გუშინ საფონდო ბირჟაზე გავრცელდა ძალიან მნიშვნელოვანი და საინტერესო სიახლეები, რომლებმაც კომპანიების აქციების ფასებზე იმოქმედა. დღეს სწორედ მათ მიმოხილვას შემოგთავაზებთ და ვისაუბრებთ ისეთ კომპანიებზე, როგორებიც არის Meta Platforms, S&P Global, C3.ai, SunPower და Domino’s Pizza.
Meta Platforms
გუშინ, პოზიტიური სიახლეების შემდეგ, Meta Platforms-ის აქციების ფასი დაახლოებით 4%-ით გაიზარდა. წლის დასაწყისიდან ეს მაჩვენებელი 148%-ით არის მომატებული.
გუშინ დილით Deutsche Bank-ის ანალიტიკოსმა — ბენჟამინ ბლექმა Meta-ს აქციებს ყიდვის რეკომენდაცია შეუნარჩუნა, ხოლო სამიზნე ფასი მკვეთრად — $290-დან $350-მდე გაზარდა.
ანალიტიკოსმა განაცხადა, რომ ციფრული რეკლამირების ბაზრის აღდგენის ირგვლივ ოპტიმიზმი იზრდება, რამაც შეიძლება Meta-ს მოგებაზე პოზიტიურად იმოქმედოს ამ წლის დასაწყისში და გასული წლის ბოლოს სამუშაო ძალის ნაწილის გათავისუფლებისა და სხვა ხარჯების შემცირების შემდეგ. ბენჟამინმა ასევე აღნიშნა, რომ Reels-ისა და Messenger-ის საშუალებით მონეტიზაციის ტენდენციები უმჯობესდება.
გუშინდელ ზრდაზე ასევე იმოქმედა იმ ფაქტმა, რომ სამომხმარებლო ფასების ინდექსი (CPI) 2021 წლის მარტის შემდეგ ყველაზე ნელი ტემპით გაიზარდა: მხოლოდ 3%-ით წლიდან წლამდე. ხოლო ძირითადი ინფლაცია, რომელიც გამორიცხავს საკვებსა და ენერგეტიკას — თვიდან თვემდე მხოლოდ 0.2%-ით.
CPI-ის ანგარიში და ანალიტიკოსის მიერ სამიზნე ფასის ზრდა არის უახლესი პოზიტიური ამბავი Meta-სთვის. ამას ემატება ის ფაქტიც, რომ კომპანიის ახალმა პლატფორმამ — Threads-მა გაშვებიდან რამდენიმე დღეში უკვე 100 მილიონ მომხმარებელს მიაღწია.
S&P Global
გუშინ, ანალიტიკოსების დადებითი შეფასებების შემდეგ, ფინანსური ინფორმაციის სპეციალისტის — S&P Global-ის აქციების ფასი დაახლოებით 2.5%-ით გაიზარდა. წლის დასაწყისიდან ეს მაჩვენებელი 21%-ზე მეტით არის მომატებული.
გუშინ Raymond James-ის ანალიტიკოსმა —პატრიკ ო’შონესმა S&P Global-ის აქციებს ყიდვის რეკომენდაცია შეუნარჩუნა, ხოლო სამიზნე ფასი $413-დან $421-მდე გაზარდა.
გარდა ამისა, სამშაბათს, სავაჭრო დღის დაწყებამდე, პატრიკის კოლეგამ — ალექს კრამმა UBS-დან უფრო მკვეთრი ნაბიჯი გადადგა, მან S&P Global-ის აქციებს ასევე ყიდვის რეკომენდაცია შეუნარჩუნა, ხოლო სამიზნე ფასი $420-დან $460-მდე გაზარდა.
კიდევ ერთი ანალიტიკოსი, რომელმაც ფინანსური ინფორმაციის სპეციალისტი დადებითად შეაფასა იყო ტონი კაპლანი Morgan Stanley-დან. მან S&P Global-ის აქციებს ყიდვის რეკომენდაცია შეუნარჩუნა და სამიზნე ფასი $420-დან $427-მდე გაზარდა.
S&P Global-ის აქციების ამჟამინდელი ფასი დაახლოებით $406.5-ს შეადგენს. კომპანიას ამ ეტაპზე უოლ სტრიტის 35 ანალიტიკოსი აფასებს. საშუალო სამიზნე ფასი $418.72-ს შეადგენს, მაქსიმალური პროგნოზი — $535.00-ს, ხოლო მინიმალური — $250.00-ს. საშუალო სამიზნე ფასი S&P Global-ის აქციების ამჟამინდელი ფასიდან დაახლოებით 5.7%-იან შემცირებას გულისხმობს. კომპანიის აქციებს 35 ანალიტიკოსიდან 19-მა მიანიჭა ყიდვის რეკომენდაცია, 14-მა — ნეიტრალური რეიტინგი, ხოლო 2-მა — გაყიდვის რეკომენდაცია.
C3.ai
გუშინ, ნეგატიური სიახლეების შემდეგ, ხელოვნური ინტელექტის კომპანიის — C3.ai-ის აქციების ფასი 3%-ით შემცირდა. წლის დასაწყისიდან ეს მაჩვენებელი 263%-ით არის მომატებული.
გუშინ TheFly.com-მა გაავრცელა ინფორმაცია, რომ C3.ai-ის დირექტორთა საბჭოს წევრმა — რიჩარდ ლევინმა 7 ივლისს კომპანიის 12,000 აქცია გაყიდა და $504,000 მიიღო. თუმცა ეს ყველაფერი არ არის. გასული სამი თვის განმავლობაში მან დამატებით 24,000 აქცია გაყიდა და ამ ტრანზაქციის ღირებულებამ $726,240 შეადგინა.
ამავი არც აქ მთავრდება. რიჩარდი არ არის C3-ის ერთადერთი ინსაიდერი, რომელმაც კომპანიის აქციები გაყიდა. ფასიანი ქაღალდებისა და ბირჟის კომისიაში (SEC) წარდგენილმა დოკუმენტაციამ სხვა ტრანზაქციებიც გამოავლინა:
- ფინანსურმა დირექტორმა — იუჰო პარკკინენმა $152,426 დოლარის ღირებულების 4,220 აქცია გაყიდა.
- მთავარმა ტექნიკურმა მენეჯერმა — ედვარდ აბომ 457,585 აქცია გაყიდა და $15.1 მილიონი მიიღო.
- ხოლო აღმასრულებელმა ვიცე-პრეზიდენტმა — ჰოუმან ბეჰზადმა $35.5 მილიონის ღირებულების 948,883 აქცია გაყიდა.
და ეს ყველაფერი ივნისის ბოლო კვირაში მოხდა.
როდესაც ინსაიდერები ასეთი ასეთი რაოდენობით ყიდიან ისეთი კომპანიების აქციებს, რომელსაც მეოთხედ მილიარდზე მეტი წლიური გაყიდვები აქვს, თუმცა — არავითარი მოგება ან თავისუფალი ფულადი ნაკადები, ინვესტორების ნეგატიური რეაქცია სრულიად ბუნებრივია.
დადებითი მხარე ისაა, რომ სულ რაღაც ექვს კვირაში, 29 აგვისტოს, C3.ai კვარტალურ ანგარიშს წარადგენს და მენეჯმენტს შანსი ექნება, კომპანიის ფინანსურ სიჯანსაღესთან დაკავშირებით ინვესტორების ეჭვები გააქარწყლოს.
SunPower
გუშინ, ანალიტიკოსის დადებითი შეფასების შემდეგ, SunPower-ის აქციების ფასი 8%-ზე მეტით გაიზარდა. წლის დასაწყისიდან ეს მაჩვენებელი 40%-ით არის შემცირებული.
გუშინ, ფინანსური სერვისის კომპანიამ — Raymond James-მა SunPower-ის აქციების ყიდვის რეკომენდაცია „მტკიცე ყიდვით“ შეცვალა და $21-ის ტოლი სამიზნე ფასი შეინარჩუნა, რაც კომპანიის აქციების ამჟამინდელი ფასის გაორმაგებას გულისხმობს.
ანალიტიკოსმა განაცხადა, რომ მიმდინარე წლის პირველ ნახევარში SunPower-ის აქციები არასახარბიელო წარმადობით ხასიათდებოდა, მისი აქციების ფასი 40%-ზე მეტით შემცირდა მაშინ, როდესაც კონკურენტმა — SunRun-მა მხოლოდ 26%-იანი ვარდნა განიცადა, ხოლო Sunnova-ს აქციების ფასი 2%-ით გაიზარდა.
ანალიტიკოსმა ხაზი გაუსვა ფაქტს, რომ ამჟამად აშშ-ში სახლების მხოლოდ 4% იყენებს მზის პანელებს, შედარებისთვის, გერმანიაში ეს მაჩვენებელი 15%-ს შეადგენს, ხოლო ავსტრალიაში — 25%-ს. Raymond James-ში მიიჩნევენ, რომ ათვისების დაბალი დონიდან გამომდინარე დროთა განმავლობაში ისეთი კომპანიების გაყიდვები და მოგება, როგორებიც არის SunPower, SunRun და Sunnova, გაიზრდება.
SunPower-ის აქციების ამჟამინდელი ფასი დაახლოებით $10-ს შეადგენს. კომპანიას ამ ეტაპზე უოლ სტრიტის 14 ანალიტიკოსი აფასებს. საშუალო სამიზნე ფასი $14.82-ს შეადგენს, მაქსიმალური პროგნოზი — $24.00-ს, ხოლო მინიმალური — $9.50-ს. საშუალო სამიზნე ფასი SunPower-ის აქციების ამჟამინდელი ფასიდან დაახლოებით 44%-იან ზრდას გულისხმობს. კომპანიის აქციებს 14 ანალიტიკოსიდან 2-მა მიანიჭა ყიდვის რეკომენდაცია, 10-მა — ნეიტრალური რეიტინგი, ხოლო 2-მა — გაყიდვის რეკომენდაცია.
Domino’s Pizza
გუშინ Domino’s Pizza-ს აქციების ფასი 11%-ზე მეტით გაიზარდა მას შემდეგ, რაც სარესტორნო ქსელმა Uber Technologies-თან მიწოდების ხელშეკრულება დადო. აღსანიშნავია, რომ ამ ზრდის შედეგად Domino’s Pizza-ს აქციების ფასმა 2023 წლისთვის ახალ მაქსიმუმს მიაღწია. რაც შეეხება Uber-ს მისი აქციების ფასი თითქმის უცვლელი იყო — 0.36%-ით გაიზარდა.
როგორც ჩანს, ბაზარი მიიჩნევს, რომ ახალი პარტნიორობა Domino’s-ისთვის უფრო მნიშვნელოვანია, ვიდრე Uber-ისთვის. ამ ოპტიმიზმს შეიძლება აძლიერებდეს ის რწმენა, რომ გარიგებამ, შესაძლოა, Domino’s დამატებით $1 მილიარდის მოცულობის გაყიდვები მოუტანოს.
აშშ-ში თითქმის ყველა სარესტორნო ქსელი სთავაზობს მომხმარებლებს მესამე მხარის მიწოდების სერვისს და ზოგიერთ მათგანს გარკვეულ პროვაიდერებთან ექსკლუზიური პარტნიორობაც კი აქვს. თუმცა Domino’s ამ დრომდე ასეთი სერვისით არ სარგებლობდა და ამ საქმეს თავად უმკლავდებოდა.
ახლა ყველაფერი იცვლება. Domino’s-ის თანახმად, Uber Eats (და Uber-ის მიწოდების სხვა ბაზარი, Postmates) მინიმუმ 2024 წლამდე კომპანიის ექსკლუზიური მესამე მხარის მიწოდების პარტნიორი იქნება.
Domino’s-ის აღმასრულებელი დირექტორი — რასელ ვაინერი, კომპანიის კვლევებზე დაყრდნობით, აცხადებს, რომ Uber-თან პარტნიორობამ შეიძლება Domino’s-ის გაყიდვები $1 მილიარდით გაზარდოს.
Domino’s Pizza-ს აქციების ამჟამინდელი ფასი დაახლოებით $388.5-ს შეადგენს. კომპანიას ამ ეტაპზე უოლ სტრიტის 23 ანალიტიკოსი აფასებს. საშუალო სამიზნე ფასი $353.45-ს შეადგენს, მაქსიმალური პროგნოზი — $415.00-ს, ხოლო მინიმალური — $270.00-ს. საშუალო სამიზნე ფასი Domino’s Pizza-ს აქციების ამჟამინდელი ფასიდან დაახლოებით 9%-იან შემცირებას გულისხმობს. კომპანიის აქციებს 23 ანალიტიკოსიდან 13-მა მიანიჭა ყიდვის რეკომენდაცია, 8-მ — ნეიტრალური რეიტინგი, ხოლო 2-მა — გაყიდვის რეკომენდაცია.
