პარასკევს S&P 500 ინდექსში Pfizer ყველაზე ცუდი შედეგის მქონე აქცია იყო — სავაჭრო დღის განმავლობაში მისი აქციების ფასი დაახლოებით 6%-ით შემცირდა. ასეთი არასახარბიელო წარმადობა გამოიწვია იმ ფაქტმა, რომ კომპანიის მენეჯმენტის განცხადებით, Pfizer დაასრულებს წონაში კლების აბების მესამე ფაზის კვლევას, რადგან უარყოფითი გვერდითი მოვლენები ძალიან ბევრ პაციენტს აღენიშნება.
წლის დასაწყისიდან Pfizer-ის აქციების ფასი თითქმის 43%-ით არის შემცირებული.
კომპანიის მენეჯმენტმა მიუთითა, რომ მედიკამენტის — danuglipron-ის მეორე ფაზის კვლევა ეფექტიანი იყო და სხეულის წონის სტატისტიკურად მნიშვნელოვანი ცვლილების დემონსტრირება შეძლო.
თუმცა Pfizer-ის წარმომადგენლებმა დაამატეს, რომ ყველაზე გავრცელებული გვერდითი ეფექტები იყო მსუბუქი და კუჭ-ნაწლავთან დაკავშირებული. შედეგად კვლევაში მონაწილე პაციენტების ნახევარმა გადაწყვიტა, აბების მიღება შეეწყვიტა. კომპანიაში განაცხადეს, რომ მესამე ფაზის კვლევა შეწყდება.
მედიკამენტების მწარმოებლის მენეჯმენტის განმარტებით, ახალა კომპანია danuglipron-ის განსხვავებული დოზირების ეფექტიანობას შეისწავლის. Pfizer-ის Research and Development-ის მთავარმა სამეცნიერო ოფიცერმა და პრეზიდენტმა — მიქაელ დოლსტენმა განაცხადა, რომ კომპანიის წარმომადგენლების აზრით, აბების დღეში ერთხელ (დღეში 2-ის ნაცვლად) მიღებამ შეიძლება წონაში კლების თვალსაზრისით მნიშვნელოვანი შედეგი გამოიღოს.
Pfizer და სხვა ფარმაცევტული კომპანიები წონაში კლების ეფექტიანი პრეპარატის შესაქმნელად ერთმანეთს დიდ კონკურენციას უწევენ. ამ ბაზარზე კარგად არის ცნობილი Eli Lilly-ის Mounjaro და Novo Nordisk-ის Ozempic და Wegovy, რომლებიც ინექციების სახით არის ხელმისაწვდომი.
Pfizer-ის აქციების ამჟამინდელი ფასი დაახლოებით $29.00-ს შეადგენს. ამ ეტაპზე კომპანიას უოლ სტრიტის 13 ანალიტიკოსი აფასებს. საშუალო სამიზნე ფასი $39.37-ს შეადგენს, მაქსიმალური პროგნოზი — $75.00-ს, ხოლო მინიმალური — $34.00-ს. საშუალო სამიზნე ფასი Pfizer-ის აქციების ამჟამინდელი ფასიდან დაახლოებით 36%-იან ზრდას გულისხმობს. კომპანიის აქციებს ამ 13 ანალიტიკოსიდან 5-მა მიანიჭა ყიდვის რეკომენდაცია, 8-მ — ნეიტრალური რეიტინგი და არცერთმა — გაყიდვის რეკომენდაცია.
