ხუთშაბათს, სავაჭრო დღის დასრულების შემდეგ, Deckers Outdoor-მა მოსალოდნელზე ძლიერი კვარტალური შედეგები გამოაქვეყნა. პარასკევს კი ტანსაცმლისა და ფეხსაცმლის კომპანიის აქციების ფასმა 14%-ზე მეტით მოიმატა და ისტორიულ მაქსიმუმს მიაღწია. წლის დასაწყისიდან ეს მაჩვენებელი დაახლოებით 53%-ით არის გაუმჯობესებული.
კვარტალური შედეგები
ბოლო ხუთი წლის განმავლობაში Deckers Outdoor-ის აქციების ფასი თითქმის 600%-ით გაიზარდა, რაც ბევრად აჭარბებს იმავე პერიოდში S&P 500-ის აღმასვლის 93%-იან მაჩვენებელს. მომხმარებლებს კომპანიის პროდუქცია მოსწონთ — განსაკუთრებით მისი Hoka და Ugg ბრენდები. ეს ტენდენციები გაგრძელდა მეოთხე კვარტალშიც, წმინდა გაყიდვებმა წლიურად 21%-ით მოიმატა და $959.8 მილიონი შეადგინა (ანალიტიკოსების პროგნოზი — $885.04 მილიონი).
Deckers-ის მეოთხე კვარტლის გაყიდვები განსაკუთრებით ძლიერი იყო. თუმცა, უნდა აღინიშნოს, რომ კომპანიის მთელმა ფისკალურმა 2024-მა წელმა კარგად ჩაიარა — ამ პერიოდში წმინდა გაყიდვები 18%-ით გაუმჯობესდა. Deckers-ის მენეჯმენტი კი მიიჩნევს, რომ ეს ჯერ კიდევ არ არის ბიზნესის პიკი. ფისკალური 2025 წლისთვის კომპანიაში ამ მაჩვენებლის კიდევ 10%-იან ზრდას პროგნოზირებენ.
ასევე შთამბეჭდავია მოგების მარჟის გაუმჯობესება. ფისკალურ 2024 წელს Deckers-ის მთლიანი მოგების მარჟა დაახლოებით 50%-დან (ფისკალური 2023 წელი) თითქმის 56%-მდე გაუმჯობესდა. ამ დიდმა ნახტომმა, საოპერაციო დისციპლინასთან ერთად, $900 მილიონზე მეტის მოცულობის საოპერაციო შემოსავალი მოიტანა.
გარდა ამისა, გასულ კვარტალში Deckers Outdoor-ის მოგებამ თითო აქციაზე (EPS) $4.95-ს მიაღწია, რამაც ასევე გადააჭარბა ანალიტიკოსების პროგნოზს — $2.9-ს.
როგორ აფასებენ ანალიტიკოსები Deckers Outdoor-ის აქციებს?
Deckers Outdoor-ის აქციების ამჟამინდელი ფასი დაახლოებით $1,033.00-ს შეადგენს. კომპანიას ამ ეტაპზე 17 ანალიტიკოსი აფასებს. საშუალო სამიზნე ფასი $1,045-ს შეადგენს, მაქსიმალური პროგნოზი — $1,265, ხოლო მინიმალური — $825.00-ს. საშუალო სამიზნე ფასი Deckers Outdoor-ის აქციების ამჟამინდელი ფასიდან დაახლოებით 1.2%-იან ზრდას გულისხმობს. კომპანიის აქციებს 17 ანალიტიკოსიდან 11-მა მიანიჭა ყიდვის რეკომენდაცია, 6-მა — ნეიტრალური რეიტინგი და არცერთმა — გაყიდვის რეკომენდაცია.
Deckers Outdoor-ის აქციების შეძენა საქართველოს ბანკის მობილბანკში შეგიძლიათ ბმულზე.
