ალბათ უკვე იცით, რომ Nvidia 2023 წლის გამორჩეული აქცია იყო. ჩიპების მწარმოებელი გიგანტი ტრადიციულად ცნობილია თავისი გრაფიკული დამუშავების ერთეულებით (GPU), რომლებიც აძლიერებს ინდუსტრიებს, როგორიცაა ვიდეო თამაშები, კრიპტო და ავტონომიური მანქანები. ამასთან, Nvidia აშკარა ლიდერია ხელოვნური ინტელექტის (AI) ჩიპების მიმართულებით, რადგან მისი ტექნოლოგია ასევე შესანიშნავად შეეფერება სწავლის მოდელების ამუშავებას, რაც ChatGPT-ის მსგავს პროგრამებს ესაჭიროება.
შედეგად, Nvidia-მ მთელი გასული წლის განმავლობაში მკვეთრი ზრდა დააფიქსირა და გასაკვირი არ არის, რომ კომპანიის აქციებმა ახალი მწვერვალების დაპყრობა შეძლო. S&P Global Market Intelligence-ის მონაცემებით, Nvidia-ს აქციებმა 2023 წელი 239%-იანი ზრდით დაასრულა. ამ გაუმჯობესების შედეგად კომპანიამ S&P 500 ინდექსში პირველი ადგილი დაიკავა. როგორც ქვემოთ ნაჩვენებ სქემაში ხედავთ, ზრდის უმეტესი ნაწილი წლის პირველ ნახევარში დაფიქსირდა, როდესაც გენერაციული ხელოვნური ინტელექტის მიმართ ინტერესმა პიკს მიაღწია.
როგორ გააოცა Nvidia-მ საფონდო ბირჟა 2023 წელს?
სქემაზე ჩანს, რომ Nvidia-ს აქციების ფასი გასული წლის პირველ კვარტალში სტაბილურად იზრდებოდა, რადგან ChatGPT-ით გამოწვეულმა ბუმმა და ახალმა გენერაციულმა AI ტექნოლოგიებმა ხელოვნურ ინტელექტთან დაკავშირებულ ტექნოლოგიურ აქციებზე დადებითად იმოქმედა.
თუმცა, მაისში Nvidia-ს პირველი კვარტლის ფინანსურ ანგარიშამდე, ინვესტორებისთვის ცხადი არ იყო ChatGPT-ის გამოშვებით გამოწვეული მოთხოვნის ზრდა კომპანიის ჩიპებზე.
2023 წლის პირველ კვარტალში Nvidia-ს ფინანსურმა შედეგებმაც და მეორე კვარტლის პროგნოზებმაც უოლ სტრიტის ანალიტიკოსების მოლოდინებს გადააჭარბა. ჩიპების მწარმოებლის მენეჯმენტი ვარაუდობდა, რომ კომპანია მომდევნო კვარტალში $11 მილიარდის ოდენობით შემოსავალს დააფიქსირებდა, რაც ბევრად აღემატებოდა ანალიტიკოსების საშუალო პროგნოზს — $7.2 მილიარდს. შედეგად, 25 მაისს Nvidia-ს აქციების ფასი 24%-ით გაიზარდა, კომპანიას კი მომდევნო ორი კვარტალური ანგარიშით უოლ სტრიტის იმედები არ გაუცრუებია, რადგან მისი იმპულსი კიდევ უფრო გაიზარდა.
მეორე კვარტალში შემოსავალმა წლიდან წლამდე 101%-ით მოიმატა და $13.5 მილიარდს მიაღწია, რაც Nvidia-ს მენეჯმენტის პროგნოზებს ბევრად აღემატებოდა. გარდა ამისა, წმინდა მოგება წარმოუდგენლად, 800%-ზე მეტით გაიზარდა — $6.2 მილიარდამდე.
მესამე კვარტალში ჩიპების მწარმოებლის ფინანსური შედეგები კიდევ უფრო შთამბეჭდავი იყო, რადგან შემოსავალი წლიდან წლამდე სამჯერ გაიზარდა და $18.1 მილიარდი შეადგინა, ხოლო მოგებამ 13-ჯერ მოიმატა და $9.2 მილიარდს მიაღწია.
გარდა ამისა, აღსანიშნავია, რომ გასული წლის განმავლობაში Nvidia-მ ინვესტორები მრავალი ახალი პროდუქტით და პარტნიორობის შესახებ განცხადებებით გაახარა. მისი აქციების ფასი კი განაგრძობდა ზრდას მაშინაც კი, როდესაც სხვა დიდმა ტექნოლოგიურმა და AI აქციებმა წინსვლა შეწყვიტა.
Nvidia-ს აქციების ამჟამინდელი ფასი დაახლოებით $544.00-ს შეადგენს. კომპანიას ამ ეტაპზე 36 ანალიტიკოსი აფასებს. საშუალო სამიზნე ფასი $662.39-ს შეადგენს, მაქსიმალური პროგნოზი — $1,100.00-ს, ხოლო მინიმალური — $560.00-ს. საშუალო სამიზნე ფასი Nvidia-ს აქციების ამჟამინდელი ფასიდან დაახლოებით 22%-იან ზრდას გულისხმობს. კომპანიის აქციებს 36 ანალიტიკოსიდან 32-მა მიანიჭა ყიდვის რეკომენდაცია, 4-მა — ნეიტრალური რეიტინგი და არცერთმა — გაყიდვის რეკომენდაცია.
