პარასკევს საფონდო ბირჟაზე საკმაოდ მნიშვნელოვანი სიახლეები გავრცელდა და კომპანიების აქციების ფასებში ცვლილებები დაფიქსირდა. დღეს კი შემოგთავაზებთ საინტერესო დეტალებს ისეთი კომპანიების შესახებ, როგორებიც არის Accolade, Nike, Smart Global Holdings და Carnival.
Accolade
ხუთშაბათს, სავაჭრო დღის დასრულების შემდეგ, Accolade-მა კვარტალური ანგარიში წარადგინა, პარასკევს კი პერსონალიზებული ჯანდაცვის კომპანიის აქციების ფასი 6%-ზე მეტით გაიზარდა.
Accolade-ის კვარტალური შემოსავალი წლიდან წლამდე 9%-ით — $93.2 მილიონამდე გაიზარდა (ანალიტიკოსების პროგნოზი — $90.27 მილიონი), GAAP-ის (ბუღალტრული აღრიცხვის საყოველთაოდ აღიარებული პრინციპები) მიხედვით გამოთვლილმა წმინდა ზარალმა კი $38.4 მილიონი შეადგინა, ანუ ზარალი თითო აქციაზე $0.52 იყო (პროგნოზი — $0.62). გასული წლის იმავე კვარტალში წმინდა ზარალმა $343 მილიონს მიაღწია.
მენეჯმენტმა ეს გაუმჯობესებები ბიზნეს სტრატეგიის ბოლოდროინდელ ცვლილებას მიაწერა. ფინანსურმა დირექტორმა — სტივ ბარნსმა განაცხადა, რომ კომპანიის ახალი ინიციატივა ქმნის უფრო გამარტივებულ ორგანიზაციას, რომელიც გააუმჯობესებს საერთო ხარჯებს, გადაწყვეტილების მიღებასა და სტრატეგიულ დაგეგმვას.
რაც შეეხება მომავალს, მენეჯმენტი პროგნოზირებს, რომ მიმდინარე კვარტალში კომპანიის შემოსავალი $93-$95 მილიონს შეადგენს, ხოლო EBITDA (მოგება ვალის მომსახურების ხარჯების, გადასახადების, ცვეთისა და ამორტიზაციის გამოკლებამდე) ნეგატიური $11-$14 მილიონი იქნება. რაც შეეხება სრულ ფისკალურ 2024 წელს, მენეჯმენტი $410-$414 მილიონის ოდენობით შემოსავალს და ნეგატიურ EBITDA-ს ($6-$12 მილიონი) მოელის.
Nike
ხუთშაბათს, სავაჭრო დღის დასრულების შემდეგ, Nike-მა კვარტალური ანგარიში წარადგინა, პარასკევს კი კომპანიის აქციების ფასი დაახლოებით 3%-ით შემცირდა.
Nike-ის შემოსავალი წლიდან წლამდე 5%-ით — $12.8 მილიარდამდე გაიზარდა (ანალიტიკოსების პროგნოზი — $12.59 მილიარდი). Nike Direct-მა (პირდაპირ მომხმარებლებზე გაყიდვები) განაგრძო ძლიერი შედეგების დაფიქსირება — ამ მიმართულებით შემოსავალი 15%-ით გაიზარდა და $5.5 მილიარდს მიაღწია. საბითუმო გაყიდვებიდან მიღებული შემოსავალი კვარტალში 2%-ით — $6.7 მილიარდამდე შემცირდა.
მთლიანმა მარჟამ 140 საბაზისო პუნქტით — 43.6%-მდე დაიკლო უფრო მაღალი წარმოების ხარჯებისა და ფასდაკლებების ზრდის გამო. მარაგები უცვლელი იყო, რაც აჩვენებს, რომ კომპანიამ, მიწოდების ჯაჭვის გამოწვევების შემდეგ, მარაგების პოზიცია გააუმჯობესა.
დაბალი მთლიანი მარჟის, ასევე გაყიდვებისა და ადმინისტრაციული ხარჯების 8%-იანი ზრდის გამო, საოპერაციო შემოსავალი კვარტალში 17%-ით — $1.22 მილიარდამდე შემცირდა. EPS (მოგება თითო აქციაზე) კი წლიდან წლამდე 27%-ით — $0.66-მდე შემცირდა და ოდნავ ჩამორჩა ანალიტიკოსების პროგნოზს — $0.67-ს.
რაც შეეხება მომავალს, მენეჯმენტი პროგნოზირებს, რომ მიმდინარე წელს შემოსავალი საშუალო ერთნიშნა პროცენტული პუნქტით გაიზრდება, ხოლო პირველ კვარტალში ეს მაჩვენებელი უცვლელი იქნება ან დაბალი ერთნიშნა პროცენტით მოიმატებს. Nike-ში ასევე პროგნოზირებენ მიმდინარე წელს მთლიანი მარჟის 140-150 საბაზისო პუნქტით გაზრდას წელიწადში, რაც ნიშნავს, რომ EPS $3.75-$3.95-ს შეადგენს. ეს მაჩვენებელი შეესაბამება ანალიტიკოსების პროგნოზს — $3.86-ს და აღემატება ფისკალური 2023 წლის მაჩვენებელს — $3.23-ს.
Smart Global Holdings
ხუთშაბათს, სავაჭრო დღის დასრულების შემდეგ, Smart Global Holdings-მა კვარტალური ანგარიში წარადგინა, პარასკევს კი ნახევარგამტარების მწარმოებლის აქციების ფასი დაახლოებით 9%-ით გაიზარდა.
Smart Global-ის კვარტალური შემოსავალი წლიდან წლამდე 17%-ით — $383.4 მილიონამდე შემცირდა, თუმცა ამ მაჩვენებელმა მაინც გადააჭარბა ანალიტიკოსების პროგნოზს — $375.08 მილიონს. კორექტირებული EPS 24%-ით დაეცა და $0.66 შეადგინა (პროგნოზი — $0.4), თუმცა GAAP-ის მიხედვით გამოანგარიშების შემთხვევაში კომპანიამ რეალურად განიცადა $0.50-ის ტოლი ზარალი თითო აქციაზე.
რაც შეეხება მომავალს, მენეჯმენტი პროგნოზირებს, რომ მიმდინარე კვარტალში გაყიდვები დაახლოებით $375 მილიონს შეადგენს, რაც წლიდან წლამდე 14%-იან კლებას გულისხმობს.
კარგი ამბავი ის არის, რომ მენეჯმენტის თქმით, GAAP მოგება შეიძლება პოზიტიურ ტერიტორიას დაუბრუნდეს და EPS-მა $0.02 შეადგინოს, თუმცა ჯერ კიდევ არსებობს შანსი, რომ Smart-მა ამ კვარტალში ფული დაკარგოს. ანალიტიკოსები პროგნოზირებენ, რომ მომავალი წელი უკეთესი იქნება და ამ პერიოდში EPS $1-ს გაუტოლდება.
Carnival
პარასკევს, ანალიტიკოსის დადებითი შეფასების შემდეგ, საკრუიზო ოპერატორის — Carnival-ის აქციების ფასი დაახლოებით 10%-ით გაიზარდა.
Jefferies-ის ანალიტიკოსმა — დევიდ ქაცმა Carnival-ის აქციების ნეიტრალური რეიტინგი ყიდვის რეკომენდაციით შეცვალა, ხოლო სამიზნე ფასი მკვეთრად — $9-დან $25-მდე გაზარდა, რაც ხუთშაბათის დახურვის ფასიდან დაახლოებით 46%-იან ზრდას გულისხმობს.
დევიდის აზრით, მოთხოვნის აღდგენამ შეიძლება მნიშვნელოვანი პოზიტიური გავლენა იქონიოს კომპანიაზე და აქციები უფრო მიმზიდველი გახადოს. იგი ფიქრობს, რომ ასეთი ტენდენცია მომდევნო რამდენიმე წლის განმავლობაში გაგრძელდება. ანალიტიკოსმა ასევე თქვა, რომ Carnival, სავარაუდოდ, მომდევნო სამი წლის განმავლობაში ყოველწლიურად $3 მილიარდს დახარჯავს ვალის დასაფარად თავისუფალი ფულადი ნაკადებიდან (FCF), რაც კომპანიას პანდემიის დროს მიღებული ზარალის გამოსწორებაში დაეხმარება.
Carnival-მა კვარტალური ანგარიში გასული კვირის დასაწყისში წარადგინა. კომპანიის კვარტალურმა შემოსავალმა $4.9 მილიარდი შეადგინა (ანალიტიკოსების პროგნოზი — $4.78 მილიარდი), ხოლო ზარალმა თითო აქციაზე — $0.31 (პროგნოზი — $0.34). Carnival-ის მენეჯმენტმა განაცხადა, რომ კრუიზებზე მოთხოვნა კვლავ იზრდება და კვარტალში განხორციელებულმა ჯამურმა ჯავშნებმა ყველა დროის ახალ მაქსიმუმს მიაღწია. გარდა ამისა კომპანია ფასებს ზრდის.
Carnival-ის აქციების ამჟამინდელი ფასი დაახლოებით $19-ს შეადგენს. კომპანიას ამჟამად უოლ სტრიტის 17 ანალიტიკოსი აფასებს. საშუალო სამიზნე ფასი $16.91-ს შეადგენს, მაქსიმალური პროგნოზი — $25.00-ს, ხოლო მინიმალური — $11.00-ს. საშუალო სამიზნე ფასი Carnival-ის აქციების ამჟამინდელი ფასიდან დაახლოებით 10%-იან კლებას წარმოადგენს. კომპანიის აქციებს 17 ანალიტიკოსიდან 11-მა მიანიჭა ყიდვის რეკომენდაცია, 4-მა — ნეიტრალური რეიტინგი, ხოლო 2-მა — გაყიდვის რეკომენდაცია.
