გუშინ საფონდო ბირჟა მოიცვა საინტერესო სიახლეებმა, რომლებმაც სხვადასხვა კომპანიის აქციებზე მნიშვნელოვანი გავლენა იქონია. დღეს შემოგთავაზებთ საინტერესო დეტალებს ისეთი კომპანიების შესახებ, როგორებიც არის Super Micro Computer, Macy’s და Broadcom.
Super Micro Computer
გუშინ, ანალიტიკოსის ნეგატიური შეფასების შემდეგ, სერვერისა და მონაცემთა შენახვის გადაწყვეტის სპეციალისტის — Super Micro Computer-ის აქციების ფასი თითქმის 4%-ით შემცირდა. თუმცა მიმდინარე წლის განმავლობაში ეს მაჩვენებელი დაახლოებით 213%-ით არის გაუმჯობესებული.
Susquehanna-ს ანალიტიკოსმა — მეჰდი ჰოსეინმა Super Micro-ს აქციების ნეიტრალური რეიტინგი გაყიდვის რეკომენდაციით შეცვალა, ხოლო სამიზნე ფასი $240-დან $160-მდე შეამცირა. ეს, პარასკევის დახურვის ფასთან შედარებით, 41%-იან შემცირებას გულისხმობს.
მიუხედავად იმისა, რომ ანალიტიკოსს მოსწონს კომპანიის სტრატეგია, რომელიც მყიდველებს თავიანთი სერვერის კონფიგურაციების პერსონალურად მორგების საშუალებას აძლევს, მეჰდი თავისი ნაბიჯის მიზეზად კომპანიის მარჟაზე ზეწოლის ზრდას ასახელებს.
თუმცა ზოგიერთი მიიჩნევს, რომ Super Micro კონკურენტებს ბაზრის წილს ართმევს. ამ ბანაკში ერთ-ერთი ადამიანი არის Northland Capital Markets-ის ანალიტიკოსი — ნეჰალ ჩოკში. იგი კომპანიის აქციებს ყიდვის რეკომენდაციას და $395-ის ოდენობით სამიზნე ფასს უნარჩუნებს. ეს მაჩვენებელი პარასკევის დახურვის ფასთან შედარებით 45%-იან ზრდას გულისხმობს.
ნეჰალი ვარაუდობს, რომ Super Micro ბაზრის წილის მოპოვებას განაგრძობს. „ჩვენ ველით, რომ ხელოვნური ინტელექტის სფეროში Super Micro-ს ბაზრის წილი მარტში ამჟამინდელი 7%-დან გასაოცარ 17%-მდე გაიზრდება“ — აღნიშნა ანალიტიკოსმა.
Super Micro Computer-ის აქციების ამჟამინდელი ფასი დაახლოებით $262.00-ს შეადგენს. ამ ეტაპზე კომპანიას უოლ სტრიტის 8 ანალიტიკოსი აფასებს. საშუალო სამიზნე ფასი $364.67-ს შეადგენს, მაქსიმალური პროგნოზი — $450.00-ს, ხოლო მინიმალური — $160.00-ს. საშუალო სამიზნე ფასი Super Micro Computer-ის აქციების ამჟამინდელი ფასიდან დაახლოებით 39%-იან ზრდას გულისხმობს. კომპანიის აქციებს ამ 8 ანალიტიკოსიდან 5-მა მიანიჭა ყიდვის რეკომენდაცია, 2-მა — ნეიტრალური რეიტინგი, ხოლო 1-მა — გაყიდვის რეკომენდაცია.
Macy’s
გუშინ, მნიშვნელოვანი სიახლის შემდეგ, უნივერსალური მაღაზიების ქსელის — Macy’s-ის აქციების ფასი 19%-ზე მეტით გაიზარდა. მიმდინარე წლის განმავლობაში ეს მაჩვენებელი დაახლოებით 3%-ით არის გაუმჯობესებული.
გუშინ ზრდა მას შემდეგ დაფიქსირდა, რაც კომპანიამ ორი კერძო საინვესტიციო ფირმისგან შესყიდვის შეთავაზება მიიღო. უძრავი ქონების ინვესტორის — Arkhouse Management-ის და აქტივების მენეჯერის — Brigade Capital Management-ის წინადადება Macy’s-ს თითო აქციაზე $21-ად, ანუ მთლიანობაში $5.8 მილიარდად აფასებს. შედარებისთვის, გუშინდელ ზრდამდე, მაღაზიების ქსელის აქციების ფასი $17.40-ს შეადგენდა.
The Wall Street Journal-ის ცნობით, ინვესტორთა ჯგუფს მიაჩნია, რომ Macy’s არასაკმარისად არის შეფასებული და მას საინვესტიციო ბანკისგან აქვს მხარდაჭერა გარიგების შესასრულებლად საჭირო კაპიტალის მოზიდვაში.
Macy’s-ის საბჭო განიხილავს შემდეგ ნაბიჯებს შეთავაზებასთან დაკავშირებით, თუმცა არ არის ნათელი, თუ რამდენად არის მენეჯმენტი ამ წინადადებით დაინტერესებული.
აღსანიშნავია, რომ კომპანიამ კვარტალური ანგარიში დაახლოებით 1 თვის წინ წარადგინა. ფისკალური 2023 წლის მესამე კვარტალში Macy’s-ის შემოსავალი წლიდან წლამდე 7%-ით გაიზარდა და $4.86 შეადგინა, ხოლო კორექტირებულმა EPS-მა (მოგება თითო აქციაზე) $0.21-ს მიაღწია. ორივე მაჩვენებელმა გადააჭარბა უოლ სტრიტის ანალიტიკოსების პროგნოზებს, რომლებიც, შესაბამისად, ასეთი იყო: შემოსავალი — $4.79 მილიარდი; კორექტირებული EPS — -$0.0005.
გარდა ამისა, GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით გამოთვლილმა EPS-მა $0.15 შეადგინა და ამ მაჩვენებელმა ანალიტიკოსების მოლოდინს $0.13-ით გადააჭარბა.
რომ Macy’s-ის მთლიანი მოგების მარჟა 160 საბაზისო პუნქტით (bps) — 40.3%-მდე გაიზარდა, საქონლის მთლიანმა მარჟამ კი 110 bps-ით მოიმატა Macy’s-ის ბრენდის ფასების მცირე კლებისა და ტვირთების გადაზიდვის ხარჯების შემცირების გამო.
გარდა ამისა, კომპანიამ გაყიდვების, ზოგადი და ადმინისტრაციული ხარჯები $48 მილიონით — $2 მილიარდამდე შეამცირა, რაც მიმდინარე ხარჯების დისციპლინაზე მიუთითებს.
ამასთან, Macy’s-მ მარაგები 6%-ით შეამცირა, აღმასრულებელმა დირექტორმა — ტონი სპრინგმა კი აღნიშნა, რომ კომპანია სადღესასწაულო პერიოდს მარაგების ჯანსაღი დონით იწყებს.
რაც შეეხება მომავალს, Macy’s-ის მენეჯმენტი მოელის, რომ მთელი წლის განმავლობაში კომპანიის გაყიდვები $22.9-$23.2 მილიარდს მიაღწევს, ხოლო EPS — $2.88-$3.13-ს. ეს დიაპაზონები აღემატება წინა პროგნოზებს, რომლებიც, შესაბამისად, $22.8-$23.2 მილიარდს და $2.70-$3.20-ს შეადგენდა.
Macy’s-ის აქციების ამჟამინდელი ფასი დაახლოებით $21.00-ს შეადგენს. ამ ეტაპზე კომპანიას უოლ სტრიტის 13 ანალიტიკოსი აფასებს. საშუალო სამიზნე ფასი $15.27-ს შეადგენს, მაქსიმალური პროგნოზი — $19.00-ს, ხოლო მინიმალური — $12.00-ს. საშუალო სამიზნე ფასი Macy’s-ის აქციების ამჟამინდელი ფასიდან დაახლოებით 26.5%-იან შემცირებას გულისხმობს. კომპანიის აქციებს ამ 13 ანალიტიკოსიდან 5-მა მიანიჭა ყიდვის რეკომენდაცია, 7-მა — ნეიტრალური რეიტინგ, ხოლო 1-მა — გაყიდვის რეკომენდაცია.
Broadcom
გუშინ, ანალიტიკოსის დადებითი შეფასების შემდეგ, Broadcom-ის აქციების ფასი 9%-ით გაიზარდა. მიმდინარე წლის განმავლობაში ეს მაჩვენებელი დაახლოებით 86%-ით არის გაუმჯობესებული.
Broadcom არის ამერიკული ტრანსნაციონალური კომპანია, ნახევარგამტარული და ინფრასტრუქტურული პროგრამული უზრუნველყოფის პროდუქტების ფართო სპექტრის დამპროექტებელი, დეველოპერი, მწარმოებელი და გლობალური მიმწოდებელი.
Broadcom-მა კვარტალური ანგარიში გასულ კვირას წარადგინა. გუშინ კი საინვესტიციო ბანკმა Citigroup-მა წამოიწყო კომპანიის შეფასება — აქციებს ყიდვის რეკომენდაცია და $1,100-ის ოდენობით სამიზნე ფასი მიანიჭა. ანალიტიკოსმა — კრისტოფერ დანიელიმ ხაზი გაუსვა Broadcom-ის სიძლიერეს კომპანიის მთავარ ბიზნესში და VMware-ის შესყიდვის ახლახან დახურული გარიგების პოტენციურ პოზიტიურ ეფექტს.
გასულ კვირაში Broadcom-ის აქციების ფასი გაიზარდა, რადგან მენეჯმენტმა განაცხადა, რომ ფისკალურ 2024 წელს (2023-თან შედარებით) AI სეგმენტიდან მიღებული შემოსავალი გაორმაგდება და $8 მილიარდს მიაღწევს. კრისტოფერ დანიელიმ თქვა, რომ ხელოვნური ინტელექტის მიმართულების ზრდა გადაჭრის გამოწვევებს ნახევარგამტარების უფრო ფართო ბიზნესში.
ფისკალურ მეოთხე კვარტალში, რომელიც 29 ოქტომბერს დასრულდა, Broadcom-ის შემოსავალი წლიდან წლამდე 4%-ით — $9.3 მილიარდამდე გაიზარდა, ხოლო კორექტირებულმა წმინდა მოგებამ 6%-ით — $4.81 მილიარდამდე მოიმატა. ანუ კორექტირებული EPS (მოგება თითო აქციაზე) $11.06 იყო. შედარებისთვის, უოლ სტრიტის ანალიტიკოსების პროგნოზები, შესაბამისად, ასეთი იყო: $9.41 მილიარდი და $10.98.
Broadcom-ის აქციების ამჟამინდელი ფასი დაახლოებით $1.029.00-ს შეადგენს. კომპანიას ამ ეტაპზე 17 ანალიტიკოსი აფასებს. საშუალო სამიზნე ფასი $1,070.00-ს შეადგენს, მაქსიმალური პროგნოზი — $1,200.00-ს, ხოლო მინიმალური — $975.00-ს. საშუალო სამიზნე ფასი Broadcom-ის აქციების ამჟამინდელი ფასიდან დაახლოებით 3.5%-იან ზრდას გულისხმობს. კომპანიის აქციებს 17 ანალიტიკოსიდან 14-მა მიანიჭა ყიდვის რეკომენდაცია, 3-მა — ნეიტრალური რეიტინგი და არცერთმა — გაყიდვის რეკომენდაცია.
