ფედერალური სარეზერვო ბანკი (Fed) მზად არ არის საპროცენტო განაკვეთების შესამცირებლად და, შესაძლოა, Fed-ის წარმომადგენლებმა ეს გადაწყვეტილება მომდევნო შეხვედრაზე, მარტშიც არ მიიღონ.
გუშინ ფედერალურმა სარეზერვო ბანკმა საპროცენტო განაკვეთები 22-წლიან მაქსიმუმზე — 5.25%-5.50%-ის დიაპაზონში დატოვა. Fed-ის წარმომადგენლებმა განაცხადეს, რომ, საპროცენტო განაკვეთების შემცირებისთვის, ინფლაციის კლების თვალსაზრისით მეტი პროგრესია საჭირო.
მაღალი ინფლაცია, რომელიც საპროცენტო განაკვეთების ზრდის კამპანიის მიზეზი გახდა, ბოლო პერიოდში საგრძნობლად შემცირდა, რის გამოც Fed-ის პოლიტიკის კომიტეტმა აღნიშნა, რომ, შესაძლოა, გარკვეულ მომენტში საპროცენტო განაკვეთების კლება დაწყებულიყო. თუმცა გუშინ ღია ბაზრის ფედერალური კომიტეტის (FOMC) წარმომადგენლებმა განაცხადეს, რომ საპროცენტო განაკვეთების შემცირება ჯერ ძალიან ადრეა.
პრესკონფერენციაზე ფედერალური სარეზერვო სისტემის თავმჯდომარემ — ჯერომ პაუელმა თქვა: „ინფლაცია ჯერ კიდევ ზედმეტად მაღალ ნიშნულზეა, მისი შემცირების მიმდინარე პროგრესი გარანტირებული არ არის და წინსვლის გზა გაურკვეველია. კომიტეტის წევრების აზრით, მიზანშეწონილი არ იქნება სამიზნე დიაპაზონის შემცირება მანამ, სანამ არ გაჩნდება მეტი მტკიცებულებები იმისა, რომ ინფლაცია მდგრადად მოძრაობს სამიზნე 2%-იანი მაჩვენებლისკენ“.
მიუხედავად იმისა, რომ FOMC-ის ოფიციალური განცხადება არ ითვალისწინებდა საპროცენტო განაკვეთების შემცირებას ან სტაბილურად შენარჩუნებას, მასში ამ მაჩვენებლის ხელახლა გაზრდის იდეა უარყოფილია.
ფინანსური ბაზრების მონაწილეები ელოდებიან Fed-ის შემდეგ ნაბიჯს და ინვესტორები ყურადღებით აანალიზებენ ჯერომ პაუელის განცხადებებს, რათა მიიღონ ინფორმაცია იმის შესახებ, შეამცირებს თუ არა ცენტრალური ბანკი ფედერალურ საპროცენტო განაკვეთებს მარტში დაგეგმილ შეხვედრაზე.
Fed-მა ასევე განაგრძო თავის ანტიინფლაციურ არსენალში არსებული სხვა მნიშვნელოვანი ინსტრუმენტების გამოყენება: გაყიდა თავისი აქტივები, ძირითადად გირავნობის საბუთით უზრუნველყოფილი ფასიანი ქაღალდები, ფინანსური ბაზრებიდან ფულის ამოსაღებად.
ჯერომ პაუელის თქმით, Fed-ის მომავალი გადაწყვეტილება საორიენტაციო განაკვეთთან დაკავშირებით დამოკიდებული იქნება იმაზე, დარჩება თუ არა ინფლაცია ისეთივე დაბალ დონეზე, როგორც ეს ბოლო ანგარიშებში იყო. Fed-ის ინფლაციის საზომმა აჩვენა, რომ ფასები დეკემბერში წლიურად 2.6%-ით გაიზარდა, 2022 წლის ივნისში 7%-მდე მატების შემდეგ. ჯერჯერობით ინფლაცია Fed-ის სამიზნე მაჩვენებელს — 2%-ს უახლოვდება.
