აშშ-ში Silicon Valley Bank (SVB) გაკოტრდა. 2008 წლის ფინანსური კრიზისის შემდეგ ეს ფინანსური ინსტიტუტის გაკოტრების ყველაზე დიდი შემთხვევაა.
ქვეყანაში სიდიდით მე-16 ბანკმა მარცხი განიცადა მას შემდეგ, რაც მეანაბრეებმა გასულ კვირაში თავიანთი თანხების საჩქაროდ განაღდება დაიწყეს, რადგან საზოგადოებაში ბანკის მდგომარეობის გამო შფოთვა ფართოდ გავრცელდა.
SVB ვეღარ უმკლავდებოდა კლიენტების მიერ თანხების მასიურ გატანას და ახალი ფულის მოსაზიდად ბანკის ბოლო მცდელობები წარუმატებელი აღმოჩნდა.
საპროცენტო განაკვეთების ზრდამ, რეცესიის შიშმა და საწყისი საჯარო შეთავაზებების (IPO) ბაზრის შენელებამ კომპანიებისთვის ადრეულ ეტაპზე მეტი ფულადი სახსრების მოზიდვა გაართულა. როგორც ჩანს, ამან აიძულა ფირმები, გაენაღდებინათ თავიანთი დეპოზიტები ბანკებში, როგორიცაა SVB.
ოთხშაბათს გამოქვეყნებული გეგმის პირობების მიხედვით, SVB ცდილობდა გაეყიდა $1.25 მილიარდის ღირებულების ჩვეულებრივი აქციები და $500 მილიონის კონვერტირებადი პრივილეგირებული აქციები. SVB-მ ასევე დააანონსა გარიგება საინვესტიციო ფირმასთან — General Atlantic-თან $500 მილიონის ღირებულების ჩვეულებრივი აქციების გაყიდვასთან დაკავშირებით.
გარდა ამისა ოთხშაბათს SVB-ს წარმომადგენლებმა განაცხადეს, რომ ბანკმა გაყიდა $21 მილიარდის ღირებულების ფასიანი ქაღალდები ფულადი სახსრების მოსაზიდად და ბალანსის აღსადგენად უფრო მოკლე მოქმედების ვადის მქონე აქტივების მიმართ, რომლებიც მზარდ საპროცენტო განაკვეთებს ნაკლებად ექვემდებარება. SVB-ს შეფასებით ამ გაყიდვებმა ბანკს $1.8 მილიარდის მოცულობის ზარალი მოუტანა.
საბოლოოდ აშშ-ის ხელისუფლებამ ოფიციალურად დაისაკუთრა ბანკი და მისი მართვა მიანდო დეპოზიტების გარანტიაზე პასუხისმგებელ სააგენტოს — დეპოზიტების დაზღვევის ფედერალურ კორპორაციას (FDIC).
ფართო საზოგადოებისთვის ნაკლებად ცნობილი SVB, რომელიც სპეციალიზებულია სტარტაპების დაფინანსებაში, აშშ-ში, აქტივების ზომით, ერთ-ერთი უმსხვილესი ბანკი გახდა: 2022 წლის ბოლოს ის $209 მილიარდის ღირებულების აქტივებს და დაახლოებით $175.4 მილიარდის დეპოზიტებს ფლობდა.
აშშ-ს ხაზინის მდივანმა — ჯანეტ იელენმა პარასკევს, სიტუაციის განსახილველად, ფინანსური სექტორის რამდენიმე მარეგულირებელი მოიწვია, მათ სრული ნდობა გამოუცხადა და ხაზი გაუსვა იმას, რომ საბანკო სექტორი კვლავ „მდგრადია“.
უოლ სტრიტის ანალიტიკოსებმა ხუთშაბათსა და პარასკევს განაცხადეს, რომ ნაკლებად სავარაუდოა, SVB-ში წამოჭრილი პრობლემები მთელ საბანკო სისტემაში ფართოდ გავრცელდეს. Morgan Stanley-ში აღნიშნეს, რომ SVB-ის სიტუაცია „უაღრესად უნიკალურია“.
