გუშინ, გარკვეულ მომენტში, ტექნოლოგიური გიგანტის — Microsoft-ის საბაზრო კაპიტალიზაციამ $3 ტრილიონს გადააჭარბა ხელოვნური ინტელექტის (AI) პოტენციალის გარშემო შექმნილი ოპტიმიზმის ფონზე.
სავაჭრო დღის გარკვეულ ეტაპზე Microsoft-ის აქციების ფასი დღიურად 1.3%-ით გაიზარდა და $405-ს გადააჭარბა. შედეგად ტექნოლოგიური გიგანტი გახდა მეორე კომპანია, რომლის საბაზრო კაპიტალიზაციამაც $3 ტრილიონიან ნიშნულს მიაღწია. Apple იყო პირველი კომპანია, რომელმაც ეს 2022 წლის იანვარში მოახერხა.
საბოლოოდ Microsoft-მა გუშინდელი სავაჭრო დღე დაახლოებით 1%-იანი დღიური ზრდით დაასრულა და ამჟამად მისი საბაზრო კაპიტალიზაცია $2.991 ტრილიონს აღწევს. აღსანიშნავია, რომ გასული წლის განმავლობაში კომპანიის აქციების ფასი დაახლოებით 57%-ით გაუმჯობესდა, მიმდინარე წლის დასაწყისიდან კი ეს მაჩვენებელი 8%-ზე მეტით გაიზარდა.
Microsoft ლიდერობს AI რბოლაში ChatGPT-ის შემქმნელ OpenAI-სთან მიმდინარე პარტნიორობის წყალობით. ტექნოლოგიურმა გიგანტმა ChatGPT-ის გამომშვებ კომპანიაში თავდაპირველად, 2019 წელს, $1 მილიარდის მოცულობის ინვესტიცია განახორციელა, მაგრამ გენერაციული ხელოვნური ინტელექტის უნარი, შექმნას ორიგინალური კონტენტი და გაამარტივოს შრომატევადი ამოცანები, რევოლუციური აღმოჩნდა. გავრცელებული ინფორმაციით, Microsoft-მა თავისი ინვესტიცია $13 მილიარდამდე გაზარდა და, ამავდროულად, დაიწყო ხელოვნური ინტელექტის ინტეგრირება თავისი პროდუქტებისა და სერვისების ფართო სპექტრში.
უშუალოდ ამ შესაძლებლობებმა გამოიწვია კომპანიის ციფრული ასისტენტის — Copilot-ის შემუშავება, რომელიც შექმნილია Microsoft-ის მომხმარებლების დროის დაზოგვისთვის და კომპანიის პროდუქტიულობის ძირითადი პროგრამების გაუმჯობესების მიზნით. Copilot-ს შეუძლია ელექტრონული წერილების შეჯამება და საპასუხო მონახაზების შედგენა, შეხვედრების დაგეგმვა, PowerPoint-ში პრეზენტაციების შექმნა და ა. შ.
Copilot იქცა ჰიტად Microsoft-ის მომხმარებლებში, Fortune 100 კომპანიის (აშშ-ის 100 ყველაზე მსხვილი კომპანია შემოსავლების მიხედვით) დაახლოებით 40%-ს ჰქონდა წვდომა Copilot-ის საცდელ ვერსიაზე. გასული წლის ბოლოს მიცემულ ინტერვიუში მთავარმა ფინანსურმა ოფიცერმა — ემი ჰუდმა განაცხადა: „შემდეგი თაობის AI მიმართულება იქნება ჩვენს ისტორიაში ყველაზე სწრაფად მზარდი $10 მილიარდის ღირებულების ბიზნესი“.
Wedbush-ის ანალიტიკოსების თქმით კი Microsoft „არსებითად გლობალური ხელოვნური ინტელექტის რევოლუციის ჩირაღდნის მატარებელია“. მათ ასევე განაცხადეს, რომ ქლაუდ მიმართულებისა და ხელოვნური ინტელექტის ზრდის მომდევნო ტალღა ჯერ კიდევ არ არის ასახული Microsoft-ის აქციების ფასში.
Microsoft-ის აქციების ამჟამინდელი ფასი დაახლოებით $402.00-ს შეადგენს. კომპანიას ამ ეტაპზე 35 ანალიტიკოსი აფასებს და აქციებს ყველა მათგანი ყიდვის რეკომენდაციას ანიჭებს. საშუალო სამიზნე ფასი $436.45-ს შეადგენს, მაქსიმალური პროგნოზი — $600.00-ს, ხოლო მინიმალური — $375.00-ს. საშუალო სამიზნე ფასი Microsoft-ის აქციების ამჟამინდელი ფასიდან დაახლოებით 8.4%-იან ზრდას გულისხმობს.
Microsoft-ის აქციების შეძენა საქართველოს ბანკის მობილბანკში შეგიძლიათ ბმულზე.
