პარასკევს სხვადასხვა ცნობილ კომპანიასთან დაკავშირებით მნიშვნელოვანი სიახლეები გავრცელდა. დღეს კი ჩვენ სამ აქციას შევეხებით და მათ შესახებ საინტერესო დეტალებს განვიხილავთ.
Accenture
Accenture არის ირლანდიურ-ამერიკული პროფესიული სერვისების კომპანია, რომელიც დაფუძნებულია დუბლინში. ის სპეციალიზებულია საინფორმაციო ტექნოლოგიების (IT) სერვისებსა და კონსულტაციებში.
პარასკევს, ანალიტიკოსების უარყოფითი შეფასებების შემდეგ, Accenture-ის აქციების ფასი დაახლოებით 3%-ით შემცირდა.
TD Cowen-ის ანალიტიკოსმა — ბრაიან ბერგინმა კომპანიის აქციების ყიდვის რეკომენდაცია ნეიტრალური რეიტინგით შეცვალა, ხოლო სამიზნე ფასი $325-დან $300-მდე შეამცირა. აქციების შესახებ ახალ შენიშვნაში ანალიტიკოსმა დაწერა, რომ კომპანიის უახლესი ფუნდამენტური მონაცემები მიუთითებს მოთხოვნის შემდგომი გაუარესების სიგნალებზე, რაც მზარდ გაურკვევლობას იწვევს.
ანალიტიკოსთა საზოგადოებაში სამიზნე ფასები ბრაიანის რამდენიმე კოლეგამ შეამცირა თუმცა მათ რეკომენდაციები არ შეუცვლიათ. მათ შორის იყო კეიტ ბაჩმანი BMO Capital-დან, რომელმაც სამიზნე ფასი $365-დან $355-მდე შეამცირა და ნეიტრალური რეიტინგი შეინარჩუნა.
აღსანიშნავია, რომ Accenture-მა ხუთშაბათს, სავაჭრო დღის დაწყებამდე, კვარტალური ანგარიში წარადგინა. კომპანიის კვარტალური შემოსავალი წლიდან წლამდე 5%-ით — $16.6 მილიარდამდე გაიზარდა (ანალიტიკოსების პროგნოზი — $16.49 მილიარდი). ეს შედეგი წარმოადგენს ზრდის ტემპის შენელებას წინა კვარტალთან შედარებით, როდესაც გაყიდვები 9%-ით გაიზარდა. მიუხედავად ამისა, მომგებიანობამ მატება განაგრძო – კორექტირებული მოგების მარჟა გაყიდვების 16.3%-მდე გაიზარდა, ერთი წლის წინ 16.1%-თან შედარებით. EPS-მა (მოგება თითო აქციაზე) $3.19 შეადგინა (პროგნოზი — $3.01).
რაც შეეხება მომავალს, მენეჯმენტი პროგნოზირებს, რომ ფისკალურ 2023 წელს მოგების მარჟა გაყიდვების დაახლოებით 14.2%-ს შეადგენს, ხოლო შემოსავლის ზრდა — 8%-9%-ს, რაც წინა პროგნოზს — 9%-10%-ს ჩამოუვარდება.
Applied Digital
პარასკევ დილით Applied Digital-მა გამოაქვეყნა პრესრელიზი, სადაც გამოაცხადა, რომ მის სრულ მფლობელობაში მყოფმა შვილობილმა კომპანიამ — Sai Computing-მა თავისი ხელოვნური ინტელექტის (AI) ქლაუდ სერვისის პლატფორმისთვის მეორე მომხმარებელი მოიპოვა. $460 მილიონის ღირებულების კონტრაქტი, რომელიც სამწლიან პერიოდს მოიცავს, Sai Computing-ისა და Applied Digital-ისთვის მნიშვნელოვან გამარჯვებას წარმოადგენს.
Applied Digital-ის მენეჯმენტმა თავისი ხელოვნური ინტელექტის ქლაუდ ბიზნესის წამოწყების შესახებ გასულ თვეში გამოაცხადა და თავის პირველ მომხმარებელთან დადო $180 მილიონის ღირებულების კონტრაქტი, რომელიც ორწლიან პერიოდს მოიცავს.
ბაზარი აშკარად აღფრთოვანებულია Applied Digital-ის ახალი წამოწყებით და კომპანიის აქციების ფასი წლის დასაწყისიდან დღემდე 557%-ით არის გაზრდილი. ეს მნიშვნელოვანი და ძვირადღირებული კონტრაქტები ცხადყოფს, რომ მომხმარებლები Applied Digital-ის პლატფორმის მიმართ ნდობით არიან განწყობილნი.
მიუხედავად იმისა, რომ ჯერ კიდევ გაურკვეველია, შეუძლია თუ არა კომპანიას გააგრძელოს ახალი კონტრაქტების დადება, ბოლო ორი თვის განმავლობაში ასეთი გარიგებები შესანიშნავი ნიშანია.
Virgin Galactic Holdings
პარასკევს Virgin Galactic Holdings-ის აქციების ფასი 18%-ზე მეტით გაიზარდა მას შემდეგ, რაც კოსმოსური ტურიზმის პროვაიდერის მენეჯმენტმა $400 მილიონის ღირებულების ახალი აქციების გაყიდვის გეგმები დააანონსა და აღნიშნა, რომ გასული 10 თვის განმავლობაში უკვე გაყიდა $300 მილიონის ღირებულების აქციები.
ცნობილი გახდა, რომ 2022 წლის აგვისტოში ხელმოწერილი ხელშეკრულების შესაბამისად, კოსმოსურმა კომპანიამ 2023 წლის მარტის ბოლომდე (ე.ი. ბოლო კვარტალში) გაყიდა 22 მილიონის ღირებულების აქცია ($135.4 მილიონი) და კიდევ 37.4 მილიონი აქცია ($164.6 მილიონი) მარტის ბოლოდან 22 ივნისამდე.
მთლიანობაში გამოდის, რომ კომპანიამ $300 მილიონის ღირებულების 59.4 მილიონი ახალი აქცია გამოუშვა. ამრიგად, მხოლოდ ბოლო 10 თვის განმავლობაში გამოშვებულ იქნა ამჟამად არსებული აქციების 21%, რაც აქციების განზავების მართლაც განსაცვიფრებელი მაჩვენებელია. Virgin Galactic-ს კი ამით არ დაუსრულებია. $400 მილიონის ღირებულების აქციების რაოდენობა, რომლის გამოშვებასაც კომპანია გეგმავს, 93 მილიონს შეადგენს.
რატომ უშვებს Virgin Galactic ამდენ ახალ აქციას? ძირითადად იმიტომ, რომ მას ფული სჭირდება, ბევრი ნაღდი ფული. მიუხედავად იმისა, რომ Virgin Galactic ამ კვირაში შემოსავლების მომტანი კომერციული კოსმოსური ტურისტული ფრენების დაწყებას აპირებს, ამ ფრენებით მიღებული შემოსავალი ძალიან მცირე იქნება კომპანიის საოპერაციო ხარჯების დასაფარად. მეტი შემოსავლის გამომუშავებისთვის, კომპანიას მოუწევს, უფრო მეტი კოსმოსური თვითმფრინავი აწარმოოს. პრობლემა ის არის, რომ ამას საკმაოდ დიდი ფინანსური რესურსები სჭირდება — $50-$60 მილიონი თითო თვითმფრინავს.
