რა მოხდა?
Nano-X Imaging-ის (ასევე ცნობილია, როგორც Nanox) აქციების ფასი გუშინ 10%-ზე მეტით გაიზარდა მას შემდეგ, რაც სამედიცინო ვიზუალიზაციის მოწყობილობების კომპანიამ 2023 წლის პირველი კვარტლის ფინანსური შედეგები წარადგინა.
და რა?
Nanox-მა კვარტალური მონაცემები გუშინ, სავაჭრო დღის დაწყებამდე გამოაქვეყნა. კომპანიის კვარტალურმა შემოსავალმა $2.45 მილიონი შეადგინა (ანალიტიკოსების პროგნოზი — $3.4 მილიონი), ხოლო ზარალმა თითო აქციაზე — $0.21 (პროგნოზი — $-0.355). Nanox ძალიან ადრეული ეტაპზე მყოფი კომპანიაა. ამ ეტაპზე შეგვიძლია უფრო ნაკლებად ვისაუბროთ ციფრებზე და მეტად — მენეჯმენტის კომენტარებზე. 1 მაისს Nanox-ის აქციების ფასმა დაიწყო ზრდა მას შემდეგ, რაც აშშ-ის სურსათისა და მედიკამენტების ადმინისტრაციამ (FDA) დაადასტურა კომპანიის რენტგენის მოწყობილობა.
პირველი კვარტლის შედეგებით, Nanox-ის მენეჯმენტმა ინვესტორებს აფრიკაში კომპანიის ბიზნესის შესახებ სიახლეები მიაწოდა. Nanox.ARC მოწყობილობის გაყიდვა განასა და ნიგერიაში უკვე გეგმაში იყო, მაგრამ მენეჯმენტმა განაცხადა, რომ კომპანიამ შეთანხმებას მაროკოს სამეფოსთანაც მიაღწია.
Nanox-მა დაიწყო მუშაობა ადგილობრივ ხელისუფლებებთან სხვადასხვა ქვეყანაში, სადაც აშშ-ის FDA-ის დასტური საჭირო არ იყო. კომპანიის ბიზნეს მოდელი ასეთია: Nanox სამედიცინო დაწესებულებებში მოწყობილობებს უფასოდ ათავსებს და შემოსავალს სკანირების საფუძველზე გამოიმუშავებს. მენეჯმენტის თქმით, კომპანიის სისტემები უკვე ფუნქციონირებს განაში და მალე ნიგერიაშიც იქნება ხელმისაწვდომი.
ის, რაც ოდესღაც Nanox-ისთვის შორეული ხედვა იყო, აქციონერებისთვის უფრო ხელშესახები რეალობა ხდება. შედეგად, როგორც ჩანს, ინვესტორების ნდობაც ძლიერდება და სწორედ ამიტომ გაიზარდა გუშინ Nanox-ის აქციების ფასი.
ახლა რა?
ახლა, როდესაც Nanox-ს FDA-სგან თანხმობა აქვს, კომპანია ფლორიდაში დემო ცენტრს ხნის. თუმცა Nanox-ს იმპორტის ლიცენზია სჭირდება, რომლის აღების პროცესშია. კომპანიის მენეჯმენტს ასევე დიდი სამუშაოს გაწევა მოუწევს Nanox.ARC მოწყობილობების მასობრივი წარმოებისთვის მიწოდების ჯაჭვის შესაქმნელად.
გარდა ამისა, Nanox-ის მიერ მაროკოში დადებული ხელშეკრულება სამი წლის განმავლობაში 270 მოწყობილობის მიწოდებას ისახავს მიზნად. თუმცა ეს პროცესი ვერ დაიწყება, სანამ ყველა საჭირო დოკუმენტაცია არ მომზადდება.
