გუშინ, ბაზრის გახსნამდე, Campbell Soup-მა ძლიერი კვარტალური ანგარიში წარადგინა. სავაჭრო დღის განმავლობაში კი საკვები პროდუქტების კომპანიის აქციების ფასი 7%-ზე მეტით გაიზარდა. მიმდინარე წლის მანძილზე ეს მაჩვენებელი დაახლოებით 23%-ით არის შემცირებული.
ფისკალური 2024 წლის პირველ კვარტალში Campbell Soup-ის შემოსავალი წლიდან წლამდე 2%-ით — $2.52 მილიარდამდე შემცირდა და ეს მაჩვენებელი უოლ სტრიტის ანალიტიკოსების საშუალო პროგნოზს შეესაბამებოდა. კორექტირებულმა EPS-მა (მოგება თითო აქციაზე) $0.91 შეადგინა (პროგნოზი — $0.88). GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით გამოთვლის შემთხვევაში კი EPS $0.78 იყო — ეს მაჩვენებელი ანალიტიკოსების პროგნოზს $0.09-ით ჩამორჩა.
Campbell Soup-ის მენეჯმენტმა აღნიშნა, რომ წლიდან წლამდე კომპანიის გაყიდვების მოცულობის 5%-იანი ვარდნა ნაწილობრივ ფასების 3%-იანი ზრდით იყო კომპენსირებული.
Campbell’s Meals & Beverages განყოფილებაში გაყიდვები, გასული წლის იმავე კვარტალთან შედარებით, 4%-ით შემცირდა, სნექების სეგმენტის გაყიდვებმა 1%-იანი კლება განიცადა, მაგრამ Emerald Nuts ბიზნესის დივესტიციის გავლენის გამოკლებით, ორგანული გაყიდვები 1%-ით გაიზარდა. Campbell Soup-ის მენეჯმენტმა განაცხადა, რომ მოთხოვნა დიდი იყო ფუნთუშებსა და კრეკერებზე, განსაკუთრებით Lance და Goldfish ბრენდებზე. სნექების განყოფილებამ ასევე ისარგებლა ფასების 5%-იანი ზრდით.
Campbell Soup-ის აღმასრულებელმა დირექტორმა — მარკ კლოუზმა თქვა, რომ კომპანია განაგრძობს ეფექტიან ნავიგაციას მიმდინარე სამომხმარებლო გარემოში. მან დასძინა, რომ მნიშვნელოვანი სადღესასწაულო სეზონი კომპანიისთვის წამახალისებლად დაიწყო.
Campbell Soup-ის მენეჯმენტი მოელის, რომ მთელი ფისკალური 2024 წლის განმავლობაში EPS $3.09-$3.15-ს მიაღწევს და ეს დიაპაზონი უოლ სტრიტის ანალიტიკოსების პროგნოზებს აღემატება.
Campbell Soup-ის აქციების ამჟამინდელი ფასი დაახლოებით $43.00-ს შეადგენს. კომპანიას ამ ეტაპზე 7 ანალიტიკოსი აფასებს. საშუალო სამიზნე ფასი $45.67-ს შეადგენს, მაქსიმალური პროგნოზი — $50.00-ს, ხოლო მინიმალური — $44.00-ს. საშუალო სამიზნე ფასი Campbell Soup-ის აქციების ამჟამინდელი ფასიდან დაახლოებით 5.6%-იან შემცირებას გულისხმობს. კომპანიის აქციებს 7 ანალიტიკოსიდან 1-მა მიანიჭა ყიდვის რეკომენდაცია, 6-მა — ნეიტრალური რეიტინგი და არცერთმა — გაყიდვის რეკომენდაცია.
