პარასკევს Nvidia-ს აქციების ფასი 1%-ზე შემცირდა მას შემდეგ, რაც გავრცელდა ინფორმაცია, რომ ნახევარგამტარების მწარმოებელი აჭიანურებს ჩინეთისთვის ახალი ხელოვნური ინტელექტის (AI) იმ ჩიპის გამოშვებას, რომელიც აშშ-ის ექსპორტის უახლეს შეზღუდვებს შეესაბამება.
მიმდინარე წლის განმავლობაში Nvidia-ს აქციების ფასი საგრძნობლად — დაახლოებით 234%-ით არის გაუმჯობესებული.
Reuters-ის განცხადებით, H20 ჩიპი არის ყველაზე ძლიერი სამი ნახევარგამტარიდან, რომელიც კომპანიამ უნდა გამოუშვას მას შემდეგ, რაც აშშ-ის პრეზიდენტმა — ჯო ბაიდენმა აგვისტოში ჩინეთში ექსპორტის შემზღუდველ აღმასრულებელ ბრძანებას მოაწერა ხელი. შეზღუდვები მოიცავს სენსიტიურ ტექნოლოგიებს, რომლებიც მნიშვნელოვანია ეროვნული უსაფრთხოებისთვის სამ სექტორში: ნახევარგამტარები და მიკროელექტრონიკა, კვანტური საინფორმაციო ტექნოლოგიები და ხელოვნური ინტელექტი.
ითვლებოდა, რომ Nvidia ჩიპების გამოშვებას მიმდინარე თვეში შეძლებდა. თუმცა Reuters-ის ცნობით, H20 ჩიპი, სავარაუდოდ, 2024 წლის პირველ კვარტალში გამოვა მასთან დაკავშირებული სერვერების შემქმნელების პრობლემების გამო.
Reuters-ის ინფორმაციით, ერთ-ერთ სხვა ჩიპს — L20-ს, შეფერხებები არ ემუქრება და ის გეგმის მიხედვით გამოვა. ხოლო მესამე ჩიპის — L2-ის სტატუსი ჯერჯერობით გაურკვეველია.
აღსანიშნავია, რომ გასულ ორშაბათს Nvidia-ს აქციების ფასი გაიზარდა და ამ მაჩვენებელმა ყველა დროის მაქსიმუმს მიაღწია კომპანიის AI ნახევარგამტარებზე მოთხოვნის ზრდის გამო. თუმცა აქციების ფასი შემცირდა, როდესაც კომპანიის მენეჯმენტმა, კვარტალური ანგარიშის გამოქვეყნების შემდეგ, განმარტა, რომ აშშ-ში დაწესებული ექსპორტის შეზღუდვები მიმდინარე კვარტლის შედეგებზე ნეგატიურად იმოქმედებს.
რაც შეეხება კვარტალურ შედეგებს, Nvidia-ს შემოსავალი წლიდან წლამდე 206%-ით — $18.1 მილიარდამდე გაიზარდა მონაცემთა ცენტრის უზარმაზარი ზრდის ფონზე. ამ მაჩვენებელმა უოლ სტრიტის ანალიტიკოსების პროგნოზს $2.01 მილიარდით გადააჭარბა. წმინდა მოგებამ კი 1.274%-ით მოიმატა და $9.2 მილიარდი შეადგინა, ანუ მოგება თითო განზავებულ აქციაზე $3.71 იყო (პროგნოზი — $3.02). კორექტირებულმა EPS-მა კი $4.02-ს მიაღწია (ანალიტიკოსების პროგნოზი — $3.39).
ფირმის მონაცემთა ცენტრის ბიზნესი საკვანძოა კომპანიებისთვის, რომლებიც უზრუნველყოფენ პოპულარულ სერვისებს, როგორიცაა ქლაუდი და AI. Nvidia-ს ამ მიმართულებამ კი სტრატოსფერულ სიმაღლეებს მიაღწია. ბოლო კვარტალში, მონაცემთა ცენტრის შემოსავალმა რეკორდული $14.51 მილიარდი შეადგინა, გასული წლის იმავე მეოთხედში დაფიქსირებულ $3.8 მილიარდთან შედარებით. ეს მაჩვენებელი ასევე აჭარბებს ანალიტიკოსების პროგნოზს — $12.7 მილიარდს.
Nvidia-ს აქციების ამჟამინდელი ფასი დაახლოებით $478.00-ს შეადგენს. კომპანიას ამ ეტაპზე 32 ანალიტიკოსი აფასებს. საშუალო სამიზნე ფასი $660.90-ს შეადგენს, მაქსიმალური პროგნოზი — $1,100.00-ს, ხოლო მინიმალური — $560.00-ს. საშუალო სამიზნე ფასი Nvidia-ს აქციების ამჟამინდელი ფასიდან დაახლოებით 38.3%-იან ზრდას გულისხმობს. კომპანიის აქციებს 32 ანალიტიკოსიდან 29-მ მიანიჭა ყიდვის რეკომენდაცია, 3-მა — ნეიტრალური რეიტინგი და არცერთმა — გაყიდვის რეკომენდაცია.
