Bear market, ჩვეულებრივ, განისაზღვრება, როგორც 20%-იანი ვარდნა ბოლო მაქსიმალური მაჩვენებლებიდან. ტერმინის ყველაზე გავრცელებული გამოყენებაა S&P 500-ის წარმადობაზე მითითება, რომელიც, ზოგადად, მთელი საფონდო ბირჟის საორიენტაციო ინდიკატორად განიხილება.
თუმცა, ტერმინი bear market შეიძლება გამოყენებულ იქნას ნებისმიერ საფონდო ინდექსთან, ან ცალკეულ აქციასთან მიმართებით, რომელიც ბოლო მაქსიმალური მაჩვენებლებიდან 20%-ით ან მეტით დაეცა.
ტერმინები bear market და საფონდო ბირჟის კორექცია ხშირად გამოიყენება ურთიერთშენაცვლებით, მაგრამ ისინი უარყოფითი წარმადობის ორ განსხვავებულ სიდიდეზე მიგვანიშნებს. კორექტირება ხდება მაშინ, როდესაც აქციების ფასი, ბოლო მაქსიმუმებიდან, 10%-ით ან მეტით (20%-მდე) ეცემა და ის შეიძლება გადაიზარდოს bear market-ში თუ ვარდნა 20%-ს მიაღწევს.
Bear Market-ის გამომწვევი მიზეზები
Bear market-ის ჩვეული მიზეზი არის ინვესტორების შიში ან გაურკვევლობა, მაგრამ მრავალი სხვა შესაძლო გამომწვევი ფაქტორი არსებობს. 2020 წლის bear market გლობალურმა COVID-19 პანდემიამ გამოიწვია, სხვა ისტორიული მიზეზები მოიცავდა ინვესტორთა ფართოდ გავრცელებულ სპეკულაციას, უპასუხისმგებლო დაკრედიტებას, ნავთობის ფასის ცვლილებებს და ა. შ.
როგორ უნდა ჩადოთ ინვესტიცია Bear Market-ის პირობებში?
Bear market, რა თქმა უნდა, შეიძლება საშინელი დრო იყოს ინვესტორებისთვის (განსაკუთრებით დამწყებთათვის) — საინვესტიციო პორტფელის ღირებულების კლება არავის სიამოვნებს. მეორეს მხრივ, გრძელვადიან პერსპექტივაზე ორიენტირებული ინვესტორებისთვის, bear market შესანიშნავი შესაძლებლობაა ხარისხიანი აქციების ფასდაკლებით შესაძენად.
ამ ყველაფრის გათვალისწინებით, ქვემოთ მოცემულია წესები, რომლებიც bear market-ის პირობებში ინვესტირებაში დაგეხმარებათ.
იფიქრეთ გრძელვადიან პერსპექტივაში
ერთ-ერთი ყველაზე ცუდი რამ, რისი გაკეთებაც bear market-ის პერიოდში შეგიძლიათ, ბაზრის მოძრაობების გამო პანიკაში ჩავარდნაა. გრძელვადიან პერსპექტივაში საშუალო დონის ინვესტორის საინვესტიციო პორტფელის წარმადობა ფართო ბაზარს ჩამორჩება, რისი მთავარი მიზეზიც ინვესტიციების ხშირი ყიდვა-გაყიდვაა. აქციების ფასის კლებისას ჩვენი ინსტინქტი გაყიდვაა მანამ, სანამ „ყველაფერი გაუარესდება“. შემდეგ, როდესაც bull market დგება, ჩვენ ვყიდულობთ აქციებს, რათა მოგება არ გამოვტოვოთ. საყოველთაოდ ცნობილია, რომ ინვესტირების მთავარი მიზანია იაფად ყიდვა და ძვირად გაყიდვა, ბაზრის რყევებზე ემოციური რეაგირებით კი საპირისპიროს ვაკეთებთ.
ფოკუსირდით ხარისხზე
მოვიშველიოთ ლეგენდარული ინვესტორის — უორენ ბაფეტის ერთ-ერთი ცნობილი ციტატა: „როდესაც ტალღა ქრება, სწორედ მაშინ ვიგებთ, თუ ვინ ცურავდა შიშველი“. სხვა სიტყვებით რომ ვთქვათ, როდესაც ეკონომიკა უარესდება, სუსტი კომპანიები, რომლებსაც რეალური კონკურენტული უპირატესობები არ გააჩნია, ყველაზე მეტად დაზარალდება, ხოლო მაღალი ხარისხის ფირმები, როგორც წესი, რთულ პერიოდს გადალახავს. გაურკვევლობის პერიოდში მნიშვნელოვანია ფოკუსირება კომპანიებზე, რომლებსაც მყარი ბალანსი და მკაფიო, შენარჩუნებადი კონკურენტული უპირატესობები გააჩნია.
ნუ ეცდებით „ფსკერის გამოჭერას“
ბაზრის მოკლევადიანი მოძრაობების გამოცნობის მცდელობა, როგორც წესი, წაგებული ბრძოლაა. ხარისხიანი კომპანიის აქციების შეძენისას ნუ დაიცდით, სანამ ფასი ფსკერს მიაღწევს, უბრალოდ ჩადეთ ინვესტიცია და თუ ამის შემდეგ ფასი კიდევ უფრო შემცირდება, პანიკაში ნუ ჩავარდებით.
შექმენით პოზიციები დროთა განმავლობაში
იმის ნაცვლად, რომ ფსკერს დაელოდოთ, უმჯობესია, საინვესტიციო პოზიციები თანდათანობით შექმნათ. ამ გზით, თუ ხარისხიანი კომპანიის აქციების ფასი ვარდნას განაგრძობს, შესაძლებლობა მოგეცემათ ახალი დაბალი ღირებულებით ისარგებლოთ და პოზიციები კიდევ უფრო გაზარდოთ.
ეს არ არის ფინანსური რჩევა. ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა, გამოიწვიოს არსებითი დანაკარგები, ისევე როგორც – მოგება. ამიტომ, დეტალურად უნდა გააანალიზოთ, რამდენად მისაღებია ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა, აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.
