რა მოხდა?
გუშინ Fluence Energy-ის აქციების ფასი თითქმის 10%-ით გაიზარდა. ზრდის მიზეზი ენერგიის შემნახველი კომპანიის მიერ კვარტალური ანგარიშისა და განახლებული პერსპექტივის წარდგენა იყო.
და რა?
Fluence-ის კვარტალური შემოსავალი წლიდან წლამდე 78%-ით — $310.5 მილიონამდე გაიზარდა. ამან ხელი შეუწყო კომპანიის წმინდა ზარალის შემცირებას $111.5 მილიონიდან $37.2 მილიონამდე.
მიუხედავად იმისა, რომ კომპანიამ დააფიქსირა ზარალი თითო აქციაზე — $0.21, ეს მაჩვენებელი ერთი წლის წინანდელ -$0.53-თან შედარებით გაუმჯობესდა და ანალიტიკოსების პროგნოზებსაც გადააჭარბა $0.08-ით.
აღმასრულებელმა დირექტორმა — ჯულიან ნებრედამ განაცხადა: „ჩვენ წარმატებული კვარტალი გვქონდა. ამას ხაზს უსვამს ჩვენი ძლიერი შეკვეთები, რომლებსაც მთლიანი მარჟის გაუმჯობესება ემატება. ჩვენს გადაწყვეტებზე მზარდი მოთხოვნის ტენდენცია გრძელდება და ჩვენს მიწოდების ჯაჭვში ხილვადობაც გავაუმჯობესეთ, რაც გვაძლევს საჭირო თავდაჯერებას, გავზარდოთ პროგნოზები 2023 წლისთვის“.
Fluence Energy-ს მენეჯმენტი ახლა პროგნოზირებს, რომ მიმდინარე წელს კომპანიის შემოსავალი $1.6-$1.8 მილიარდს მიაღწევს, ხოლო მთლიანი მოგება $85-$115 მილიონს შეადგენს.
ახლა რა?
ჯულიან ნებრედამ ასევე თქვა: „ვხედავთ შეერთებულ შტატებში, ინფლაციის შემცირების აქტის შედეგად, ჩვენი მომხმარებლების მზარდი აქტივობის ადრეულ ნიშნებს, რომლებიც, ჩვენი აზრით, მატერიალიზებას წლის მეორე ნახევარში დაიწყებს“.
მოთხოვნის ეს დამატებითი კატალიზატორი და გაუმჯობესებული მიწოდების ჯაჭვი მატებს მენეჯმენტს თავდაჯერებას, რომ კომპანიას შეუძლია ფისკალურ 2024 წელს დადებითი კორექტირებული EBITDA (მოგება ვალის მომსახურების ხარჯის, გადასახადების, ცვეთისა და ამორტიზაციის გამოკლებამდე) გამოიმუშაოს.
