რა მოხდა?
Meta Platforms-ის აქციების ფასი ოთხშაბათ დილით მკვეთრად — 8.7%-ით გაიზარდა. აღმოსავლეთის დროით 13:00 საათისთვის ეს მაჩვენებელი 6.8%-ით იყო მომატებული.
სოციალური მედიის ტიტანისთვის ეს სასტიკი წელი იყო, მაგრამ გუშინ აქციების ფასის ზრდა განაპირობა კომპანიის გადაწყვეტილებამ, ხარჯების შესამცირებლად, კადრები გაათავისუფლოს.
და რა?
Meta Platforms-ის წარმომადგენლებმა დააანონსეს, რომ გეგმავენ სამუშაო ძალა 11,000-ზე მეტი ადამიანით შეამცირონ, რაც კომპანიის თანამშრომლების დაახლოებით 13%-ს შეადგენს. აღმასრულებელმა დირექტორმა — მარკ ცუკერბერგმა პერსონალისთვის გაგზავნილ წერილში თქვა, რომ კომპანია თანამშრომლების შემცირებას თავისი ბიზნესის ყველა დონეზე გეგმავს და აღნიშნა, რომ ყველაზე მეტად კადრების დაქირავებისა და ბიზნეს გუნდები დაზარალდება.
Meta-ს მენეჯმენტი ასევე გეგმავს საოფისე ფართის თანაზომიერ შემცირებას, ზოგიერთ შემთხვევაში პერსონალს სამუშაო მაგიდის გაზიარება მოუწევს, ამასთან, ახალი კადრების აყვანის პროცესის არსებული გაყინვა 2023 წლის დასაწყისამდე გახანგრძლივდება.
„ეს სამწუხარო ფაქტია, მაგრამ სხვა გზა არ არსებობს“ – წერს ცუკერბერგი თანამშრომლებს და თავს დამნაშავედ გრძნობს, რომ ფიქრობდა, პანდემიასთან დაკავშირებული ამაღლებული ონლაინ აქტივობა მომავალშიც გაგრძელდებოდა. „სიტუაცია არასწორად შევაფასე და პასუხისმგებლობას საკუთარ თავზე ვიღებ.“
Meta-ს მენეჯმენტმა ასევე დააანონსა კომპენსაცია, რომელსაც კომპანია გათავისუფლებულ თანამშრომლებს გადაუხდის — მინიმუმ 16 კვირის ანაზღაურება და დამატებით ორ კვირის ანაზღაურება ყოველი ნამუშევარი წლისთვის. კომპანია ასევე გეგმავს დაზარალებული თანამშრომლებისა და მათზე დამოკიდებული პირების ჯანდაცვის ხარჯების დაფარვას ექვსი თვის განმავლობაში.
ახლა რა?
ჭორები თანამშრომლების გათავისუფლებასთან და სხვა ნაბიჯებთან დაკავშირებით, რომლებიც Meta-ს მენეჯმენტმა შეიძლება მდგომარეობის გამოსასწორებლად გადადგას, კვირების განმავლობაში ვრცელდებოდა. წლის დასაწყისიდან კომპანიის აქციების ფასი ჯერჯერობით 70%-ით არის შემცირებული.
ეკონომიკურმა გაურკვევლობამ და მიმდინარე bear market-მა Meta ძალიან დააზარალა, მაგრამ ოპტიმისტური განწყობის მიზეზებიც არსებობს. Meta-მ დახურა 2021 წელი, როგორც სიდიდით მეორე ციფრული რეკლამის განმთავსებელმა, რომელიც მსოფლიო რეკლამის ბაზრის დაახლოებით 24%-ს აკონტროლებს. ის არის მეორე მხოლოდ Alphabet-ის Google-ის შემდეგ და ნაკლებად სავარაუდოა, რომ ეს დომინანტური მდგომარეობა შეიცვალოს. ხარჯების შესამცირებლად გადადგმული ნაბიჯები კომპანიის ფინანსური მდგომარეობის გამოსწორებას შეუწყობს ხელს.
