რა მოხდა?
S&P Global Market Intelligence-ის მონაცემების თანახმად, გასული კვირის განმავლობაში Analog Devices-ის აქციების ფასი 7%-ზე მეტით შემცირდა. ვარდნის მიზეზი იყო კომპანიის კვარტალური ანგარიში, რომელიც უოლ სტრიტმა ნეგატიურად მიიღო. შედარებისთვის, დროის იმავე მონაკვეთში, S&P 500 0.32%-ით გაიზარდა.
მიუხედავად კლებისა, ამ მომენტისათვის Analog Device-ის აქციების ღირებულება წლის დასაწყისიდან 8%-ზე მეტით არის მომატებული.
და რა?
გასულ ოთხშაბათს კომპანიის მენეჯმენტმა განაცხადა, რომ 2023 წლის დასაწყისისთვის გაყიდვების ტენდენციები ძლიერი დარჩა. პირველ კვარტალში შემოსავალი ფაქტობრივად 20%-ით გაიზარდა და $3.26 მილიარდი შეადგინა (ანალიტიკოსების პროგნოზი — $3.21 მილიარდი), ხოლო EPS-მა (მოგება თითო აქციაზე) 29%-ით — $2.83-მდე მოიმატა (პროგნოზი — $2.75). ამასთან, Analog Devices-მა საოპერაციო მარჟა წლიდან წლამდე 31%-დან 35%-მდე გაზარდა.
„კომპანიამ მეორე კვარტალში კარგად მუშაობა განაგრძო ზედიზედ მე-13 კვარტალში შემოსავლების ზრდით და რეკორდული მოგების დაფიქსირებით“ — განაცხადა აღმასრულებელმა დირექტორმა — ვინსენტ როშმა პრესრელიზში.
მიუხედავად ამისა, როგორც ჩანს, ინვესტორებს უფრო მეტად აწუხებთ ჩიპების მწარმოებლის მოკლევადიანი პერსპექტივები, რაც მომავალში გაყიდვების უფრო მკაცრ გარემოს გულისხმობს.
ახლა რა?
მენეჯმენტმა განაცხადა, ფისკალური 2023 წლის მეორე ნახევარში, სუსტი ეკონომიკური ზრდისა და მიწოდების უფრო ნორმალიზებული გარემოდან გამომდინარე, სავარაუდოდ, გაყიდვების ზრდა შემცირდება. შემოსავალი მიმდინარე კვარტალში დაახლოებით $3.1 მილიარდს შეადგენს, რაც წინა წლის იმავე კვარტალთან შედარებით დაახლოებით უცვლელი შედეგია. ფისკალური 2023 წლისთვის უოლ სტრიტი პროგნოზირებს შემოსავლის 5%-იან ზრდას, რაც ბევრად ჩამოუვარდება გასულ წელს დაფიქსირებულ 64%-იან მატებას.
