გასულ კვირას აქციების ფასი შემცირდა, რადგან ბაზრის მერყეობა ინვესტორებზე ზემოქმედებას განაგრძობს. Dow Jones Industrial Average და S&P 500 თითქმის 2%-ით დაეცა, მთელი წლის განმავლობაში კი 5%-ზე მეტით.
Ultra Beauty, Casey’s General Stores და Campbell Soup იმ კომპანიებს შორისაა, რომლებიც, სავარაუდოდ, მოგებას მოიტანენ და რომლებსაც მომდევნო რამდენიმე სავაჭრო დღის განმავლობაში უნდა დააკვირდეთ.
- Ultra Beauty-ის გაფართოების გეგმა
ინვესტორები მოუთმენლად ელიან Ultra Beauty-ის შემოსავლების ანგარიშის განახლებას, რომელიც ხუთშაბათ შუადღისთვის არის დაგეგმილი. სილამაზის პროდუქტების საცალო ვაჭრობის ბოლო ანგარიში ნამდვილი სენსაცია იყო. გაყიდვები დაახლოებით 29%-ით გაიზარდა.
გაყიდვების თვალსაზრისით, ამ კვირაში გაირკვევა, კვლავ არის თუ არა მზარდი მოთხოვნა Ultra-ს მაკიაჟისა და კანის მოვლის საშუალებებზე. Ultra-ს მაღაზიის ტრაფიკი გასულ კვარტალში 17%-ით გაიზარდა, როდესაც ერთი ვიზიტის საშუალო ხარჯმა 8%-ით მოიმატა. იდეალურ შემთხვევაში, სადღესასწაულო კვარტალში ორივე მაჩვენებელი კვლავ მაღალი იქნება.
ქსელი ასევე გამოავლენს, მიწოდების ჯაჭვის გამოწვევებმა საოპერაციო მარჟა შეამცირა თუ ეს მაჩვენებელი კვლავ ისტორიული ნიშნულისკენ (გაყიდვების 14%-ზე მაღლა) მიემართება.
თუ ეს მაჩვენებელი მომხმარებელთა ძლიერი ტრაფიკის კონტექსტში ზრდას განაგრძობს, კომპანიის ხელმძღვანელობამ შეიძლება 2022 წლისთვის მაღაზიების გახსნის უფრო აგრესიული გეგმა წარადგინოს.
- Casey’s General Stores-ის ახალი პერსპექტივა
Casey’s General Stores თავისი უახლესი შემოსავლების შედეგებს სამშაბათ შუადღისას გამოაქვეყნებს. ყოველდღიური მოთხოვნების მაღაზიის საცალო ვაჭრობის ანგარიშთან დაკავშირებული მოლოდინები მოკრძალებულია.
რასაკვირველია, Casey’s, გასულ წელთან შედარებით ძლიერ ზრდას ნახავს. მიუხედავად ამისა, ამ მოგების უმეტესი ნაწილი Pilot-ის მაღაზიის ბრენდის შეძენიდან მოდის. Casey’s-ის გაყიდვები გასულ კვარტალში 6%-ით გაიზარდა.
დეკემბრის დასაწყისში კომპანიის აღმასრულებელმა დირექტორმა – დარენ რებელსმა თქვა, რომ ეს ზრდა მომხმარებელთა მზარდი ტრაფიკითა და მზა საკვებზე მაღალი მოთხოვნით იყო გამოწვეული. სამშაბათს გავიგებთ, გაგრძელდა თუ არა ეს დადებითი ტენდენციები 2022 წლის დასაწყისშიც.
კომპანიის ანგარიში უპასუხებს საკვანძო კითხვებს ხარჯების ზრდისა და მარაგების გამოწვევების შესახებ, რამაც ბიზნესზე გავლენა 2021 წლის ბოლოდან დაიწყო.
- Campbell Soup-ის 2022 წლის პროგნოზი
ოთხშაბათ დილით, Campbell Soup-მა ინვესტორების რამდენიმე საკვანძო კითხვას უნდა უპასუხოს. დაფასოებული საკვები პროდუქტების სპეციალისტმა პანდემიის ადრეულ ეტაპებზე გაყიდვების მყარი ზრდა დააფიქსირა, თუმცა ბოლო კვარტლებში ეს ზრდა შენელდა. დეკემბრის შუა რიცხვების განახლების მიხედვით, კომპანიის მენეჯმენტი წელიწადში სულ რაღაც 2%-იანი გრძელვადიანი გაფართოების პოტენციალს ხედავს.
Campbell Soup შემოსავლების ამაზე უფრო სწრაფი ტემპით გაზრდას გეგმავს და მისმა გულუვხმა დივიდენდებმა ინვესტორების შემოსავალიც უნდა გაზარდოს.
თუმცა ინვესტორთა უმეტესობა ეძებს ნიშანს, რომ Campbell Soup-ს, ინოვაციებისა და შესყიდვების მეშვეობით, დროთა განმავლობაში კომპანიის ზრდის დაჩქარება შეუძლია. წინააღმდეგ შემთხვევაში, 2022 წელს და მის შემდგომ პერიოდშიც, Campbell Soup-ს მოგების გასაზრდელად მხოლოდ ხარჯების შემცირების არჩევანი დარჩება.
