ორი აქცია ბრწყინვალე შეფასებებით

ამჟამად ბაზრის მერყეობა მაღალია და რამდენიმე დიდი კომპანიის აქციის ფასები დიდ ძვრებს განიცდის, ეს კი საზრიანი ინვესტორებისთვის მომგებიანი ინვესტირების საშუალებას იძლევა. მიუხედავად იმისა, რომ კომპანიების გრძელვადიანი პერსპექტივები საერთოდ არ შეცვლილა, ზოგიერთი აქციის ფასი 30%-50%-ით დაეცა.

მოდით უფრო ახლოს შევხედოთ 2 პოტენციურ ვარსკვლავურ კომპანიას, რომელთა აქციების ფასები შემცირდა. ეს არის აქციები, რომლებიც ინვესტორებს შეუძლიათ დისკონტით შეიძინონ და გრძელვადიან პერსპექტივაში სარგებელი მიიღონ.

1. Datadog

Datadog ქლაუდ აპლიკაციების მონიტორინგისა და უსაფრთხოების პროგრამული უზრუნველყოფის პროვაიდერია. ის ანალიტიკისა და კიბერუსაფრთხოების ფუნქციებს აერთიანებს და Datadog-ის მომხმარებლებს საკუთარი ტექნოლოგიის უფრო ეფექტურად გამოყენება შეუძლიათ. ერთი შეხედვით, ეს შესანიშნავი დასაწყისია. თუ დავუშვებთ, რომ ამ კომპანიას პროდუქციის ძლიერი ნაკრები აქვს, ისინი შეიძლება ბიზნესისთვის მართლაც ღირებული იყოს. იქიდან გამომდინარე, რომ ეს მაღალი ზრდის ხარისხის მქონე ინდუსტრიაა, არსებობს ფუნდამენტური გაუმჯობესების პოტენციალი.

ყველა მტკიცებულება იმაზე მიუთითებს, რომ Datadog ძლიერი კანდიდატია იმისთვის, რომ შესაძლებლობით ისარგებლოს. Gartner-ის უახლეს Magic Quadrant-ის აპლიკაციის წარმადობის მონიტორინგის ანგარიშში Datadog რეიტინგის ლიდერთა რიგებშია. ეს რეიტინგი პროდუქციის მაღალ ხარისხზე მიუთითებს.

Datadog-ის მომხმარებლები კი კომპანიას თავიანთი საფულეებით „აძლევენ ხმას“. კომპანია არსებულ კლიენტებთან ურთიერთობებს აფართოებს და ასევე უფრო მსხვილ კლიენტებთანაც კარგად მუშაობს. მისი წმინდა შენარჩუნების მაჩვენებელი 130%-ზე მეტია, რაც მომხმარებელთა კმაყოფილების ძლიერი მტკიცებულებაა. კომპანია ახალ მომხმარებლებსაც იზიდავს, რამაც უკანასკნელ კვარტალში შემოსავლების 84%-იანი ზრდა გამოიწვია.

18 000 კომპანიაზე მეტი სარგებლობს Datadog-ის მომსახურებით და ეს მასშტაბი უზარმაზარ უპირატესობას ქმნის იმ პოტენციურ კონკურენტებთან შედარებით, რომლებიც შეიძლება ბაზარზე მომდევნო წლებში შემოვიდნენ. ამასთან, უკვე კარგად ცნობილი პროდუქტების კომპლექტს ახალ შესაძლებლობებს ამატებს. რამდენადაც თავისი მომხმარებლების ყოველდღიურ ფუნქციებში ფესვებს ღრმად იდგამს, ის მომხმარებლისთვის სხვა, კონკურენტ კომპანიაზე გადართვის ხარჯებს ზრდის და, შესაბამისად, კონკურენციის წინააღმდეგ მნიშვნელოვან ბარიერს ქმნის.

მიუხედავად იმისა, რომ 2021 წლის ყველაზე მაღალი მაჩვენებლიდან 23.6%-ით დაეცა, აქციების ფასი მაინც გარკვეულწილად ძვირია. მისი ფასი/გაყიდვების (P/S) კოეფიციენტი არის 45, ხოლო ფორვარდული ფასი/შემოსავლების (P/E) თანაფარდობა დაახლოებით 294. როგორც წესი, დიდი პერსპექტივის მქონე ხარისხიანი მზარდი პოტენციალის აქციები ძვირია.

ცხადია, ეს ინვესტორებისთვის რისკებს ქმნის. თუ Datadog მომდევნო 5 წლის განმავლობაში შეფერხდება ან გაუთვალისწინებელ დაბრკოლებებს წააწყდება, მაშინ ინვესტორებს შეუძლიათ შემდგომ არასტაბილურობას ელოდონ. ასევე ისინი ამ კომპანიის აქციების მალევე პრემიით გაყიდვას უნდა ელოდნენ. Datadog-ის აქციები შეიძლება ძვირი იყოს, მაგრამ თუ კომპანია ასე გააგრძელებს ზრდას, მას შეუძლია ინვესტორებს უზარმაზარი შემოსავლები მოუტანოს.

2. CrowdStrike

CrowdStrike Holdings არის კიბერუსაფრთხოების კომპანია, რომელიც საბოლოო წერტილის დაცვაზეა ორინტირებული. მისი პროდუქტები თანამშრომლების მოწყობილობებს ჰაკერების შემოტევისა და მავნე პროგრამებისაგან იცავს, რაც, თავის მხრივ, ზოგადად ქსელის უსაფრთხოებას უწყობს ხელს. ბოლო წლებში კიბერუსაფრთხოებას დიდი ყურადღება ექცევა. პროგრამული უზრუნველყოფა და დაკავშირებადობა ბიზნეს საქმიანობის თითქმის ყველა ასპექტსა და პირად ცხოვრებას ეხება. როგორც ეს ბოლო წლებში მრავალი გახმაურებული კიბერშეტევის მაგალითზე ვნახეთ, კრიმინალებს ღირებულ მონაცემებზე წვდომის მეტი შესაძლებლობა ექმნებათ.

CrowdStrike ბოლო წერტილის უსაფრთხოებაში ლიდერად ითვლება. Gartner-ის Magic Quadrant-ის ბოლო წერტილის დაცვის პლატფორმების ანგარიშში კომპანია ვარსკვლავურ შეფასებებს იღებს, რაც მას ისეთი „მძიმე არტილერიის“ გვერდით აყენებს, როგორიც არის Microsoft. ამ რეიტინგს ინდუსტრიის სხვა სანდო გამოცემებიც ეხმიანება. ამ ხარისხის წყალობით, CrowdStrike-მა ბაზრის 12% დაიკავა, რაც მას თავისი კონკრეტული კიბერუსაფრთხოების ნიშაში უმსხვილეს გამყიდველად აქცევს.

CrowdStrike-ის ანგარიშის მიხედვით 2021 წლის სრული ფისკალური წლისთვის წმინა შემოსავლის შეკავების მაჩვენებელი არის 125%, წინა წელს ის 124%-ს შეადგენდა.

CrowdStrike-მა 2022 ფისკალური წლის მესამე კვარტალში 1600-ზე მეტი ახალი გამომწერი მომხმარებელი შეიძინა, რაც წლიდან წლამდე 75%-იან ზრდას ნიშნავს. მთლიანობაში გამომწერ მომხმარებელთა რაოდენობა დაახლოებით 15 000-ს აღწევს. ამ ყველაფერმა შემოსავლის 63%-ით, ხოლო გამოწერების 67%-ით ზრდას შეუწყო ხელი. ეს გაფართოება 75%-ზე მეტი სტაბილური მთლიანი მარჟით მიიღწევა. კომპანიამ ბოლო კვარტალში $123 მილიონზე მეტი ფულადი სახსრების თავისუფალი ნაკადი გამოიმუშავა. ეს ყველაფერი მაღალ კონკურენტულ გარემოში შედარებითი სტაბილურობის შესანიშნავი მტკიცებულებაა.

Crowdstrike ტექნოლოგიების მზარდ ინდუსტრიაში ლიდერი კომპანიაა. მისი აქციები იაფი არ არის, მისი P/S კოეფიციენტი არის 28.3, ხოლო P/E – 182. მაგრამ აქციების ფასები თავისი ყველა დროის მაქსიმუმთან შედარებით 41%-ით დაეცა. ის შესაძლოა მომდევნო რამდენიმე თვეში კიდევ უფრო შემცირდეს, ამიტომ ინვესტორებმა პოტენციური გრძელვადიანი აღმავლობისთვის გონივრული შესვლის წერტილი უნდა მოძებნონ.