რა მოხდა?
სარესტორნო ქსელის — Cava Group-ის აქციების ფასი გაიზარდა გუშინ დილით, როგორც კი კომპანიამ პირველადი საჯარო შეთავაზება (IPO) განახორციელა. 2023 წელს IPO ბაზარი წარმატებით ვერ დაიკვეხნის, თუმცა Cava-ს ასეთი დებიუტი შეიძლება იმაზე მიუთითებდეს, რომ ინვესტორების განწყობა უმჯობესდება. საბოლოო ჯამში, გუშინ, სავაჭრო დღის განმავლობაში, Cava-ს აქციების ფასი 97%-ზე მეტით გაიზარდა და დაახლოებით $44 შეადგინა.
და რა?
ინვესტორები Cava-ში ხედავენ რამდენიმე ფაქტორს, რაც სარესტორნო ბიზნესისთვის სასურველია. პირველ რიგში, კომპანიის მენეჯმენტს სჯერა, რომ 2032 წლისთვის Cava-ს 1000-ზე მეტი ლოკაცია ექნება მაშინ, როდესაც აპრილის მდგომარეობით ეს მაჩვენებელი 263-ს შეადგენდა. უფრო მეტიც, წლიური გაყიდვები თითო ლოკაციაზე — ასევე ცნობილი, როგორც ერთეულის საშუალო მოცულობა (AUV) — დაახლოებით $2.5 მილიონს შეადგენს.
გარდა ამისა 2023 წლის პირველ კვარტალში Cava-ს რესტორნის დონის მოგების მარჟა 25%-ს შეადგენდა. შედარებისთვის, Chipotle Mexican Grill-ის რესტორნის დონის საოპერაციო მარჟა დროის იმავე მონაკვეთში 25.6% იყო.
შედეგად, ძლიერი ბიზნესისა და გაფართოების დიდი გეგმის გათვალისწინებით, სულაც არ არის გასაკვირი, რომ ინვესტორებს სურდათ, შეეძინათ Cava-ს აქციები, როგორც კი ისინი საჯაროდ ხელმისაწვდომი გახდებოდა.
ახლა რა?
Cava-ს ბევრი სასურველი თვისება აქვს და ბაზრის ენთუზიაზმიც გასაგებია, თუმცა არსებობს გარკვეული რისკებიც, რომლებიც უნდა გაითვალისწინოთ.
კომპანიის საინვესტიციო თეზისის დიდი ნაწილი ტრიალებს კომპანიის შესაძლებლობის გარშემო, გაზარდოს AUV დროთა განმავლობაში. ეს შეიძლება იყოს მომგებიანი რესტორნის დონეზე, თუმცა მთელი კომპანიის მასშტაბით, კორპორატიული ხარჯების ჩათვლით, 2022 წელს კომპანიამ $59 მილიონის მოცულობის ზარალი დააფიქსირა, რაც გასული წლის $37 მილიონის ოდენობით ზარალს აჭარბებს. მზარდი AUV მოგების მნიშვნელოვანი მამოძრავებელი იქნება.
გარდა ამისა, Cava-ს AUV, რეალურად, ყველაზე დაბალია იმ ორ რეგიონში, რომლებიც ბოლოდროინდელი განვითარების ყურადღების ცენტრშია — აშშ-ის სამხრეთ-აღმოსავლეთი და სამხრეთ-დასავლეთი. როდესაც კომპანია წელს შუა დასავლეთში გაფართოვდება, საინტერესოა, მისი AUV ამ რეგიონშიც საშუალოზე დაბალი იქნება თუ არა.
