გუშინ საფონდო ბირჟაზე გავრცელდა მნიშვნელოვანი სიახლეები, რომლებმაც ცნობილი კომპანიების აქციების ფასებზე მნიშვნელოვანი გავლენა იქონია. დღეს შემოგთავაზებთ საინტერესო დეტალებს ისეთი კომპანიების შესახებ, როგორებიც არის On Holding, Sea Limited, Paysafe და Discover Financial Services.
On Holding
გუშინ, ბაზრის გახსნამდე, On Holding-მა კვარტალური ანგარიში წარადგინა, სავაჭრო დღის განმავლობაში კი ფეხსაცმელების მწარმოებელი კომპანიის აქციების ფასი დაახლოებით 14%-ით შემცირდა. წლის დასაწყისიდან ეს მაჩვენებელი 74%-ზე მეტით არის გაუმჯობესებული.
შვეიცარიული კომპანიის შემოსავალი წლიდან წლამდე 52.3%-ით — $506.7 მილიონამდე გაიზარდა და ეს მაჩვენებელი აღემატება ანალიტიკოსების პროგნოზს — $477.5 მილიონს.
On Holding-ის პირდაპირი მომხმარებლების არხმა სიმტკიცე შეინარჩუნა. ამ მიმართულებით შემოსავალი 54.7%-ით გაიზარდა და გაყიდვების თითქმის 40% შეადგინა, ხოლო მთლიანი მარჟა 55.1%-დან 59.5%-მდე გაუმჯობესდა.
კორექტირებული EBITDA (მოგება ვალის მომსახურების ხარჯების, გადასახადების, ცვეთისა და ამორტიზაციის გამოკლებამდე) თითქმის გაორმაგდა $35.8 მილიონიდან $71.5 მილიონამდე.
თუმცა, არარეალიზებული სავალუტო ზარალის შედეგად კორექტირებული EPS (მოგება თითო აქციაზე) $0.14-დან $0.04-მდე შემცირდა.
აღმასრულებელმა დირექტორმა მარტინ ჰოფმანმა თქვა: „On-ის ბრენდის სიძლიერე და მუდმივი განსაკუთრებული ზრდა თვალსაჩინოა. აღფრთოვანებულნი ვართ, რომ განვაგრძობთ წინსვლას სანდოობისა და ბაზრის წილის მოპოვების მიმართულებით“.
რაც შეეხება მომავალს, On Holding-ის მენეჯმენტი პროგნოზირებს, რომ მიმდინარე წლის განმავლობაში შემოსავალი დაახლოებით $2.01 მილიარდს შეადგენს, რაც აღემატება წინა პროგნოზს — მინიმუმ $1.99 მილიარდს. ეს გულისხმობს 44%-იან ზრდას მთელი წლის განმავლობაში და 30%-იანი ზრდის ტემპს წლის მეორე ნახევრისთვის.
On Holding-ის აქციების ამჟამინდელი ფასი დაახლოებით $30.00-ს შეადგენს. კომპანიას ამ ეტაპზე უოლ სტრიტის 13 ანალიტიკოსი აფასებს. საშუალო სამიზნე ფასი $35.98-ს შეადგენს, მაქსიმალური პროგნოზი — $46.00-ს, ხოლო მინიმალური — $19.80-ს. საშუალო სამიზნე ფასი On Holding-ის აქციების ამჟამინდელი ფასიდან დაახლოებით 21%-იან ზრდას წარმოადგენს. კომპანიის აქციებს 13 ანალიტიკოსიდან 9-მ მიანიჭა ნეიტრალური რეიტინგი, 2-მა — გაყიდვის რეკომენდაცია, ხოლო 2-მა — ყიდვის რეკომენდაცია.
Sea Limited
გუშინ, ბაზრის გახსნამდე, Sea Limited-მა კვარტალური ანგარიში წარადგინა, სავაჭრო დღის განმავლობაში კი ელექტრონული კომერციისა და ციფრული გართობის პროვაიდერის აქციების ფასი დაახლოებით 29%-ით შემცირდა. წლის დასაწყისიდან ეს მაჩვენებელი 23%-ზე მეტით არის დაკლებული.
მიუხედავად იმისა, რომ კომპანიამ მომგებიანობის მნიშვნელოვანი გაუმჯობესება აჩვენა, ციფრული გართობის ბიზნესმა სუსტი ფინანსური შედეგები დააფიქსირა, რამაც Sea Limited-ის აქციების წარმადობაზე ნეგატიური ზეგავლენა იქონია.
მენეჯმენტის განცხადებით, კომპანიის პოპულარულმა უფასო მობილურმა თამაშმა — Free Fire-მა კვარტლიდან კვარტლამდე აქტიური და გადამხდელი მომხმარებლის რაოდენობის გაზრდა შეძლო. მიუხედავად ამისა, Sea Limited-მა ვერ მოახერხა ციფრული გასართობი სეგმენტის შემოსავლის ზრდა და ამ მიმართულებით ჯავშნები, გასულ კვარტალთან შედარებით, 4%-ით შემცირდა.
კვარტლის კიდევ ერთი მნიშვნელოვანი მოვლენა იყო Shopee-ის ელექტრონული კომერციის ბიზნესში მარჟების მნიშვნელოვანი გაუმჯობესება. შედეგად Sea-ს წმინდა მოგება $331 მილიონამდე გაიზარდა, გასული წლის იმავე კვარტალში დაფიქსირებულ $931 მილიონის მოცულობის ზარალთან შედარებით. EPS-მა კი $0.54 შეადგინა (ანალიტიკოსების პროგნოზი — $0.66).
Sea Limited-ის შემოსავალი წლიდან წლამდე 5%-ზე მეტით გაიზარდა და $3.1 მილიარდი შეადგინა, თუმცა ანალიტიკოსების პროგნოზს — $3.26 მილიარდს, ეს მაჩვენებელიც ჩამორჩა.
Sea Limited-ის აქციების ამჟამინდელი ფასი დაახლოებით $40.60-ს შეადგენს. კომპანიას ამ ეტაპზე უოლ სტრიტის 14 ანალიტიკოსი აფასებს. საშუალო სამიზნე ფასი $91.11-ს შეადგენს, მაქსიმალური პროგნოზი — $139.00-ს, ხოლო მინიმალური — $50.00-ს. საშუალო სამიზნე ფასი Sea Limited-ის აქციების ამჟამინდელი ფასიდან დაახლოებით 124.5%-იან ზრდას წარმოადგენს. კომპანიის აქციებს 14 ანალიტიკოსიდან 11-მა მიანიჭა ნეიტრალური რეიტინგი, 3-მა — გაყიდვის რეკომენდაცია და არცერთმა — ყიდვის რეკომენდაცია.
Paysafe
გუშინ, ბაზრის გახსნამდე, Paysafe-მა კვარტალური ანგარიში წარადგინა, სავაჭრო დღის განმავლობაში კი ფინტექ სერვისების კომპანიის აქციების ფასი დაახლოებით 24%-ით გაიზარდა. წლის დასაწყისიდან ეს მაჩვენებელი 1.5%-ით არის გაუმჯობესებული.
მეორე კვარტალში Paysafe-ის შემოსავალი წლიდან წლამდე 6.2%-ით გაიზარდა და $402.3 მილიონი შეადგინა (ანალიტიკოსების პროგნოზი — $395.1 მილიონი), ხოლო კორექტირებულმა EPS-მა — $0.56 (პროგნოზი — $0.30). როგორც ვხედავთ, უოლ სტრიტის ანალიტიკოსების მოლოდინებს ორივე მაჩვენებელმა საგრძნობლად გადააჭარბა.
Paysafe-ის პლატფორმაზე განხორციელებული გადახდების მთლიანი მოცულობა 6%-ით — $35.5 მილიარდამდე გაიზარდა. კომპანიის კორექტირებული წმინდა შემოსავალი 7.5%-ით შემცირდა და $34.7 მილიონი შეადგინა.
მეორეს მხრივ, GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით გამოთვლილი წმინდა ზარალი კვარტალში $1.8 მილიონი იყო, რაც ბევრად გასული წლის იმავე კვარტალში დაფიქსირებულ $658.7 მილიონის ოდენობით ზარალზე ბევრად უკეთესი მაჩვენებელია. გარდა ამისა, კორექტირებული EBITDA წლიდან წლამდე 10%-ით — $113 მილიონამდე გაიზარდა.
გარდა იმისა, რომ Paysafe-ის შემოსავალმა და მოგებამ ანალიტიკოსების მოლოდინებს გადააჭარბა, Paysafe-მა წლიური პროგნოზებიც გაზარდა. მენეჯმენტი მანამდე ვარაუდობდა, რომ მიმდინარე წლის განმავლობაში კომპანიის შემოსავალი $1.58-$1.6 მილიარდს შეადგენდა, რაც 5.6%-7%-იან ზრდას გულისხმობდა. მეორე კვარტლის მოსალოდნელზე ძლიერი შედეგებისა და მოთხოვნის გამამხნევებელი იმპულსის შემდეგ, კომპანიაში ახლა გაყიდვების წლიურ 6.5%-7.5%-იან ზრდას პროგნოზირებენ.
Paysafe-ის აქციების ამჟამინდელი ფასი დაახლოებით $15.00-ს შეადგენს. კომპანიას ამ ეტაპზე უოლ სტრიტის 4 ანალიტიკოსი აფასებს. საშუალო სამიზნე ფასი $31.30-ს შეადგენს, მაქსიმალური პროგნოზი — $80.00-ს, ხოლო მინიმალური — $13.70-ს. საშუალო სამიზნე ფასი Paysafe-ის აქციების ამჟამინდელი ფასიდან დაახლოებით 114%-იან ზრდას წარმოადგენს. კომპანიის აქციებს 4 ანალიტიკოსიდან 1-მა მიანიჭა ნეიტრალური რეიტინგი, 1-მა — გაყიდვის რეკომენდაცია და 2-მა — ყიდვის რეკომენდაცია.
Discover Financial Services
კომპანიაში მიმდინარე ცვლილებები შეიძლება რთული იყოს ინვესტორებისთვის, განსაკუთრებით მაშინ, როდესაც საქმე მაღალი რგოლის მენეჯმენტს ეხება. გუშინ ფინანსური სერვისების ამერიკული კომპანიის — Discover Financial Services-ის აქციების ფასი 9%-ზე მეტით შემცირდა მას შემდეგ, რაც ცნობილი გახდა, რომ აღმასრულებელი დირექტორი თანამდებობიდან გადადგა.
პარასკევს, სავაჭრო დღის დასრულების შემდეგ, Discover-ის მენეჯმენტმა განაცხადა, რომ აღმასრულებელი დირექტორი და დირექტორთა საბჭოს წევრი — როჯერ ჰოჩშილდი ამ პოსტებს ათავისუფლებს. გადადგომის მიზეზი ცნობილი არ არის. როჯერი წლის ბოლომდე ფინანსური მომსახურების კომპანიაში მრჩევლის პოზიციას დაიკავებს.
იგი დროებით შეცვალა ჯონ ოუენმა, დირექტორთა საბჭოს წევრმა. ჯონი Discover-ის ახალი წევრია და იგი საბჭოს 2022 წლის ივნისში შეუერთდა. კომპანიის მენეჯმენტმა განაცხადა, რომ ჯონს აქვს 38 წლიანი გამოცდილება როგორც ტექნიკურ, ისე საბანკო სექტორში. ბოლო პერიოდში იგი Regions Financial-ში ფინანსური დირექტორის თანამდებობას იკავებდა.
Discover-ის მენეჯმენტმა ასევე განაცხადა, რომ კომპანიამ ხელმძღვანელის საძიებო ფირმა დაიქირავა (ფირმის დასახელება არ არის ცნობილი), რათა გადამდგარი ლიდერის მუდმივი შემცვლელი იპოვოს.
Discover Financial Services-ის აქციების ამჟამინდელი ფასი დაახლოებით $93.00-ს შეადგენს. კომპანიას ამ ეტაპზე უოლ სტრიტის 14 ანალიტიკოსი აფასებს. საშუალო სამიზნე ფასი $115.15-ს შეადგენს, მაქსიმალური პროგნოზი — $137.00-ს, ხოლო მინიმალური — $90.00-ს. საშუალო სამიზნე ფასი Discover Financial Services-ის აქციების ამჟამინდელი ფასიდან დაახლოებით 24%-იან ზრდას წარმოადგენს. კომპანიის აქციებს 14 ანალიტიკოსიდან 5-მა მიანიჭა ნეიტრალური რეიტინგი, 9-მ — გაყიდვის რეკომენდაცია და არცერთმა — ყიდვის რეკომენდაცია.
