ბაზრის ვარდნა სახალისო მოვლენა არ არის. ცვალებადობა, ბაზრის რყევები და საინვესტიციო პორტფელის მნიშვნელოვანი ზარალი შეიძლება ინვესტორებისთვის ძალიან რთული ასატანი იყოს. ისეთმა მდგომარეობამ, როგორშიც ამჟამად საფონდო ბირჟა იმყოფება, შესაძლოა მრავალ ინვესტორს დიდი შეცდომების დაშვებისკენ უბიძგოს.
ისწავლეთ, როგორ აარიდოთ თავი ამ ორ გავრცელებულ შეცდომას და ამის ნაცვლად, ბაზრის ვარდნა თქვენს სასარგებლოდ გამოიყენეთ.
- პანიკური გაყიდვა
როდესაც ხედავთ, რომ ბაზარი ეცემა, იქნება ეს საფონდო ბირჟა, თუ უძრავი ქონების ბაზარი, პანიკაში ჩავარდნა და ინვესტიციების გაყიდვა ადვილია. იმის შიში, რომ, შესაძლოა, ზარალი კიდევ უფრო გაიზარდოს, მეტ გაყიდვას იწვევს, რაც კიდევ უფრო მეტი პანიკის და მეტი გაყიდვის მიზეზი ხდება. ამ მანკიერ ციკლს ძირითადად ახალი, გამოუცდელი ინვესტორები ხელმძღვანელობენ, რომლებიც გადაწყვეტილებებს ემოციებზე დაყრდნობით იღებენ და ინვესტიციების გრძელვადიან პერსპექტივას ივიწყებენ.
პოზიციების გრძელვადიან პერსპექტივაში შენარჩუნება თქვენს ინვესტიციებს საშუალებას აძლევს, რომ ბაზრის ცვალებადობა გადალახოს. მრავალი აქცია, რომლის ფასიც დღეს საგრძნობლად არის შემცირებული, ხარისხიანია და ფასების კლების მიზეზი მხოლოდ ინვესტორების შეშფოთებაა. ამისგან არც უძრავი ქონების ბაზარია დაცული.
თვალი ადევნეთ თქვენს პორტფელში არსებულ აქციებს, რომელთა ფასებიც მცირდება, დარწმუნდით, რომ თქვენ მიერ შერჩეული კომპანიების ბიზნეს საფუძველი კვლავ მყარია და ეცადეთ არ გაყიდოთ პოზიციები. ეს გამოიწვევს ზარალს მაშინ, როდესაც შანსი გაქვთ, რომ გრძელვადიან პერსპექტივაში დიდი სარგებელი მიიღოთ.
- უმოქმედობა
გახსოვდეთ, რომ ინფლაციის ზემოქმედებით თქვენი ფულის ღირებულება მცირდება. გარდა ამისა, ის ფული, რომელსაც ინახავთ, შეგეძლოთ ინვესტიციებში ჩაგედოთ და სარგებელი მიგეღოთ (თუმცა, გაითვალისწინეთ, რომ აუცილებელია ყოველი შემთხვევისთვის საგანგებო ფონდი იქონიოთ). რეალურად, ბაზრის ვარდნის პერიოდი ხარისხიანი აქციების შესაძენად და გრძელვადიან პერსპექტივაში მნიშვნელოვანი მოგების მისაღებად შესანიშნავი დროა.
ვერავინ განსაზღვრავს, თუ როგორ განვითარდება მოვლენები საფონდო ბირჟაზე. ლოდინის ნაცვლად, უმჯობესი იქნება, თუ მოძებნით ისეთ ძლიერ კომპანიებს, რომლებსაც რთული პერიოდების გადალახვა შეუძლია. ამ კუთხით დღეს ბაზარზე დიდი შესაძლებლობები არსებობს.
