როდესაც განსაზღვრავთ, არის თუ არა კომპანია კვალიფიცირებული, როგორც კარგი დივიდენდური აქცია, საკუთარ თავს შემდეგი კითხვები დაუსვით: იხდის თუ არა კომპანია დივიდენდებს წლების განმავლობაში? შეძლო თუ არა მან გადახდების რეგულარულად გაზრდა? აქვს თუ არა კომპანიას ამ ზრდის გაგრძელების საშუალება?
Disney-მ 2020 წლის მაისში, პანდემიის პირველ დღეებში დივიდენდების გადახდა შეაჩერა და დღემდე არ განუახლებია. მიუხედავად იმისა, რომ, კომპანიის თემატური პარკებისა და სხვა ბიზნესების მიმართულებით შექმნილი გაურკვევლობის ფონზე, ეს გადაწყვეტილება იმ დროისთვის გასაგები იყო, საინტერესოა, შეძლებს თუ არა Disney, როგორც დივიდენდური აქცია, დიდების კვლავ მიღწევას.
მედია იმპერია
დისნეის იმპერია მოიცავს ღირებულ საკუთრებებს, მათ შორის ქსელებს, როგორიც არის ABC, Disney Channel და ESPN; სტრიმინგის სერვისებს, როგორიც არის Disney+, კინოსტუდიები და თემატური პარკებს.
როგორც მისი ბიზნესის ერთობლივი სიძლიერის დასტური, Disney-ის ფისკალური პირველი ნახევრის (დასრულდა 2 აპრილს) შემოსავალი 29%-ით – $41.1 მილიარდამდე გაიზარდა. იმის აღსანიშნად, თუ რამდენად სწრაფად გაუმჯობესდა კომპანია შარშანდელთან შედარებით, როდესაც კოვიდ-19-ის დაწყებამ მისი შედეგები დააზარალა, შევხედოთ კორექტირებულ განზავებულ მოგებას (წილის განზავება – ახალი აქციების გამოშვების შედეგად, ძველი აქციონერების ფლობის წილის პროცენტული რაოდენობის შემცირება) ერთ აქციაზე (EPS) იმავე პერიოდის განმავლობაში თითქმის გაორმაგდა და $2.14 შეადგინა.
დისნეის პერსპექტივებიც კარგად გამოიყურება. კომპანია მზად არის გამოუშვას პოპულარული ფილმების გაგრძელებები, ასევე, გაუმჯობესდა თემატურ პარკებში მომხმარებლების ხარჯვის მაჩვენებელი. კარგად მუშაობას მისი სტრიმინგ ბიზნესიც აგრძელებს. მეორე კვარტალში Disney+-ის ფასიანი აბონენტების რაოდენობა 33%-ით – $137.7 მილიონამდე გაიზარდა. ეს ხდება უფრო ინტენსიური კონკურენციის დროს. მაგალითად, თვის ბოლოს კვარტალში, Netflix-მა თითქმის 1 მილიონი აბონენტი დაკარგა.
როდესაც Disney-ის ფულადი სახსრების თავისუფალ ნაკადს (FCF) განვიხილავთ, უმჯობესია მთელ წელს გადავხედოთ, რადგან ის სეზონურობას გამორიცხავს. მიუხედავად იმისა, რომ სახლში დარჩენა და ლოკდაუნი ბიზნესს ზიანს აყენებს, კომპანიამ გასულ წელს დაახლოებით $2 მილიარდის მოცულობის FCF გამოიმუშავა. თუმცა, ამ მაჩვენებელმა $3.6 მილიარდიდან კლება განიცადა.
დივიდენდების განახლება
სანამ დირექტორთა საბჭო 2020 წელს დივიდენდების გაცემას შეაჩერებდა, დისნეი ნახევარწლიურ გადახდებს ახორციელებდა. მას ასევე გადახდების რეგულარულად გაზრდის ისტორია ჰქონდა. 2012 წელს ის თითო აქციაზე წელიწადში $0.75-ს იხდიდა, გადახდების შეწყვეტამდე კი ეს მაჩვენებელი $1.76-ს აღწევდა.
Disney-ის მენეჯმენტმა ადრე განაცხადა: „გრძელვადიან პერსპექტივაში ჩვენ მოველით, რომ დივიდენდები ჩვენი კაპიტალის განაწილების სტრატეგიის ნაწილი დარჩება.“ თუმცა ისინი არ მოელიან დივიდენდების გაცემის განახლებას მანამ, სანამ „უფრო ნორმალიზებულ გარემოს არ დავუბრუნდებით.“
კომპანიას გააჩნია კარგი ატრიბუტები, რომლებიც ინვესტორებს უდავოდ მიმზიდველად მიაჩნიათ. თუმცა, ფიქსირებული თარიღის ან დივიდენდების უახლოესი დაბრუნების დაპირების გარეშე, შემოსავალზე ორიენტირებულმა ინვესტორებმა ძლიერი დივიდენდური აქციების მოსაძებნად სხვა კომპანიებს უნდა მიმართონ.
სხვა შესაძლებლობები
ინვესტორებს, რომლებიც საუკეთესო დივიდენდურ აქციებს ეძებენ, შეუძლიათ დაიწყონ დივიდენდ არისტოკრატებით, S&P 500-ის წევრებით, რომლებიც დივიდენდებს ზედიზედ მინიმუმ 25 წლის განმავლობაში ზრდის. ასევე, მათ შეუძლიათ მიმართონ უფრო ელიტარულ ჯგუფს – დივიდენდ მეფეებს. ეს არის S&P 500-ის კომპანიები, რომლებმაც დივიდენდური ანაზღაურების გაზრდა მინიმუმ ნახევარი საუკუნის განმავლობაში მოახერხეს.
