რა მოხდა?
Facebook-ის მშობელი – Meta Platforms-ის აქციების ფასი გუშინ შემცირდა, რომლის მიზეზიც იყო მოსალოდნელი კვარტალური ანგარიშის მიმართ სკეპტიკური მოლოდინები, ანგარიშის წარდგენის შემდეგ კონკურენტ Alphabet-ის აქციების მასიური გაყიდვები და მცდარი ანგარიში Bloomberg-ისგან, რომელმაც აჩვენა, რომ პირველი კვარტლის ანგარიშში კომპანია შემოსავლების მოლოდინებს ასცდა.
შედეგად, Facebook-ის აქციების ფასი სავაჭრო დღის დახურვამდე 2.8%-ით შემცირდა.
და რა?
გუშინ Meta-ს აქციების ფასის კლება ძირითადად გამოწვეული იყო იმის შიშით, რომ, შესაძლოა, კომპანიამ შემოსავლებთან დაკავშირებული მოლოდინები კვლავ ვერ გაამართლოს. Facebook-ის მფლობელი კომპანია თავის ბოლო კვარტალურ ანგარიშში საკმაოდ ასცდა მოლოდინებს და პირველი კვარტლის განმავლობაში კი შემოსავლების მხოლოდ 3%-11%-ით ზრდა ივარაუდა, რაც მის ისტორიულ ნორმას მნიშვნელოვნად ჩამორჩება. კომპანია Tik-Tok-თან კონკურენციას ებრძვის, ისევე, როგორც Apple-ის რეკლამის მონიტორინგის გამჭვირვალობის ინიციატივას, რაც მის სარეკლამო ბიზნესს ზიანს აყენებს. Meta დიდ ინვესტიციებს დებს Reality Labs-ში, განყოფილებაში, რომელიც მეტავერსის ტექნოლოგიის შექმნისთვის არის საჭირო. შედეგი ამ მიმართულებით, ჯერჯერობით, მცირეა.
Bloomberg-ის მოხსენებამ Meta-ს აქციების მასიური გაყიდვა გამოიწვია, თუმცა მედიაკომპანიამ სწრაფადვე განაცხადა, რომ ანგარიში მცდარი იყო.
და ბოლოს, როგორც ჩანს, Alphabet-ის აქციების მასიურმა გაყიდვებმაც უარყოფითად იმოქმედა Meta-ს აქციებზე. მიუხედავად იმისა, რომ Google-ის მშობელი კომპანიის კვარტალური ანგარიში პროგნოზებს ძირითადად შეესაბამებოდა, მოგება თითო აქციაზე (EPS) შემცირდა, Youtube-ის ზრდა შენელდა და მიუხედავად Google Cloud-ის მიმართულებით ძლიერი ზრდისა, კომპანიამ თითქმის $1 მილიარდი დაკარგა.
ახლა რა?
გუშინ კი Meta Platforms-მა 2022 წლის პირველი კვარტლის ანგარიში წარადგინა, შედეგები კი ასეთია:
- EPS: $2.72. Refinitiv-ის (ფინანსური ბაზრის მონაცემებისა და ინფრასტრუქტურის ამერიკულ-ბრიტანული გლობალური მიმწოდებელი) მიერ გამოკითხული ანალიტიკოსების პროგნოზი $2.56 იყო
- შემოსავალი: $27.91 მილიარდი (პროგნოზი Refinitiv-ის მიხედვით – $28.2 მილიარდი)
- ყოველდღიური აქტიური მომხმარებლების რაოდენობა (DAU):96 მილიარდი. StreetAccount-ის (ფინანსური მონაცემებისა და პროგრამული უზრუნველყოფის ამერიკული კომპანია) პროგნოზი – 1.95 მილიარდი
- ყოველთვიური აქტიური მომხმარებლების რაოდენობა (MAU): 94 მილიარდი (StreetAccount-ის პროგნოზი – 2.97 მილიარდი)
- საშუალო შემოსავალი თითო მომხმარებელზე (ARPU): $9.54 (StreetAccount-ის პროგნოზი – $9.50).
