რა მოხდა?
გუშინ, ანალიტიკოსების დადებითი შეფასების შემდეგ, ChargePoint-ის აქციების ფასი 14%-ზე მეტით გაიზარდა. კომპანია ჩრდილოეთ ამერიკასა და ევროპაში ელექტრომობილების (EV) დამუხტვის სადგურების მსოფლიოში უდიდეს ქსელს ფლობს. შედარებისთვის, დროის ამ მონაკვეთში S&P 500 თითქმის უცვლელი იყო.
და რა?
Bank of America-ს ანალიტიკოსმა — ალექს ვრაბელმა ChargePoint-ის აქციების ნეიტრალური რეიტინგი ყიდვის რეკომენდაციით შეცვალა, თუმცა, მიუხედავად ამისა, სამიზნე ფასი $15.50-დან $14-მდე შეამცირა. ეს მაჩვენებელი პარასკევის დახურვის ფასთან — $8.25-თან შედარებით 70%-იან ზრდას გულისხმობს.
გარდა ამისა, მიმდინარე თვის დასაწყისში B. Riley-ის ანალიტიკოსმა — კრისტოფერ საუთერმა ChargePoint-ის აქციებს ყიდვის რეკომენდაცია შეუნარჩუნა.
უოლ სტრიტის ანალიტიკოსების პოზიტიური შეფასებებით შთაგონებული ინვესტორები, შესაძლოა, მოტივირებულნი იყვნენ იმ სპეკულაციითაც, რომ კომპანია ძლიერ კვარტალურ ანგარიშს წარადგენს. ChargePoint 2023 წლის პირველი კვარტლის ფინანსურ ანგარიშს ხვალ, სავაჭრო დღის დასრულების შემდეგ, გამოაქვეყნებს.
ახლა რა?
ერთის მხრივ, გასაკვირი არ არის, რომ ინვესტორებმა გუშინ თავიანთ საინვესტიციო პორტფელებს დაამატეს ChargePoint-ის აქციები მას შემდეგ, რაც Bank of America-ს ანალიტიკოსმა აქციების მიმართ დადებითი დამოკიდებულება გამოავლინა. თუმცა, ასევე აღსანიშნავია, რომ ChargePoint-მა 2022 წელს არაერთხელ წარადგინა არასახარბიელო კვარტალური შედეგები.
მიუხედავად იმისა, რომ უფრო რისკიანი ინვესტორებისთვის შეიძლება კომფორტული იყოს კვარტალური ანგარიშის წარდგენამდე ამ კომპანიის აქციების შეძენა, უფრო კონსერვატიული ინვესტორები, ალბათ, შედეგებს დაელოდებიან და დააკვირდებიან, რამდენად წამახალისებელი იქნება ChargePoint-ის ფინანსური მაჩვენებლები.
