თუ სამ თვეზე გათვლილი გადაუდებელი საჭიროების ფონდი გაქვთ, ეს ნიშნავს, რომ ფლობთ საკმარის ფულს სამი თვის განმავლობაში საცხოვრებელი ხარჯების დასაფარად. ეს საკმაოდ კარგია, თუმცა აქ გაჩერება კარგი იდეა არ არის. 6-თვიან პერიოდზე კონცენტრირდება შეიძლება თქვენთვის მოსახერხებელი იყოს და დღეს სწორედ ამ საკითხის შესახებ ვისაუბრებთ.
რატომ შეიძლება 3 თვეზე გათვლილი დანაზოგი საკმარისი არ იყოს?
გადაუდებელი საჭიროების ფონდის არსებობის მიზანია, შეძლოთ ხარჯების დაფარვა სამსახურიდან გათავისუფლების ან სხვა გაუთვალისწინებელი სიტუაციების დადგომის შემთხვევაში.
3 თვეზე გათვლილი სარეზერვო ფონდის შექმნის ლოგიკა არის ის, რომ თუ სამსახურს დაკარგავთ, შესაძლოა 90 დღე დასჭირდეს ღია თავისუფალი პოზიციის მოძიებას, გასაუბრებების გავლას და მოლაპარაკებებს. ამ პერიოდში წარმოქმნილი ხარჯების დასაფარად კი ძალიან მნიშვნელოვანია დანაზოგის არსებობა, რათა საკრედიტო ბარათის გამოყენება არ მოგიწიოთ.
მაგრამ თქვენი სამუშაო სიტუაციიდან გამომდინარე, 3 თვეზე გათვლილი გადაუდებელი საჭიროების ფონდი შეიძლება საკმარისი არ იყოს. თუ, მაგალითად, მაღალი რგოლის მენეჯერის თანამდებობაზე ხართ, შეიძლება სხვა კომპანიაში უფრო დაბალ პოზიციაზე დასაქმება თქვენთვის სასურველი არ იყოს. ამიტომ, შესაძლოა, სასურველი სამსახურის მოძიებას სამ თვეზე მეტი დრო დასჭირდეს.
უფრო მეტიც, შეიძლება სამსახური სწორედ მაშინ დაკარგოთ, როდესაც სხვა გაუთვალისწინებელი დიდი ხარჯების დაფარვა მოგიწევთ. ასე რომ, ასეთ სიტუაციაში თქვენთვის უფრო მოსახერხებელი იქნება, თუ სარეზერვო ფონდში არსებული თანხა 3 თვეზე ხანგრძლივ პერიოდზე იქნება გათვლილი. ამ დამატებითი ფულის არსებობა საშუალებას მოგცემთ, ახალი სამსახური ზედმეტი სტრესის გარეშე მოძებნოთ და თქვენთვის მაქსიმალურად სასურველი ვარიანტი შეარჩიოთ.
გაითვალისწინეთ სიმშვიდის ფასი
ექვსი თვის ხარჯების დასაფარად საკმარისი გადაუდებელი საჭიროების ფონდი უფრო მოსახერხებელია, მაგრამ აქ ერთ-ერთი ყველაზე მნიშვნელოვანი ფაქტორი სიმშვიდეა. თუ სამსახურს დაკარგავთ, ბევრად უკეთესად იგრძნობთ თავს, როდესაც იცით, რომ ვალის აღების გარეშე ნახევარი წლის განმავლობაში თავის გატანას შეძლებთ. სიმშვიდე კი ძალიან ღირებულია.
რა თქმა უნდა, თუ ამჟამად თქვენი დანაზოგი 0 ლარის ტოლია, პირველ რიგში 3-თვიან პერიოდზე უნდა ფოკუსირდეთ, თუმცა ამ მიზნის მიღწევის შემდეგ გაჩერება კარგი იდეა ნამდვილად არ არის.
