გუშინ Nvidia-ს აღმასრულებელმა დირექტორმა — ჯენსენ ჰუანგმა განაცხადა, რომ კომპანია აშშ-ის მთავრობასთან ერთად მუშაობს ისეთი ჩიპების განვითარებაზე, რომლებიც შეესაბამება აშშ-ის შეზღუდვებს ჩინეთში ექსპორტზე.
აშშ-ის მთავრობამ ახლახან დააწესა ახალი რეგულაციები ჩინეთში გაყიდული მაღალი კლასის ჩიპების ნაკადის შეზღუდვის მიზნით. ისტორიულად ჩინეთის ბაზარზე დაფიქსირებული გაყიდვები Nvidia-ს შემოსავლის დაახლოებით მეხუთედს შეადგენდა, შეზღუდვების უახლესი რაუნდები კი, სავარაუდოდ, კომპანიის მიახლოებით $5 მილიარდის ღირებულების ჩიპებზე იქონიებს გავლენას.
მიმდინარე წლის ნოემბერში Nvidia-ს მენეჯმენტმა დააანონსა ჩინეთისთვის სამი ახალი ჩიპის გამოშვება, რომლებსაც ხელოვნური ინტელექტის (AI) მუშაობისთვის საჭირო მრავალი უახლესი ფუნქცია აქვს, მაგრამ ხასიათდება დაბალი გამოთვლითი სიმძლავრით, რაც აშშ-ის ექსპორტის შეზღუდვების შესასრულებლად აუცილებელი პირობაა.
თუმცა Nvidia-ს ჩინეთის ბაზარზე ორიენტირებული ყველაზე ძლიერი ჩიპის — H20-ის გამოშვება გადაიდო მომავალ წლამდე მის ინტეგრაციასთან დაკავშირებით სერვერის მწარმოებლის პრობლემების გამო.
Nvidia-ს აქციების ამჟამინდელი ფასი დაახლოებით $455.00-ს შეადგენს. კომპანიას ამ ეტაპზე 34 ანალიტიკოსი აფასებს. საშუალო სამიზნე ფასი $661.00-ს შეადგენს, მაქსიმალური პროგნოზი — $1,100.00-ს, ხოლო მინიმალური — $560.00-ს. საშუალო სამიზნე ფასი Nvidia-ს აქციების ამჟამინდელი ფასიდან დაახლოებით 45.3%-იან ზრდას გულისხმობს. კომპანიის აქციებს 34 ანალიტიკოსიდან 31-მა მიანიჭა ყიდვის რეკომენდაცია, 3-მა — ნეიტრალური რეიტინგი და არცერთმა — გაყიდვის რეკომენდაცია.
