გუშინ საფონდო ბირჟაზე საკმაოდ მნიშვნელოვანი სიახლეები გავრცელდა. დღეს კი შემოგთავაზებთ საინტერესო დეტალებს ისეთი კომპანიების შესახებ, როგორებიც არის Alibaba, Pinterest და Virgin Galactic.
Alibaba
გუშინ Alibaba-ს აქციების ფასი დაახლოებით 3%-ით შემცირდა. ვარდნა გამოიწვია მედიის ცნობამ აშშ-დან ექსპორტის შესაძლო შეზღუდვების შესახებ, რამაც, შეიძლება, მნიშვნელოვან სეგმენტში ტექნოლოგიური გიგანტის ზრდა შეაფერხოს.
Reuters-მა გამოაქვეყნა ანგარიში, რომელშიც ნათქვამია, რომ ბაიდენის ადმინისტრაცია მოწინავე პროცესორებზე ექსპორტის კონტროლის გამკაცრებას განიხილავს. ასეთი პროცესორები აუცილებელია ხელოვნური ინტელექტის (AI) აპლიკაციებისთვის.
საინფორმაციო სააგენტოს განცხადებით, ეს ახალი შეზღუდვა ფედერალური მთავრობის მიერ დაწესებული შეზღუდვების ამჟამად არსებულ კომპლექტს დაემატება.
Reuters თავის ანგარიშში ასევე ციტირებს Nvidia-ს ფინანსური დირექტორს — კოლეტ კრესს, რომელმაც ინვესტორთა კონფერენციაზე განაცხადა: „გრძელვადიან პერსპექტივაში, შეზღუდვები, რომლებიც კრძალავს ჩვენი მონაცემთა ცენტრის GPU-ების გაყიდვას ჩინეთში, აშშ-ის ინდუსტრიისთვის მსოფლიოს ერთ-ერთ უდიდეს ბაზარზე კონკურენციისა და ლიდერობის შესაძლებლობების დაკარგვას გამოიწვევს, ასევე გავლენას იქონიებს ჩვენს მომავალ ბიზნესსა და ფინანსურ შედეგებზე“.
გუშინ სოციალური პლატფორმის — Pinterest-ის აქციების ფასი 6%-ზე მეტით გაიზარდა მას შემდეგ, რაც ანალიტიკოსმა განაცხადა, რომ კომპანიას ბიზნესის გასაზრდელად მნიშვნელოვანი კატალიზატორი გააჩნია.
Wells Fargo-ს ანალიტიკოსმა — კენ გავრელსკიმ Pinterest-ის აქციების ნეიტრალური შეფასება ყიდვის რეკომენდაციით შეცვალა. TipRanks-ის თანახმად, მისი სამიზნე ფასი ამჟამად $34-ს შეადგენს, რაც კომპანიის აქციების ამჟამინდელი ფასიდან დაახლოებით 20%-იან ზრდას გულისხმობს.
ბოლო სამი წლის განმავლობაში Pinterest-ის აქციების ფასი მხოლოდ 30%-ით გაიზარდა, S&P 500-ის 45%-იან მატებასთან შედარებით. ამ წარუმატებლობის დიდი მიზეზი შემოსავლების ზრდის ნაკლებობაა. კომპანიის შემოსავალი 2023 წლის პირველ კვარტალში წლიდან წლამდე მხოლოდ 5%-ით გაიზარდა.
თუმცა, Pinterest-მა აპრილის ბოლოს Amazon-თან გარიგება დადო და სწორედ ამაში ხედავს ანალიტიკოსი პოზიტიური განწყობის მიზეზს. კენი თვლის, რომ ამ პარტნიორობას შეუძლია Pinterest-ის ზრდა გააძლიეროს. რაც შეეხება გარიგებას, Amazon Pinterest-ზე რეკლამებს განათავსებს და ეს პირველი შემთხვევა იქნება, როდესაც ეს უკანასკნელი მესამე მხარის რეკლამებს გაუშვებს. თუმცა მნიშვნელოვანია აღინიშნოს, რომ ეს რეკლამები დაუყოვნებლივ არ განთავსდება, ამას დაახლოებით რამდენიმე კვარტალი დასჭირდება.
Virgin Galactic
გუშინ, კოსმოსური ტურისტული კომპანიის — Virgin Galactic-ის აქციების ფასი 9%-ზე მეტით გაიზარდა.
დღეს, აღმოსავლეთის დროით დილის 11 საათზე, Virgin Galactic თავის პირველ კომერციულ კოსმოსურ ფრენას — Galactic 01-ს განახორციელებს. სამეცნიერო კვლევების ჩასატარებლად გემზე სამი მგზავრი იქნება იტალიის საჰაერო ძალებიდან და ეროვნული კვლევითი საბჭოდან. ეს იქნება პირველი ფასიანი ფრენა, რომელიც Virgin Galactic-ის ორწლიანი შეფერხებების შემდეგ შედგება. მეორე კომერციული რეისი — Galactic 02 კი აგვისტოს დასაწყისში განხორციელდება. მენეჯმენტი იმედოვნებს, რომ Galactic 02-ის მისიის შემდეგ კომპანია ყოველთვიურ კომერციულ კოსმოსურ ფრენებს დაიწყებს.
თითოეულმა ფრენამ შეიძლება დაახლოებით $2 მილიონის ოდენობით შემოსავალი მოიტანოს, რაც კომპანიის მომგებიანობისთვის საკმარისი არ არის, მაგრამ ის საფუძველს ჩაუყრის მომავალ კოსმოსურ ხომალდებს, როგორიცაა Delta კლასი, რომელიც ამჟამად დამუშავების პროცესშია.
გარდა ამისა, Virgin Galactic-ის მენეჯმენტმა $400 მილიონის ღირებულების ახალი აქციების გამოშვების გეგმები დააანონსა და აღნიშნა, რომ გასული 10 თვის განმავლობაში უკვე გამოუშვა $300 მილიონის ღირებულების აქციები. ამის მიზეზი კი ის არის, რომ კომპანიას მეტი ფული სჭირდება.
