მთელი მსოფლიოს მასშტაბით არსებული ლოკაციების განსაცვიფრებელი რაოდენობით, Starbucks დღესდღეობით საყოველთაო ბიზნესს წარმოადგენს. 1971 წელს დაარსებული კომპანია წლების განმავლობაში ძალიან გაიზარდა და ყავის საცალო ინდუსტრიის ლიდერად იქცა.
Starbucks-ის IPO (პირველადი საჯარო შეთავაზება) Nasdaq-ის საფონდო ბირჟაზე 1992 წელს შედგა და მას შემდეგ კომპანიის აქციების ფასი 27,300%-ით არის გაზრდილი. თუმცა ისტორიული მაქსიმუმი, რომელსაც Starbucks-მა 2021 წლის ივლისში მიაღწია, აქციების ამჟამინდელ ფასს დაახლოებით 26%-ით აღემატება.
თუ ამ ცნობილ კომპანიაში ინვესტირებას განიხილავთ, გაეცანით 3 მნიშვნელოვან ფაქტს, რომელიც Starbucks-ის შესახებ აუცილებლად უნდა იცოდეთ.
- Starbucks-ის ზრდის გეგმები
ბოლო 12 თვის განმავლობაში Starbucks-მა $34.7 მილიარდის მოცულობის შემოსავალი გამოიმუშავა და ეს თანხა შესანიშნავად წარმოაჩენს კომპანიის მასშტაბებს. კიდევ უფრო შთამბეჭდავი ის არის, რომ ბიზნესი ამჟამად 80 ქვეყანაში 38,587 ლოკაციას ფლობს.
ამ მაჩვენებლებიდან გამომდინარე შეიძლება ვიფიქროთ, რომ კომპანიას დიდი ზრდის პოტენციალი არ გააჩნია. თუმცა უოლ სტრიტის ანალიტიკოსები ვარაუდობენ, რომ მომდევნო სამი ფისკალური წლის განმავლობაში შემოსავლის ნაერთი წლიური ზრდის ტემპი (CAGR) 9.1%-ს მიაღწევს. და ეს ნაწილობრივ გამოწვეული იქნება ახალი ლოკაციების გახსნით.
მენეჯმენტი იმედოვნებს, რომ ერთ დღეს Starbucks-ს აშშ-ში 20,000 ლოკაცია ექნება (ამჟამად — 16,466). ხოლო ჩინეთში, სადაც კომპანიას ყველაზე დიდი პოტენციალი აქვს, აღმასრულებლები 2025 წლისთვის ლოკაციების რაოდენობის 9,000-მდე გაზრდას გეგმავენ. ეს მიზანი გულისხმობს, რომ ჩინეთში ორ წელზე ნაკლებ დროში ლოკაციების რიცხვი 29%-ით მოიმატებს.
ზრდის გეგმის უმთავრესი ნაწილია არსებული ბაზრების შემდგომი გამკვრივება. ეს ნიშნავს უფრო მეტად კონცენტრირებას “drive-thru” (როდესაც რესტორანი, ბანკი ან მაღაზია ფანჯრიდან ისე გემსახურებათ, რომ მანქანის დატოვება არ გჭირდებათ) ან “delivery-only“ (მხოლოდ მიწოდების სერვისი) პარამეტრების დანერგვაზე.
- „ეკონომიკური თხრილი“
იმისთვის, რომ ბიზნესმა Starbucks-ის მსგავს გრძელვადიან წარმატებას მიაღწიოს, გადამწყვეტი მნიშვნელობა აქვს „ეკონომიკური თხრილის“ არსებობას. ლეგენდარული ინვესტორის — უორენ ბაფეტის მიერ დამკვიდრებული ეს ტერმინი გულისხმობს, რომ კომპანიას გააჩნია უპირატესობა, რომელიც სხვა ფირმების მხრიდან კონკურენციას ართულებს.
Starbucks-ის ყველაზე ღირებული აქტივი მისი ბრენდია. შეიძლება ითქვას, რომ ყავა და საკვები, რომელსაც ბიზნესი ყიდის, ძირითადად მხოლოდ სამომხმარებლო საქონელია. მაგრამ Starbucks-ს შეუძლია, დააწესოს პრემიუმ ფასები, რადგან კონკურენტებისგან მას თავისი ბრენდი განასხვავებს. ეს გვეხმარება იმის ახსნაში, თუ როგორ მოახერხა გასულ ათწლეულში კომპანიამ 28.3%-ის ტოლი მთლიანი მოგების მარჟის დაფიქსირება.
ფასდაუდებელი ბრენდის გარდა, Starbucks ასევე სარგებლობს მასშტაბის უპირატესობებით. მცირე კონკურენტებთან შედარებით, მას აქვს მსყიდველობითი ძალაუფლება და მოლაპარაკების ბერკეტი, რაც კომპანიას თავის პროდუქტზე უკეთესი ფასების დაწესებაში ეხმარება. გარდა ამისა, ნებისმიერ ტექნოლოგიურ ინვესტიციას, რომელსაც Starbucks ახორციელებს, შეუძლია სარგებელი მოუტანოს ბევრად უფრო დიდ ქსელს და მომხმარებელთა ბაზას.
- ციფრული მომავალი
ნებისმიერი საცალო ბიზნესის მენეჯმენტმა უნდა მოძებნოს გზები, შეხვდეს თავის მომხმარებლებს იქ, სადაც ისინი არიან. ეს ნიშნავს ფოკუსირებას ციფრული შესაძლებლობების გაძლიერებაზე, რაც მომხმარებლებს საშუალებას მისცემს, შეკვეთები მათთვის საუკეთესო გზით განახორციელონ. Starbucks-ის უაღრესად წარმატებული ქულების დაგროვების პროგრამა, რომელიც 2009 წლის ბოლოდან ფუნქციონირებს, სწორედ ამას აკეთებს.
მსოფლიო სულ უფრო ციფრული ხდება და მონაცემები, რომელთა შეგროვებაც Starbucks-ს ამ მომხმარებლებისგან შეუძლია, მის ბიზნესს კიდევ უფრო დიდი კონკურენტული უპირატესობით უზრუნველყოფს. ეს მონაცემები მენეჯმენტს აწვდის ინფორმაციას, რომელიც შეიძლება გამოყენებულ იქნას მარკეტინგისა და პროდუქტის განვითარებისთვის.
„ჩვენი Starbucks Rewards-ის წევრების მზარდი რაოდენობა სულ უფრო ხშირად სტუმრობს ჩვენს მაღაზიებს და ყოველ ჯერზე ზრდის ხარჯებს“ — განაცხადა Starbucks-ის აღმასრულებელმა დირექტორმა, ლაქსმან ნარასიმჰანმა 2024 წლის პირველი კვარტლის ფინანსური მონაცემების წარდგენის შემდეგ.
ანალიტიკოსების შეფასებები
Starbucks-ის აქციების ამჟამინდელი ფასი დაახლოებით $93.00-ს შეადგენს. ამ ეტაპზე კომპანიას უოლ სტრიტის 26 ანალიტიკოსი აფასებს. საშუალო სამიზნე ფასი $107.88-ს შეადგენს, მაქსიმალური პროგნოზი — $127.00-ს, ხოლო მინიმალური — $95.00-ს. საშუალო სამიზნე ფასი Starbucks-ის აქციების ამჟამინდელი ფასიდან დაახლოებით 16%-იან ზრდას გულისხმობს. კომპანიის აქციებს ამ 26 ანალიტიკოსიდან 10-მა მიანიჭა ყიდვის რეკომენდაცია, 16-მა — ნეიტრალური რეიტინგი და არცერთმა — გაყიდვის რეკომენდაცია.
Starbucks-ის აქციების შეძენა საქართველოს ბანკის მობილბანკში შეგიძლიათ ბმულზე.
კონტენტი მოწოდებულია საინფორმაციო მიზნით და არ წარმოადგენს ფინანსურ რჩევას. ყველა ინვესტიცია შეიცავს რისკს, ამიტომ აუცილებელია, ინვესტირებამდე საკუთარი კვლევა ჩაატაროთ.
