო Alphabet-ის 2021 წლის $258 მილიარდის ტოლი შემოსავლიდან $211.6 მილიარდი რეკლამაზე იყო დაფუძნებული.
მართალია, სავარაუდოდ, ამაზონი ამ სივრცეში ზემოთ ნახსენებ ორ ციფრული რეკლამის გიგანტს ლიდერობაში ვერ შეეჯიბრება, მაგრამ ის $763 მილიარდის მოცულობის გლობალური ონლაინ სარეკლამო ბაზრის მნიშვნელოვან წილს იკავებს. ამაზონს 200 მილიონზე მეტი პრაიმ მომხმარებელი ჰყავს და მარკეტოლოგებს სურთ, რომ მყიდველების ამ ძლიერი ბაზის შესყიდვის გადაწყვეტილებებზე იმოქმედონ. Meta-ს და Alphabet-ს, შეიძლება, სხვადასხვა პლატფორმებზე მილიარდობით აქტიური მომხმარებელი ჰყავდეს, მაგრამ შესყიდვები ძირითადად ამ ორი კომპანიის ეკოსისტემის გარეთ ხორციელდება.
სავაჭრო ობიექტმა, რომელიც რეკლამას Meta-ს ან Alphabet-ის პლატფორმაზე ათავსებს, მომხმარებელი ამ სივრციდან საკუთარ ვებსაიტზე უნდა გადაიყვანოს, სადაც მყიდველი შეძენის გადაწყვეტილების მიღებაში უნდა დაარწმუნოს. Amazon-ზე სწორად განთავსებულ დამაჯერებელ რეკლამას კი ამ შედეგის მიღწევა გაცილებით ნაკლები ძალისხმევით შეუძლია. გასაკვირი არ არის, რომ Amazon-მა მარკეტოლოგების მხრიდან კეთილგანწყობა სწრაფად მოიპოვა.
მიუხედავად იმისა, რომ ამაზონის ელექტრონული კომერციის გაყიდვები წინაღობების წინაშე აღმოჩნდა, AWS და სარეკლამო ბიზნესი კომპანიის გრძელვადიან ზრდას უწყობს ხელს.
