რა მოხდა?
გუშინ საფონდო ბირჟაზე Apple განსაკუთრებით ბრწყინვალე არ ყოფილა. ტექნოლოგიური გიგანტის აქციების ფასი 1.4%-ით შემცირდა, რაც უფრო მკვეთრია, ვიდრე S&P 500 ინდექსის 0.4%-იანი კლება. ერთ-ერთი კატალიზატორი იყო ანალიტიკოსის ახალი მოხსენება, რომელიც, მთლიანობაში დადებითი იყო, მაგრამ ხაზს უსვამდა ზოგიერთ გამოწვევას, რომელსაც კომპანია აწყდება.
და რა?
სამშაბათ დილით JPMorgan Chase-ის ანალიტიკოსმა — სამიკ ჩატერჯიმ აღნიშნა, რომ მიწოდების პრობლემები, რომლებიც Apple-ის უახლესი iPhone მოდელის წარმოებასა და დისტრიბუციაზე ზემოქმედებდა, შემსუბუქდა. მან ასევე თქვა, რომ iPhone 14-ისთვის მრავალი აუცილებელი კომპონენტის მიწოდება უფრო სწრაფად განხორციელდა.
ანალიტიკოსმა ასევე ხაზი გაუსვა შემდეგ ინფორმაციას: გლობალურად iPhone 14-ისა და iPhone 14 Plus-ის შეკვეთის რეალიზაციის დრო 4 დღემდე (ერთი კვირის წინ — 1 დღე) გაიზარდა. ეს მაჩვენებელი პროგნოზებს შეესაბამება. Pro და Pro Max მოდელების შემთხვევაში კი ამ მაჩვენებელმა 22 დღეს (წინა მაჩვენებელი — 25 დღე) მიაღწია.
ეს მეტრიკა ჩინეთის მასიურ ბაზარზეც გაუმჯობესდა. ევროპის ძირითად ბაზრებზე, როგორიცაა დიდი ბრიტანეთი და გერმანია, ის სტაბილურობას ინარჩუნებს.
ახლა რა?
მიუხედავად იმისა, რომ ზემოთ აღნიშნული ინფორმაცია Apple-ის ინვესტორებისთვის გამამხნევებელია, ის ასევე ასახავს არასასიამოვნო რეალობას — ტექნოლოგიური გიგანტის ზომისა და სიმძლავრის მიუხედავად ის არ არის დაცული მიწოდების ჯაჭვის იმ სირთულეებისგან, რომლებთანაც გამკლავება მსოფლიოს ბოლო თვეებში უწევს. სანამ Apple მთლიანად არ გადალახავს ამ წინაღობას, კომპანია ვერ შეძლებს იმ ზრდის დაფიქსირებას, რომელსაც ინვესტორები მისგან მოელიან.
