გუშინ საფონდო ბირჟაზე საინტერესო სიახლეები გავრცელდა, რამაც ცნობილი კომპანიების აქციების ფასებზე მნიშვნელოვანი გავლენა იქონია. დღეს შემოგთავაზებთ საინტერესო დეტალებს ისეთი კომპანიების შესახებ, როგორებიც არის Salesforce, Roku და Activision Blizzard.
Salesforce
გუშინ, ქლაუდ პროგრამული უზრუნველყოფის გიგანტის — Salesforce-ის აქციების ფასი 3%-ზე მეტით გაიზარდა მას შემდეგ, რაც კომპანიის მენეჯმენტმა თავის ძირითად პროდუქტებზე ფასების ზრდის შესახებ განაცხადა.
გუშინ დილით გამოქვეყნებულ განცხადებაში Salesforce-ის მენეჯმენტმა განაცხადა, რომ გაზრდის ფასს საშუალოდ 9%-ით ძირითადი პროდუქტებზე. მათ ეს ნაბიჯი ახსნეს იმით, რომ კომპანიას ბოლო 7 წლის განმავლობაში ფასები არ გაუზრდია მაშინ, როდესაც ამ პერიოდის განმავლობაში 22 ახალი პროდუქტი გამოუშვა. ამისთვის კი კვლევისა და განვითარების მიმართულებით $20 მილიარდზე მეტი დაიხარჯა. მენეჯმენტმა ასევე ხაზი გაუსვა თავისი ხელოვნური ინტელექტის (AI) ახალ პროდუქტებს, მათ შორის AI Cloud-ს, Einstein GPT-ს და სხვებს.
Raymond James-მა Salesforce-ის აქციებს ყიდვის რეკომენდაცია შეუნარჩუნა, ხოლო მისმა წარმომადგენლებმა განაცხადეს, რომ ფასების ზრდა გასაკვირი არ არის და ეს სიახლე ბაზრის მიერ პოზიტიურად უნდა იქნას მიღებული.
Evercore ISI-ის წარმომადგენლებმაც ფასების ზრდას „საკმაოდ გონივრული“ ნაბიჯი უწოდეს. ფირმამ Salesforce-ის აქციების ყიდვის რეკომენდაცია და $240-ის ტოლი სამიზნე ფასი შეუნარჩუნა.
Salesforce-ის აქციების ამჟამინდელი ფასი დაახლოებით $220-ს შეადგენს. კომპანიის სამიზნე ფასის მონაცემები უოლ სტრიტის 33 ანალიტიკოსის პროგნოზებს ეყრდნობა. საშუალო სამიზნე ფასი $238.36-ს შეადგენს, მაქსიმალური პროგნოზი — $325.00-ს, ხოლო მინიმალური — $153.00-ს. საშუალო სამიზნე ფასი Salesforce-ის აქციების ამჟამინდელი ფასიდან დაახლოებით 8%-იან ზრდას წარმოადგენს. კომპანიის აქციებს 33 ანალიტიკოსიდან 22-მა მიანიჭა ყიდვის რეკომენდაცია, 10-მა — ნეიტრალური რეიტინგი, ხოლო 1-მა — გაყიდვის რეკომენდაცია.
Roku
გუშინ Roku-ს აქციების ფასი 11%-ზე მეტით გაიზარდა მას შემდეგ, რაც მენეჯმენტმა ელექტრონული კომერციის კომპანიასთან — Shopify-სთან ინტეგრაციის შესახებ განაცხადა.
Roku ამერიკული კომპანიაა, რომელიც აწარმოებს და ყიდის სხვადასხვა ციფრულ მედია ფლეერებს ვიდეო სტრიმინგისთვის, აუდიო აღჭურვილობისთვის და რეკლამით მხარდაჭერილ ვიდეო სერვისებს ოპერირებს.
2023 წლის პირველი კვარტლის მონაცემებით, Roku-ს 71.6 მილიონი აქტიური ანგარიში ჰქონდა და ეს მომხმარებლები ახლა პლატფორმაზე ნახავენ რეკლამებს Shopify-ის სავაჭრო ობიექტებისგან. ისინი პროდუქტების პირდაპირ რეკლამებიდან შესაძენად Roku-ს დისტანციური პულტების გამოყენებას შეძლებენ.
ეს არ არის პირველი შემთხვევა, როდესაც კომპანია ე. წ. „Roku Action Ads“-ს ახორციელებს. გასულ წელს Roku-ს მენეჯმენტმა Walmart-თან მსგავსი ინტეგრაციის შესახებ გამოაცხადა. თუმცა Shopify-თან პარტნიორობა საინტერესო განვითარებაა. ამ პლატფორმას მილიონობით მოვაჭრე იყენებს, რაც მას აშშ-ში ელექტრონული კომერციის მთელი აქტივობის დაახლოებით 10%-ის დაკავების საშუალებას აძლევს.
ამიტომ, ახალმა პარტნიორობამ შეიძლება Roku-ს სარეკლამო შესაძლებლობები მნიშვნელოვნად გაზარდოს.
მიმდინარე წლის პირველ კვარტალში, Roku-ს შემოსავლის 86%-ს პლატფორმის შემოსავალი შეადგენდა, რომელიც ძირითადად რეკლამებიდან წარმოიქმნება. ასე რომ, კომპანიის სარეკლამო შემოსავლის პოტენციურად გაზრდა Shopify-თან პარტნიორობით ნამდვილად საინტერესო პერსპექტივაა.
Roku-ს აქციების ამჟამინდელი ფასი დაახლოებით $75.4-ს შეადგენს. კომპანიას ამჟამად უოლ სტრიტის 19 ანალიტიკოსი აფასებს. საშუალო სამიზნე ფასი $68.83-ს შეადგენს, მაქსიმალური პროგნოზი — $89.00-ს, ხოლო მინიმალური — $41.00-ს. საშუალო სამიზნე ფასი Roku-ს აქციების ამჟამინდელი ფასიდან დაახლოებით 8.7%-იან კლებას წარმოადგენს. კომპანიის აქციებს 19 ანალიტიკოსიდან 10-მა მიანიჭა ყიდვის რეკომენდაცია, 6-მა — ნეიტრალური რეიტინგი, ხოლო 3-მა — გაყიდვის რეკომენდაცია.
Activision Blizzard
ფედერალურმა სასამართლომ Microsoft-ს დართო ნება, დახუროს Activision Blizzard-ის $75 მილიარდად შესყიდვის გარიგება, რომელიც აშშ-ის მარეგულირებლების წინააღმდეგობის გამო იყო შეჩერებული. ამ სიახლის გავრცელების შემდეგ Activision-ის აქციების ფასი 10%-ით გაიზარდა.
Microsoft პირველად დათანხმდა Activision-ის შეძენას 2022 წლის იანვარში და შეთავაზება ვიდეო თამაშების გიგანტის თითო აქციისთვის ნაღდი ფულით $95-ის გადახდას ითვალისწინებდა.
მაგრამ გარიგება სწრაფად მოექცა მარეგულირებლების ყურადღების ცენტრში და აშშ-ის ფედერალურმა სავაჭრო კომისიამ (FTC) მოითხოვა, ორ კომპანიას არ მისცემოდა გარიგების დახურვის შესაძლებლობა მანამ, სანამ FTC მას გაასაჩივრებდა.
სამშაბათს, აშშ-ის ოლქის მოსამართლემ — ჟაკლინ სკოტ კორლის განაჩენის მიხედვით, FTC-მ ვერ აჩვენა, რომ Microsoft-ის მიერ Activision-ის შეძენა კონკურენტულ გარემოს აზიანებს. ეს გადაწყვეტილება იმას ნიშნავს, რომ ამჟამად აშშ-ის მთავრობა ვერაფერს გააკეთებს, ამ გარიგებისთვის ხელის შესაშლელად.
Microsoft და Activision კვლავ მოელიან გაერთიანებული სამეფოს ანტიმონოპოლიური ორგანოებისგან დასტურს. სამშაბათს დიდი ბრიტანეთის კონკურენციისა და ბაზრის ადმინისტრაცია დათანხმდა სასამართლო პროცესის შეჩერებაზე, რათა მოლაპარაკებებისთვის დაეთმო დრო.
Activision Blizzard-ის აქციების ამჟამინდელი ფასი დაახლოებით $100-ს შეადგენს. კომპანიას ამჟამად უოლ სტრიტის 16 ანალიტიკოსი აფასებს. საშუალო სამიზნე ფასი $92.08-ს შეადგენს, მაქსიმალური პროგნოზი — $100-ს, ხოლო მინიმალური — $84.00-ს. საშუალო სამიზნე ფასი Activision Blizzard-ის აქციების ამჟამინდელი ფასის თითქმის უცვლელად შენარჩუნებას. კომპანიის აქციებს 16 ანალიტიკოსიდან 13-მა მიანიჭა ყიდვის რეკომენდაცია, 3-მა — ნეიტრალური რეიტინგი, ხოლო არცერთმა — გაყიდვის რეკომენდაცია.
