ოცნებები და მისწრაფებები პიროვნული თუ პროფესიული ზრდის მამოძრავებელი სტიმულია. რომ არა მისწრაფება და მიზნის დასახვა, ვერაფერს მივაღწევდით… თუმცა ოცნებების რეალობად ქცევა უფრო მეტს მოითხოვს, ვიდრე სასურველზე ფიქრია. ამისათვის სტრუქტურირებული მიდგომა და ურყევი ერთგულებაა საჭირო. სტატიაში კი გაგიზიარებთ, როგორ შეგიძლიათ ერთგვარი „წარმატების ჩარჩოს“ შექმნა.
განსაზღვრეთ თქვენი ხედვა
პირველ რიგში, უნდა განსაზღვროთ, რისი მიღწევა გსურთ რეალურად; რატომაა ეს მიზანი თქვენთვის მნიშვნელოვანი და როგორ იმოქმედებს მისი მიღწევა თქვენს ცხოვრებაზე. ამ კითხვებს დეტალურად უნდა უპასუხოთ — რაც უფრო კონკრეტული იქნებით, მით უკეთეს შედეგს მიიღებთ. მაგალითად, იმის ნაცვლად, რომ თქვათ: „მინდა, წარმატებული ვიყო“, აღწერეთ, როგორ გამოიყურება ეს წარმატება თქვენთვის.
გამოიყენეთ SMART მიდგომა
მეტი მკაფიოობისთვის, მიზნები მცირე ნაწილებად დაყავით — ე. წ. SMART მიზნებად.
- სპეციფიკური: მიზანი უნდა იყოს ნათელი და კონკრეტული. მოერიდეთ ბუნდოვან განცხადებებს;
- გაზომვადი: დაადგინეთ კრიტერიუმები, რომლებიც პროგრესის კონტროლში დაგეხმარებათ;
- მიღწევადი: მიზანი უნდა იყოს რეალისტური და მიღწევადი. მიუხედავად იმისა, რომ კარგია დიდ მიზნებამდე მისვლა, მიუღწევადის დასახვამ შეიძლება იმედგაცრუება და სასოწარკვეთა გამოიწვიოს;
- შესაბამისი: მიზნები უნდა შეესაბამებოდეს თქვენს ღირებულებებს, ინტერესებსა და გრძელვადიან სურვილებს. ასევე, ისინი თქვენი ზოგადი ხედვის ნაწილი უნდა იყოს;
- დროში შეზღუდული: ყოველთვის მოინიშნეთ გარკვეული ვადა სასურველი მიზნის მისაღწევად. ასე გადაუდებლობის გრძნობა გაგიჩნდებათ, რაც კონცენტრირებაშიც დაგეხმარებათ.
დაყავით პატარა ნაბიჯებად
ზოგჯერ დიდი მიზნები გადაჭარბებულად გვეჩვენება, რაც ცოტათი გვაშინებს. იმისათვის, რომ ისინი მეტად მართვადი გახდეს, უფრო მცირე, ქმედით ნაბიჯებად დაყავით. თითოეული მათგანი კი საბოლოო მიზანთან უნდა გაახლოებდეთ.
ასე ვთქვათ, მსგავსი მიდგომით მკაფიო საორიენტაციო „რუკას“ შეიქმნით.
შექმენით სამოქმედო გეგმა
ეს გეგმა უნდა ასახავდეს, რა უნდა გააკეთოთ, როდის გჭირდებათ ამის გაკეთება და როგორ გააკეთებთ ამას. ორგანიზებულობისთვის გამოიყენეთ ისეთი ხელსაწყოები, როგორებიცაა სამუშაოების სიები, კალენდრები ან პროექტის მართვის პროგრამული უზრუნველყოფა.
თითოეული ამოცანისთვის მიუთითეთ:
- საჭირო ქმედება
- საჭირო რესურსები
- ბოლო ვადა
- პოტენციური დაბრკოლებები და გადაწყვეტები
იყავით ერთგული და მოტივირებული
ოცნებების მიღწევა თანმიმდევრულ ძალისხმევას და ერთგულებას მოითხოვს. ამისათვის საუკეთესო გზას წარმოადგენს წარმატების ვიზუალიზაცია — რეგულარულად წარმოიდგინეთ, როგორ აღწევთ მიზანს და ასე მოტივაცია მოგემატებათ.
ასევე, მუდმივად წაახალისეთ თქვენი თავი, როგორც კი თუნდაც მცირე პროგრესს მიაღწევთ. კარგი იქნება, თუ მეგობარს ან ოჯახის წევრს ამ მიღწევების შესახებ გაუზიარებთ — მათგან გამოხატული მხარდაჭერა მეტ თავდაჯერებულობას შეგძენთ.
მნიშვნელოვანია, ამ პროცესში გაჭიანურების ჩვევასაც აჯობოთ — იპოვეთ მისი წარმომქმნელი მიზეზები და დაძლევის გზები. მოქნილობა კი მნიშვნელოვნად დაგეხმარებათ, რადგან ცხოვრება არაპროგნოზირებადია და ზოგჯერ შეიძლება, ცვლილებებთან შეგუება მოგვიწიოს.
აკონტროლეთ პროგრესი
რეგულარულად გადახედეთ თქვენს პროგრესს და დაფიქრდით, რა მუშაობს კარგად ან რა არის გამოსასწორებელი. ეს დაგეხმარებათ, გეზი შეინარჩუნოთ და საჭირო ნაბიჯები გადადგათ სამომავლოდ.
მოთმინება და ადაპტაცია
ოცნებების მიღწევა იშვიათადა სწორხაზოვანი გზა — სანაცვლოდ, ის ბევრ გამოწვევასა და წარუმატებლობას წარმოადგენს. მთავარი კი მოთმინებისა და გამძლეობის შენარჩუნებაა. ამიტომაც, გახსოვდეთ:
- დარჩით პოზიტიური: შეინარჩუნეთ პოზიტიური დამოკიდებულება სირთულეების ფონზეც კი. ფოკუსირდით გადაწყვეტებზე, ნაცვლად პრობლემებისა;
- ისწავლეთ წარუმატებლობისგან: შეხედეთ წარუმატებლობას, როგორც სწავლის შესაძლებლობას. გაანალიზეთ, რა მოხდა არასწორად და როგორ შეგიძლიათ სამომავლოდ მსგავსი შეცდომების თავიდან აცილება;
- განაგრძეთ წინსვლა: დაბრკოლებებს უფლებას ნუ მისცემთ, ხელი ჩაგაქნევინოთ. განაგრძეთ მცირე ნაბიჯების გადადგმა თქვენი მიზნისკენ, მაშინაც კი, თუ პროგრესი ნელია.
