როგორ გამოიმუშავებს Nike ფულს?

NIKE ფეხსაცმლისა და ტანსაცმლის გლობალური კომპანიაა, რომელიც აწარმოებს, ავითარებს და ყიდის სპორტულ ფეხსაცმელს, ტანსაცმელს, აღჭურვილობას, აქსესუარებსა და მომსახურებას.

Nike-ის ინდუსტრია

Nike-ის პროდუქციის უმეტესი ნაწილი დამოუკიდებელი კონტრაქტორების მიერ მზადდება. ისინი მომხმარებლებს Nike-ის საცალო მაღაზიებისა და ციფრული პლატფორმების მეშვეობით ან დამოუკიდებელი დისტრიბუტორების, ლიცენზიატებისა და გაყიდვების წარმომადგენლების მიერ მიეწოდება.

NIKE დაფუძნებულია ორეგონში და მას ბევრი გლობალური კონკურენტი გააჩნია, მათ შორის არიან Adidas AG, ASICS Corp., Lululemon Athletica, Puma SE და Under Armour. Nike ბაზარზე სამი სეგმენტის საშუალებით ოპერირებს: Nike-ის ბრენდი, Converse და კორპორატიული მიმართულება.

• Nike-ის ბრენდი: მოიცავს ექვს გეოგრაფიულ სეგმენტს: ჩრდილოეთ ამერიკა; ევროპა, ახლო აღმოსავლეთი და აფრიკა; დიდი ჩინეთი¹; აზია წყნარი ოკეანე და ლათინოამერიკა; და გლობალური ბრენდის განყოფილებები.
• Converse: Nike-ის Converse სეგმენტი ჩართულია ყოველდღიური სპორტული ფეხსაცმელების, ტანსაცმლისა და აქსესუარების დიზაინში, დისტრიბუციაში, ლიცენზირებასა და გაყიდვაში შემდეგი სავაჭრო ნიშნებით: Converse, Chuck Taylor, All-Star, One Star, Star Chevron და Jack Purcell.
• კორპორატიული მიმართულება: Nike-ის კორპორატიული სეგმენტის შემოსავალი ძირითადად შედგება უცხოური ვალუტის ჰეჯირების მოგებისა და ზარალისგან, რაც Nike-ის სხვა საოპერაციო სეგმენტების შემოსავლებთან არის დაკავშირებული.

Nike-ის ფინანსები

ბოლო კვარტალური ანგარიში Nike-მა 21 მარტს გამოაქვეყნა. ფისკალური 2024 წლის მესამე მეოთხედში კომპანიის შემოსავალმა $12.43 მილიარდს მიაღწია (ანალიტიკოსების პროგნოზი — $12.27 მილიარდი), ხოლო კორექტირებულმა მოგებამ თითო აქციაზე (EPS) $0.98 (პროგნოზი — $0.76). ბუღალტრული აღრიცხვის საყოველთაოდ მიღებული პრინციპების (GAAP) მიხედვით გამოთვლის შემთხვევაში კი EPS-მა $0.77 შეადგინა, რამაც უოლ სტრიტის პროგნოზს $0.06-ით გადააჭარბა.

Nike-ის ფინანსურმა დირექტორმა — მეთიუ ფრენდმა გაიმეორა პროგნოზი, რომ ფისკალურ 2024 წელს შემოსავალი დაახლოებით 1%-ით გაიზრდება. თუმცა, მისი თქმით, ფისკალური 2025 წლის პირველ ნახევარში ეს მაჩვენებელი დაბალი ერთნიშნა პროცენტული მაჩვენებლით შემცირდება.

დეკემბერში, წინა კვარტალური შედეგების გამოქვეყნებისას, Nike-ის მენეჯმენტმა ფისკალური 2024 წლისთვის ზრდის პროგნოზები შეამცირა საზღვარგარეთულ ბაზრებზე სისუსტის მიზეზით. ეს განსაკუთრებით ეხებოდა ჩინეთის, ამასთან ევროპის, ახლო აღმოსავლეთისა და აფრიკის (EMEA) ბიზნესებს. კომპანიამ კი მომდევნო სამი წლის განმავლობაში ხარჯების დაახლოებით $2 მილიარდით შემცირების გეგმები დააანონსა.

ფისკალური 2024 წლის მესამე კვარტალში Nike-ის პროდუქტის ხაზებით მიღებული შემოსავალი ასე იყოფა: ფეხსაცმელი (68%); ტანსაცმელი (28%); აღჭურვილობა (4%) და სხვა.

ისტორია და ხელმძღვანელობა

Nike-ის სახელწოდება შთაგონებულია გამარჯვების ბერძენი ქალღმერთის სახელით. კომპანია 1964 წელს, ფილ ნაითისა და ბილ ბოუერმანის მიერ დაარსდა და იმ დროისთვის მას Blue Ribbon Sports ერქვა. 1970-იან წლებში Nike იაპონური ფეხსაცმელების იმპორტიდან საკუთარის შექმნაზე გადავიდა. 1971 წელს კომპანიის ლოგო კაროლინ დევიდსონმა შექმნა. ამჟამად Nike-ს აქვს სათავო ოფისები აშშ-ში, ჩინეთსა და ნიდერლანდებში. მისი აღმასრულებელი დირექტორი კი ჯონ დონაჰოეა.

Nike-ის აქციების შეძენა საქართველოს ბანკის მობილბანკში შეგიძლიათ ბმულზე.

[1] ეს ტერმინი ზოგჯერ გამოიყენება ყველა იმ რეგიონის აღსანიშნად, რომელზეც პრეტენზიას აცხადებს როგორც ჩინეთის სახალხო რესპუბლიკა (PRC), ისე ჩინეთის რესპუბლიკა (ROC).