გუშინ საფონდო ბირჟაზე საკმაოდ მნიშვნელოვანი სიახლეები გავრცელდა. დღეს კი შემოგთავაზებთ საინტერესო დეტალებს ისეთი კომპანიების შესახებ, როგორებიც არის Overstock.com, Greenbriar Companies და Lindsay.
Overstock.com
გუშინ Overstock.com-ის აქციების ფასი დაახლოებით 20%-ით გაიზარდა მას შემდეგ, რაც კომპანიის მენეჯმენტმა განაცხადა, რომ Bed Bath & Beyond-ისგან, რომელიც გაკოტრების თანმდევ პროცესებს გადის, ბრენდის აქტივები შეიძინა.
გარიგება იძლევა გარკვეულ იმედს, რომ Overstock თავისი საცალო ბიზნესის მდგომარეობის გამოსწორებას შეძლებს. გასული წლის განმავლობაში კომპანიის აქციების ფასი 40%-ით შემცირდა, წლის დასაწყისიდან კი ეს მაჩვენებელი დაახლოებით 62%-ით არის გაზრდილი.
Overstock Bed Bath & Beyond-ის ვებსაიტს და დომენის სახელებს, ბრენდის სავაჭრო ნიშნებს, პატენტებს, მომხმარებელთა მონაცემთა ბაზას, ლოიალობის პროგრამის მონაცემებს და ბრენდის სხვა აქტივებს $21.5 მილიონად ყიდულობს ნაღდი ფულით. Overstock-ის აღმასრულებელმა დირექტორმა — ჯონათან ჯონსონმა ტრანზაქციას „მნიშვნელოვანი და ტრანსფორმაციული ნაბიჯი“ უწოდა და როგორც ჩანს, მას ბაზარიც ეთანხმება.
ერთ-ერთი აშკარა მიზეზი, რის გამოც გარიგება შეიძლება ძალიან მომგებიანი იყოს Overstock-ისთვის არის ის, რომ როგორც ჩანს, კომპანია Bed Bath & Beyond-ისგან საუკეთესო აქტივებს ყიდულობს და არ არის ფოკუსირებული ამ უკანასკნელის წამგებიან ფიზიკურ ლოკაციებზე.
Overstock-ის მენეჯმენტმა განაცხადა, რომ კანადაში Bed Bath & Beyond-ის ვებგვერდს განაახლებს, ხოლო აშშ-ის მომხმარებლებისთვის ცალკე ვებსაიტს გამოუშვებს.
Greenbriar Companies
გუშინ სარკინიგზო სატვირთო მატარებლების მწარმოებლის — Greenbriar Companies-ის აქციების ფასი 25%-ით გაიზარდა, მას შემდეგ, რაც მოსალოდნელზე უკეთესი კვარტალური ანგარიში წარადგინა.
კომპანიის შემოსავალი წლიდან წლამდე 31%-ით — $1.04 მილიარდამდე გაიზარდა (ანალიტიკოსების პროგნოზი — $896.25 მილიონი), ხოლო კორექტირებული EPS (მოგება თითო აქციაზე) 611%-ით — $1.02-მდე (პროგნოზი — $0.6).
თუმცა, უნდა აღინიშნოს, რომ სიახლეები არც ისე კარგი იყო, როგორც შეიძლება ერთი შეხედვით ჩანდეს. მიუხედავად იმისა, რომ კორექტირებული EPS $1.02 იყო (რომ არ ჩავთვალოთ ზარალი, რომელიც კომპანიის მიერ Gunderson Marine-ის დანაყოფის გაყიდვასთან არის დაკავშირებული), ფაქტობრივი EPS, რომელიც საყოველთაოდ აღიარებული ბუღალტრული პრინციპების მიხედვით (GAAP) გამოითვლება, დაახლოებით $0.64 იყო.
Lindsay
გუშინ, ბაზრის გახსნამდე, ირიგაციისა და ინფრასტრუქტურის კომპანიამ — Lindsay-მ კვარტალური ანგარიში წარადგინა, სავაჭრო დღის განმავლობაში კი მისი აქციების ფასი 7%-ზე მეტით შემცირდა.
2023 წლის მესამე კვარტალში Lindsay-ის შემოსავალი წლიდან წლამდე 23%-ით — $164.55 მილიონამდე შემცირდა (ანალიტიკოსების პროგნოზი — $206.34 მილიონი), ხოლო EPS-მა (მოგება თითო აქციაზე) 33%-ით დაიკლო და $1.53 შეადგინა (პროგნოზი — $2.14).
მიუხედავად იმისა, რომ ინვესტორები იმედგაცრუებულნი არიან შემოსავლისა და მოგების სუსტი შედეგებით, Lindsay-მ დააფიქსირა უფრო მაღალი საოპერაციო შემოსავალი როგორც სარწყავი, ასევე ინფრასტრუქტურის სეგმენტებში. 2022 წლის მესამე კვარტალთან შედარებით, ირიგაციისა და ინფრასტრუქტურის სეგმენტების საოპერაციო მარჟები, შესაბამისად, 60 საბაზისო პუნქტით 21.6%-მდე და 140 საბაზისო პუნქტით 16.2%-მდე გაიზარდა.
