რა მოხდა?
ნიდერლანდებში დაფუძნებული ნახევარგამტარების კომპანიის —STMicroelectronics-ის ინვესტორებისთვის გასული კვირა ხელსაყრელი იყო. S&P Global Market Intelligence-ის მონაცემების მიხედვით, ბოლო კვარტლის სოლიდური ანგარიშის წყალობით, გასული 5 სავაჭრო დღის განმავლობაში კომპანიის აქციების ფასი 14%-ზე მეტით გაიზარდა.
და რა?
ხუთშაბათს, STMicroelectronics-ის მენეჯმენტმა კომპანიის მეოთხე კვარტლისა და სრული 2022 წლის შედეგები წარადგინა. გასული მეოთხედისთვის კომპანიის შემოსავალმა $4.42 მილიარდი შეადგინა, რაც წლიდან წლამდე 24%-იან ზრდას წარმოადგენს. უფრო შთამბეჭდავი კი ისაა, რომ მოგება 66%-ით გაიზარდა და $1.2 მილიარდს (მოგება თითო აქციაზე (EPS) — $1.32) გადააჭარბა.
ანალიტიკოსები მოელოდნენ, რომ კომპანიის წარმადობა კარგი იქნებოდა, მაგრამ შედეგებმა პროგნოზებს გადააჭარბა. მოლოდინი იყო STMicroelectronics-ის მიერ $4.42 მილიარდის ოდენობით შემოსავლის გამომუშავება, რაც შედეგს დაემთხვა, თუმცა კომპანიის EPS-მა ანალიტიკოსების პროგნოზს — $1.13-ს საგრძნობლად გადააჭარბა.
STMicroelectronics-ის მენეჯმენტმა შემოსავლის გაუმჯობესება ინდუსტრიული და საავტომობილო სეგმენტებისგან მყარ მოთხოვნას მიაწერა.
ახლა რა?
წარსულ შედეგებთან ერთად, მენეჯმენტმა 2023 წლის მიმდინარე პირველი კვარტლის პროგნოზებიც წარმოადგინა. ისინი მოელიან, რომ სამი თვის განმავლობაში კომპანია საშუალოდ $4.2 მილიარდის მოცულობის შემოსავალს გამოიმუშავებს, რაც, მეოთხე კვარტალთან შედარებით, 5%-იან კლებას წარმოადგენს. მენეჯმენტის პროგნოზით, მთლიანი მარჟა 48%-ს მიაღწევს, რაც გასული კვარტლის მაჩვენებელს — 47.5%-ს ოდნავ აღემატება.
კომპანიას სრული 2023 წლის პროგნოზები არ წარმოუდგენია, მაგრამ მენეჯმენტის თქმით, STMicroelectronics კაპიტალდაბანდებებისთვის დაახლოებით $4 მილიარდის დახარჯვას აპირებს.
