რა მოხდა?
ახალი წლის 20%-იანი მატებით დაწყების შემდეგ, ძვირადღირებული ელექტრომობილების მწარმოებელი კომპანიის — Lucid Group-ის აქციების ფასი გუშინ თითქმის 9%-ით შემცირდა.
და რა?
ეს კლება არ იყო კომპანიის ფინანსური სიახლით გამოწვეული, რადგან კომპანია 2022 წლის მეოთხე კვარტლის ანგარიშს 22 თებერვალს წარადგენს. ვარდნა კონკურენტთან დაკავშირებულმა სიახლემ განაპირობა. ელექტრომობილების ინდუსტრიის ლიდერის — Tesla-ს მენეჯმენტის უახლესმა განცხადებამ ფასების შემცირების შესახებ, კონკურენტი კომპანიების ფასებზეც იმოქმედა.
ახლა რა?
Barron-ის მოხსენება ხაზს უსვამს Tesla-ს დომინანტურ პოზიციას სექტორში და ასახავს კომპანიის მანქანებზე მოთხოვნის მატების ტენდენციას მას შემდეგ, რაც Tesla-მ აშშ-ში ფასები შეამცირა. Lucid, რომელსაც Tesla-ს ყოფილი უფროსი ინჟინერი — პიტერ რაულინსონი ხელმძღვანელობს, მომხმარებლებს სთავაზობს ძვირადღირებულ ელექტრო სედანებს, რომლებიც კონკურენციას უწევს Tesla-ს S მოდელს. მის შექმნაში წვლილი სწორედ პიტერმა შეიტანა.
Tesla-ს ფასების შემცირება ფოკუსირებული იყო კომპანიის Y და 3 მოდელების გაყიდვების გაზრდაზე. ფასების ვარდნამდე ეს ავტომობილები, შესაბამისად, დაახლოებით $70,000-ად და $63,000-ად იყიდებოდა. Tesla-მ ახლა ამ მოდელების ფასები უფრო ხელმისაწვდომი გახადა, რამაც შეიძლება Lucid-ის სამომხმარებლო ბაზარი შეზღუდოს.
თუმცა Lucid ძირითადად ბევრად უფრო მდიდარ მომხმარებლებს ემსახურება. მისი საბაზისო მოდელის ფასი თითქმის $90,000-დან იწყება. ასე რომ, Tesla-მ, ფასების შემცირებით, შეიძლება ბაზრის მეტი წილი მოიპოვოს, მაგრამ, სავარაუდოდ, ის Lucid-ის ძირითადი მომხმარებელთა ბაზიდან მომხმარებლებს ვერ გადაიბირებს. მნიშვნელოვანია, რომ Lucid-ის მენეჯმენტმა, მომდევნო თვის ბოლოს კვარტალური ანგარიშის გამოქვეყნებისას, 2023 წლისთვის წარმოების მოცულობის ძლიერი ზრდის პროგნოზები წარადგინოს, წინააღმდეგ შემთხვევაში, შესაძლოა, კომპანიის აქციების ფასი ახალ მინიმუმამდე დაეცეს.
