მსოფლიოში ერთ-ერთმა ყველაზე დიდმა აქსელერატორმა — 500 Global-მა, საქართველოს ბანკთან და GITA-სთან (საქართველოს ინოვაციებისა და ტექნოლოგიების სააგენტო) თანამშრომლობით, 500 Georgia-ს პროგრამის ფარგლებში კიდევ 13 სტარტაპი გადაამზადა.
ამ სტარტაპებს შორის მოხვდა Epoint — მრავალფუნქციური ელექტრონული კომერციის პლატფორმა და გადახდის აგრეგატორი მცირე და საშუალო ბიზნესისთვის. ამასთანავე, Epoint B2B მომხმარებლებს ონლაინ გადახდის გადაწყვეტას სთავაზობს (მარკეტები, ონლაინ მაღაზიები, ტაქსის და მიტანის სერვისები, ბილეთების პლატფორმები და მედია მარკეტინგი).
ჩვენ გავესაუბრეთ ჰასან ჰასანოვს, რომელიც Epoint-ში აღმასრულებელი დირექტორის მოადგილის თანამდებობას იკავებს, რათა გაგვეგო, რა მისცა სტარტაპს 500 Georgia-ში მონაწილეობამ.
ჰასან, გვიამბეთ, რა გასწავლათ 500 Georgia-ს პროგრამამ?
პირველ რიგში, მინდა აღვნიშნო, რომ პირველმა ორმა კვირამ მოგვცა მნიშვნელოვანი ცოდნა მომხმარებელთა მომსახურების, გაყიდვების, მარკეტინგის მიმართულებით. ახლა უკეთ ვიცით, თუ როგორ ვიმუშაოთ ჩვენი ბიზნესის მეტრიკებთან. ზრდის კვირების განმავლობაში, პროგრამის პირველ ფაზაში შეძენილი ცოდნა პრაქტიკაში განვახორციელეთ და დავნერგეთ მნიშვნელოვანი ცვლილებები როგორც ჩვენს სტრატეგიაში, ასევე მომხმარებლებთან ურთიერთობის თვალსაზრისით. ფონდების მოზიდვისა და დემო დღისთვის მზადების ეტაპი ყველაზე რთული იყო. დემო დღის ღონისძიებაზე ჩვენი სტარტაპის შესახებ ძალიან ბევრი რამის თქმა გვინდოდა, დრო კი შეზღუდული იყო, თუმცა ყველაფერი გამოგვივიდა, ახლა კი სახსრების მოზიდვაზე ვმუშაობთ.
გვითხარით, როგორ შეძელით (ან მომავალში აპირებთ) შეძენილი ცოდნის საფუძველზე თქვენი ბიზნესის გაუმჯობესება?
ჩვენი კომპანიის ღირებულების შეთავაზება (value preposition) შევცვალეთ. ამასთან, ცვლილებები შევიტანეთ მომხმარებლებთან ურთიერთობის პოლიტიკაში, მცირე კორექციები ჩვენს გადაწყვეტებთან დაკავშირებითაც განვახორციელეთ. ახლა წვდომა გვაქვს უფრო მეტ ბიზნეს კატეგორიებზე და მომხმარებლების უფრო დიდ ბაზაზე. Epoint-ის შემოსავალიც გაიზარდა.
როგორია Epoint-ის მომავლის გეგმები?
როგორც დემო დღის ღონისძიებაზე ჩვენი სტარტაპის წარდგენისას აღვნიშნეთ, Epoint ფართოვდება საქართველოში, უზბეკეთსა და თურქეთში. ასევე, აპრილის დასაწყისში, საინვესტიციო რაუნდის გახსნას ვგეგმავთ. ვნახოთ, როგორ განვითარდება მოვლენები.
როგორ ფიქრობთ, რატომ შეიძლება თქვენი კომპანია ინვესტორებისთვის საინტერესო იყოს?
ამ ინდუსტრიაში მომხმარებლების ძირითადი პრობლემები საკმაოდ სიღრმისეულად შევისწავლეთ. მათ უმეტესობას სჭირდება სწრაფი კავშირი, უსაფრთხო ტექნიკური მხარდაჭერა და მოქნილი გადახდის სისტემა, მოსახერხებელი ინტერფეისით. ჩვენი პროდუქტი ძალიან მოთხოვნადია ბაზარზე, რადგან კლიენტებთან პარტნიორობით ვცდილობთ, მათ ელექტრონული კომერციის სფეროში თავიანთი ბიზნესის მაქსიმალურად განვითარებაში დავეხმაროთ. ჩვენი გადაწყვეტა ძალიან მოქნილი და საჭიროა, ის დიდი პრობლემის გადაჭრას ემსახურება, მინიმუმ ჩვენს რეგიონში (აზერბაიჯანი). ვფიქრობ, ეს აუცილებლად საინტერესო უნდა იყოს ინვესტორებისთვის, განსაკუთრებით იმის გათვალისწინებით, Epoint უკვე მუშაობს, ფართოვდება და შემოსავალს გამოიმუშავებს.
