რა მოხდა?
გუშინ ჯანდაცვის ტექნოლოგიური კომპანიის — Veeva Systems-ის აქციებმა, ანალიტიკოსის უარყოფითი შეფასების შემდეგ, ღირებულების თითქმის 2% დაკარგა. შედარებისთვის, ამ დროის განმავლობაში S&P 500 ინდექსმა 0.34%-ით მოიმატა.
და რა?
გუშინ, სავაჭრო დღის დაწყებამდე, Oppemheimer-ის ანალიტიკოსმა — კენ ვონგმა Veeva-ს აქციებს ყიდვის რეკომენდაცია შეუნარჩუნა, თუმცა სამიზნე ფასი ფასი $25-ით — $225-მდე შეამცირა.
მას ეს კომპანია განსაკუთრებით არ გამოურჩევია. პირიქით, კენმა, ამჟამინდელი ცვალებადი მაკროეკონომიკური გარემოს გათვალისწინებით, შეფასებები აქციების უმეტეს ნაწილზე შეამცირა. როგორც ჯანდაცვის ინდუსტრიისთვის მომხმარებელთან ურთიერთობის მენეჯმენტის (CRM) გადაწყვეტების მიმწოდებელი კომპანია, Veeva-ც სწორედ ასეთი შემცირებების სიაში მოხვდა.
ინვესტორებს ეს ფაქტი აშკარად აწუხებთ. დეკემბერში კომპანიის აქციების ფასი 15%-ით შემცირდა. Veeva-მ გასულ თვეში კვარტალური ანგარიში წარადგინა, შემოსავალმა $552.4 მილიონი შეადგინა (ანალიტიკოსების პროგნოზი — $545.98 მილიონი), ხოლო EPS-მა (მოგება თითო აქციაზე) — $1.13 (პროგნოზი — $1.07). მიუხედავად იმისა, რომ შედეგებმა ანალიტიკოსების მოლოდინებს გადააჭარბა, მენეჯმენტმა მეოთხე (მიმდინარე) კვარტლისთვის სწორხაზოვანი ზრდა ივარაუდა.
ახლა რა?
ასე რომ, შეიძლება ითქვას, ანალიტიკოსის მიერ სამიზნე ფასის შემცირება Veeva-ს შესახებ მიმდინარე ბაზრის განწყობას ასახავს. მაგრამ უნდა გავითვალისწინოთ, რომ კომპანია თავის ნიშაში ძლიერი მოთამაშეა, რომელიც კვლავ იზრდება.
