რა მოხდა?
გუშინ, პოზიტიური სიახლის შემდეგ, წყალბადის საწვავის კომპანიის — Plug Power-ის აქციების ფასი 5%-ზე მეტით გაიზარდა. წლის დასაწყისიდან კი ეს მაჩვენებელი 21%-ზე მეტით არის შემცირებული.
და რა?
გუშინ ზრდა მას შემდეგ დაფიქსირდა, რაც Plug Power-ის მენეჯმენტმა განაცხადა, რომ კომპანიამ დადო ხელშეკრულება წყალბადის საწვავის ელემენტების მიწოდებაზე. ეს გარიგება გულისხმობს კალიფორნიის პატარა ქალაქ კალისტოგაში დიზელის გენერატორების ჩანაცვლებას, რომლებიც ტყის ხანძრებისა და სხვა საგანგებო სიტუაციების დროს სარეზერვო ენერგიად გამოიყენება.
ინვესტორებმა ეს გარიგება შეიძლება მიიჩნიონ ნიშნად იმისა, რომ Plug Power თავისი პროდუქტებისთვის გამოყენების ახალ მიმართულებას ავითარებს. მენეჯმენტმა ასევე განაცხადა, რომ ეს პროექტი ქვეყანაში წყალბადზე მომუშავე საწვავის ელემენტების უდიდესი ინსტალაცია იქნება.
ახლა რა?
Plug Power-ის ხელმძღვანელობა ვარაუდობს, რომ მუნიციპალიტეტისთვის 8 მეგავატიანი ენერგიის შესანახი სისტემის მშენებლობას მეოთხე კვარტალში დაიწყებს, ოპერაციები კი, სავარაუდოდ, 2024 წლის მესამე კვარტალში დაიწყება.
Plug Power-ის შემოსავალი სტაბილურად იზრდებოდა გასული წლის განმავლობაში, თუმცა ასევე გაიზარდა მისი ზარალიც. 2022 წელს წმინდა შემოსავალმა 40%-ით მოიმატა, ამასთან 2023 წლის პირველ კვარტალში ეს მაჩვენებელი წლიდან წლამდე თითქმის 50%-ით გაიზარდა. გუშინდელი სიახლის შემდეგ, როგორც ჩანს, ინვესტორები კომპანიის აქციების და მისი პერსპექტივების მიმართ საკმაოდ ოპტიმისტურად განეწყვნენ.
Plug Power-ის აქციების ამჟამინდელი ფასი დაახლოებით $10-ს შეადგენს. ბოლო 3 თვის განმავლობაში კომპანიის აქციების სამიზნე ფასებს (მომდევნო 12-თვიანი პერიოდისთვის) უოლ სტრიტის 16 ანალიტიკოსი გვთავაზობს. საშუალო სამიზნე ფასი $18.54-ს შეადგენს, მაქსიმალური პროგნოზი — $78.00-ს, ხოლო მინიმალური — $7.50-ს. საშუალო სამიზნე ფასი HP-ის აქციების ამჟამინდელი ფასიდან დაახლოებით 94%-იან ზრდას წარმოადგენს. კომპანიის აქციებს ამ 16 ანალიტიკოსიდან 9-მ მიანიჭა ყიდვის რეკომენდაცია, 7-მა — ნეიტრალური რეიტინგი, ხოლო არცერთმა — გაყიდვის რეკომენდაცია.
