მოთხოვნა-მიწოდების დისბალანსის გამო, რომელიც პანდემიით და გეოპოლიტიკური დაძაბულობით არის გამოწვეული, ნავთობისა და ბუნებრივი აირის ფასები მაღალ დონეს აღწევს. ენერგეტიკული კომპანიების აქციების ფასები, იმ პროდუქტებთან ერთად გაიზარდა, რომელსაც ისინი აწარმოებს.
თუ ენერგეტიკული მწარმოებლების დივიდენდურ აქციებს ეძებთ, დროა ამ უაღრესად ციკლური სექტორის რისკებზეც დაფიქრდეთ. რაც შეეხება დივიდენდების უსაფრთხოებას, ExxonMobil, Chevron, TotalEnergies და Shell საუკეთესო ვარიანტებია. აი რატომ.
- საფუძველს დიდი მნიშვნელობა აქვს
ინტეგრირებული ენერგეტიკის ძირითად სექტორში Exxon-სა და Chevron-ს ერთ-ერთი ყველაზე ძლიერი ბალანსი აქვს. Chevron-ის ვალის თანაფარდობა კაპიტალთან 0.20-უტოლდება, Exxon-ის – 0.28-ს, ხოლო Shell-ის – 0.48-ს. სათანადოდ დააფასეთ ვალის ტვირთის ღირებულება, რადგან რთულ პერიოდებში ფინანსური მოქნილობა ყველაზე მნიშვნელოვანია. პანდემიის პერიოდში, ენერგეტიკული ვარდნის დროს, Chevron-სა და Exxon-ს ჰქონდა საშუალება, რომ დაჰყრდნობოდა ბალანსს, რათა დაეცვა დივიდენდები და კაპიტალური ხარჯვის გეგმები.
Exxon დივიდენდებს ყოველწლიურად ზედიზედ 40 წლის განმავლობაში ზრდიდა, ხოლო Chevron – 35 წლის მანძილზე. შესაბამისად, ორივე კომპანია დივიდენდ არისტოკრატთა რიგებშია. თუმცა, მთავარია იმის აღიარება, რომ ინდუსტრია, რომელშიც ეს ორი კომპანია მოღვაწეობს, ძალიან ციკლურია. ეს კი იმას ნიშნავს, რომ ამ კომპანიებმა შეძლო აქციონერები ბაზრის კარგ და ცუდ პერიოდებში დივიდენდებით დაეჯილდოებინა – ეს კი სწორედ ის არის, რაზეც დივიდენდებზე ორიენტირებულმა ინვესტორებმა უნდა იფიქრონ, სანამ ენერგიის ფასები ჯერ კიდევ მაღალია.
Exxon-ის დივიდენდური სარგებელი დაახლოებით 3.3%-ს შეადგენს, ხოლო Chevron-ის – 3.1%-ს.
- მომავალზე ფიქრი
ვერც TotalEnergies და ვერც Shell ვერ დაიკვეხნის დივიდენდური ანაზღაურების გადახდის ისეთი ისტორიით, როგორიც Exxon-ს ან Chevron-ს აქვს. სინამდვილეში, Shell-მა თავისი დივიდენდური სარგებელი 2020 წელს შეამცირა, მაგრამ მიზეზი, თუ რატომ გააკეთა ეს – მნიშვნელოვანია. დივიდენდების შემცირებასთან ერთად, ენერგეტიკული გიგანტის წარმომადგენლებმა განაცხადეს, რომ კომპანია სუფთა ენერგიის აქტივებზე ექსპოზიციის გაზრდას აპირებს. TotalEnergies-მა იგივე ვალდებულება აიღო, თუმცა დივიდენდების შემცირების გარეშე. ამ უკანასკნელის დივიდენდური სარგებელი ახლა 4.5%-ს შეადგენს, ხოლო Shell-ის – 3.1%-ს.
ამრიგად, TotalEnergies უფრო მიზანშეწონილია ინვესტორებისთვის, რომლებიც ეძებენ უფრო მაღალ შემოსავალს და, იმავდროულად, თავიანთი ინვესტიციის სუფთა ენერგიით დაზღვევა სურთ. თუმცა, არ იფიქროთ, რომ მაღალი სარგებელი დივიდენდების ზრდას ნიშნავს – TotalEnergies-მა დივიდენდური ანაზღაურება მხოლოდ 5%-ით გაზარდა, მაგრამ მნიშვნელოვანი ფაქტორი ის არის, რომ კომპანია აგრძელებს თავისი ნახშირბადის საწვავის ბიზნესიდან მიღებული ფულის დახარჯვას სუფთა ენერგიის სივრცეში სამუშაოდ.
რაც შეეხება Shell-ს და მისი დივიდენდების შემცირებას, შემცირების შემდეგ კომპანიის წარმომადგენლებმა გამოაცხადეს, რომ ცდილობენ სწრაფად დაუბრუნდნენ დივიდენდების ზრდას და, იმავდროულად, განაგრძონ სუფთა ენერგიაში ინვესტირება. შემცირების შედეგად კვარტალური დივიდენდი ერთ აქციაზე $0.16-მდე ჩამოვიდა და სულ რაღაც ორ წელიწადში მან ახლა $0.25-მდე აიწია, რაც 56%-ით ზრდაა. მენეჯმენტი დანაპირებს აშკარად ასრულებს და ასეთი დაბალი დივიდენდების პირობებში, სავარაუდოდ, ისეთ კოლეგებთან შედარებით, როგორიც არის TotalEnergies, Shell-ს ზრდისთვის მეტი სივრცე ექნება.
დასკვნა
ფინანსურად მძლავრ Chevron-სა და Exxon-ს აქვს ბალანსი, რათა რთულ პერიოდში დივიდენდებს მხარი დაუჭიროს. იმავდროულად, TotalEnergies და Shell თავიანთ ნავთობის ფსონებს სუფთა ენერგიაში ინვესტირებით აზღვევს, რაც, შესაძლოა, უკეთესი იყოს ინვესტორებისთვის, რომლებიც სუფთა ენერგიის მიმდინარე განვითარებით შეშფოთებულნი არიან.
